RealLove chapter 2. by Tmawii

Real Love, chapter 2 By T mawii.
Quote
Share this topic on
Unread post  April 24th, 2019, 7:53 pm

REAL LOVE💙

Chapter..2.

By ..Tmawii.


Thingpui tuihnai tak mai leh Buhban fai âwm hmin ngat mai kan ei lai chuan kan ngawi ṭhap a, chutah ka pa chuan a duh tawk ngah hmasa berin:


" Ka puar ta hle mai, i nu'n uluk taka ei tur a siam hi chu a tui ṭhin teh e, puar tak khan ei teh Valte," a ti dam duam a.


Kan ei leh inna ka nu'n a seng fel hnu chuan ka pa nen chuan kan la ṭhu muang ta fo va, eng tak chu min hrilh a tum ni maw tiin ka ngaihtuah ru nauh nauh a.


Chutia ngawi renga kan ṭhut hnu leh ka nu kal liam hnu chuan ka pa chuan a sawi tum tak chu a rawn ṭhet ṭan ta a.


" Valte, tuna i bialnu hi ṭhen dawn ta ang la, i na viau ang em maw chu?" a rawn tichhuak phawng mai a.


Pa, engati nge?


" Engtidang vak ni lo ve, thawnthu sei tak sawi tur a awm a ni, nang chu i la.pian ve loh avangin engmah i hre hman lo va; thiam lohna lah i nei hek lo, mahse i theih hram chuan Thangtei hi ṭhen la ka ti khawp mai thung a.

I ngaihthlak peih dawn chuan ka hrilh ang che,".


E khai, pa sawi ta che, ngaithla peih lutuk e, kimchang deuhin min hrilh law law dawn nia ka lo ti thuai a.


Ka pa hi pa zaidam tak mai leh ṭawng tam vak lo a ni roh va, a tih tawh vek erawh hlen chhuah tum bur mai mi a ni thung a. A thinrim zen zen lo va, a thinrim ve tawhna erawh thinrimna âwm tak leh thinrim tak a ni thung a, zaidam thin thawk an tih ang deuh hian a thinrim chu nasa ve tak a ni thung ṭhin.


" Khai aw Valte, lo ngaithla rawh le, ka han sawi mah ang e aw,"


Pa ka inpeih e.


" Hman lai ti ve tawh mai ila, rambuai lai thil daih aṭangin ka ṭan teh ang, a sei deuh dawn a, a karah zawhna i neih chuan min lo zawt dawn nia; ka'n sawi zar zar tawh ang e.


Kan unau hi mipa pa 2 leh hmeichhia pa 2 chauh kan ni a, i pi leh pu hian min damreipui vak lo bawk nen, unau inhmangaih tak mai kan ni bawk a, rin lawk loh tak maiin a naupang zawk kei chuan nupui ka nei hmasa ve tlat mai a.


Dan khatnaa neih duh viau mah ila, kei a nau zawk ka nih mai bakah i nu hi an unau hmeichhe pathum zingah a naupang ber a lo ni ve zel nen; inruk mai loh kha chuan ka palai te kha an beidawng ve tlat tawh si a ni.


Aw le, ka u chiah mipa chu Ramhnuai sipai(mizo sipai)ah kal a duh ve tlat mai si a, kan khap viau nachungin khap beh tak tak theih a ni bik si lo; kan phal lo chung chuan a zawm ve ta poh a.


Hun enge maw chen chu pangngai taka nung chho vin, kan khaw lam an rawn hnaih chang pawhin an lo haw ve mai ṭhin a, mahse a lo rei a, India sipai lam an hrohrang a chhe tawlh tawlh mai nen, a buaithlak ta fu reng mai a; ka u (Tekawnga kan ti zel tawh ang tm.) te pawh chu an lo haw hlei thei ta lo va, hun rei tak chu kan inhmu lo ta vang vang mai a ni.


Kan upa ber hmeichhia leh ka nau chiah hmeichhia tho chuan pasal fanau neiin inhrang an chang ve ve tawh a, mipa pianpui ka neih chhun a nih bakah ka u hian min ngaihtuah thei bawk si nen; ka.ngaiin ka ngaihtuah ṭhin tak zet a ni.


Chutih lai karah kan khuaah ngei pawh chuan Vai ho an hrângin Curfew leh eng engemaw a tam em em mai a, hmeichhe pawngsual leh chhungkaw pa ber khawm lah an sim duh der mai si lo; an duh zawng emaw leh rinhlelh zawng te lah ramtuileilo khawpa sawisak an tîm der lo lehnghal nen; nunphung hi a khaihlakin a ralṭit thlak thei khawp mai.


Chuti mai pawh chu duh tawk lo chuan khaw khawm an ching chho va, kan mizopui te ngei chuan min phatsanin, Kawktu-ah an ṭang vei rawl nen, kawktu ho hi an chimawmin an tawrhhlelhawm tak zet a; khawtinah an inhung fer fur mai bawk si...,"


Ka pa, eng nge Kawktu i tih chu? tiin a thusawi lai chu ka lo pawtchat lawk a.


" E a ni dawn tak e Valte, khaw khatah kawktu pakhat emaw an awm ṭhin a, a ṭhenah chuan khaw hnih/thum leh a aia tam te pawh huapin an awm bawk ṭhin.

Mahni mizopui leh khua leh tui phatsanin Vai lamah an ṭang a, India sipai ho khan Ramhnuai sipai leh sipai lo hre vak hek lo le, kha kawktu khan mahni khua leh a vela ramhnuai sipaia ṭang chu a lo hre nasa ṭhin si a; ṭawng lem lo a a kawh tawp pawhin thihna khawp chu a tling ngei ngei ṭhin a ni.


Mipui awmkhawm zinga mi a duh duh kha a kawk tawp a, chu chu sipai ho lah khan ihe lovin an mal nghauh nghauh tawh mai ṭhin a ni; a chang phei chuan Ramhnuai mi ni lem lo, anmahni hmel huat zawng tak kawh hlum pawh an ching ve zauh zauh bawk a.


Mahni hnam phatsanin tenawm taka an khawsak avang khan an dinhmun pawh a hlauhawm hle a, an hlawh pawh a ṭhain venhimna pawh an pe uluk em em ṭhin reng a ni. Mahse chutichung chuan Ramhnuai sipaiin Kawktu chiang taka an hriat chu an dahṭha hmak hmak ve zel tho va, he hna tenawm tak (kawktu) an thawh hi kawktu chhungte pawhin an hriatpui lo fo a, anmahni ngei pawhin an hna hi anzahpui ve ṭhin reng bawk a ni.


Aw le, chawlhni vawi khat chu u Tekawnga te pawh an lo haw ve mial a, kan hlimin kan lawm ngei mai. Kan Zo-ar tui lai ngat chu talhin, puar tak maiin tukṭhuan kan kil ho va, chaw eikham.lamah chuan Biak In panin kan inzui chhuak ta dam dam a. Biak In kan thleng a, inkhawm pawh kan ṭan nghal chawpchilh mai a, pawimawh dang ti zo va Sunday sikul zirtirtu hming kan lam mek lai chuan Tlangau chu a rawn au vau vau mai a.


Tumah Biak In aṭanga chhuak lo tur leh, kawngka pawh pawn lam aṭanga kalh vek tawh a nih thu te, Vai sipai an lo kal a, chu chuan an rawn check dawn thu te a rawn puang a, mipui chu kan ralkhel nasain kan ṭi hru mai bawk a; hemi ni hiann ka u te ṭhian ho pawh an rawn inkhawm ve ngei bawk si a, rilru a nuam.lo duh ngei mai.


Nakinah chuan kawngka pui chu rawn inhawngin, Vai sipai leh mizo pa hmaituam tlat mai pakhat hi an rawn lut ta nghal a, chu mizo pa chu a hawi kual ruai ruai a; chutih lai chuan ka u chu ka va en kher a, ka thawmhnaw vek a inbel avang chuan an hai hram ka beisei ru khawp mai a, amah ka u lah chu a lo ṭhu kun chal mai bawk a.


Ka u ṭhiante pawh chu pa 4 lai an awm ve tho va, mahse zâm hmel pu pawh an awm chuang miah lo mai kha a mak zawk hial ka ti. Chutah mipui chu a pawn lam hnaih bera ṭhu aṭang chuan tlar tin chu min khalh chhuak ta zel a, chu tak chu Kawktu khan ngun zet maia enin a mi duh chu a lo kawk ta chat mai ṭhin a; chu chu Vai sipai te chuan an man hmiah hmiah mai a, thu zawhfiah leh thiamthusawi engmah a awm thei ngai lo a ni.


Keini pawh a chhuak hnuhnung ber pawlah kan ṭang a, mak tak maiin ka u ṭhiante pa 3 lo chhuak chu Chu kawktu ngeiawm chuan a lo kawk ta hauh lo mai a; a hnunga lo chhuak tur ka u te pa 2 chu ngun takin kan lo thlir ṭhap mai a ni.


Chutah ka u chu thui pawh a la pen hman lo tih chuan chu kawktu tenawm chuan a kut zungchal pir vah hian a lo kawk ta va va mai a..!! Sipai ho chuan ka u Tekawnga chu an la hrang nghal hmiah mai a; a hnung chiaha a ṭhianpa lo chhuak erawh chu ṭha takin an kal tlangtir leh ang lawi bawk si a.


Mipui an khalh chhuah zawng zawng chu Biak In chhungah chuan min khalh lut leh vek a, kan ṭhu fel awrh vel ang tih chuan Biak In thlang maia Fieldah chuan silai a ri ṭhuai a, namen lo hian ka thâuah min manin ka khur zawih zawih mai a; ' ka u, ka u duhtak,' tiin ka phun sep a.


A hnu rei lo teah chuan Vai sipai pahnih hian inkhawm ho zinga mi pahnih chu rawn hruai chhuakin, fieldah chuan an chhukpui a. Biak in tukverh thlang lam chu hawn tirin mipui chu min thlir luihtir a; chutah ka u chu a kut leh ke pahnih ve ve chu phuar kawpin, chutah chuan thing tlawn an rawlh a, Vawk zawn hian a lu uai hnawp hnawp chuan an rawn zawn ta a.


An kahna hliam aṭang chuan thisen a far tluah tluah a, a lu chu a uai hnawp hnawp bawk a..." sawi zawm thei lo chuan ka pa chu a ngawi vang vang phawt a.


Ka khawngaih lutuk chuan ka pa chu ka va kuah tawp a, ngawi rengin engmah sawi lo chuan kan ṭhu dun reng a; mawi tawk tak chutia kan awm hnu chuan ka pa chu rawn inthing harh nawk nawkin:


" Valte, a na em a ni, ka u kaphlumtute ai khan kha Kawktu huaisar kha ka haw zawk, ka la chhui chhuak khawp ang, tiin tih theih dang nei si lo chuan ka insehruh ta ngawt ngawt a.


Hnawhsarum takin thlan min laih luihtir a, chawpchilh zetin ka u Tekawnga chu ṭah leh sûn vak ngam pawh ni lovin kan thlah liam ta mai a ni," a ti zawi raih a.


Ka pa rilru nat turzia chu ka hriat thiampui riairuai chauh a ni zawk ang, ka pa ka kuahna chu ka thlah a, a hmaa ka ṭhutna ngaiah chuan ka ṭhu leh a.


Ka pa, tichuan Thangtei i duh loh chhan chu tuna i sawi nen khan eng nge a inzawmna?


" A ni dawn tak e, ka rilruah a rawn thar leh nasa em a, ka lo chawl palh daih mai a nih kha, ni e Valte ka han sawi tlang law law mai ang e aw; Thangtei pa hi i hriat angin Pu Sawithanga a ni a, tin, Sawithanga pa hi tuna ka sawi zawh tak chiah KAWKTU kan tih mai Sawiluaia chu a ni e; ka u kawk hlumtu tunu nen chuan chaw bel khat inzen ṭawm ka zuam ngang rih lo a ni e.


Amah Thangtei hi chuan engmah a hre ve lovin, thiam lohna pawh a nei chuang lo va, mahse a pian leh murna hian min hnar ta a nih ber chu; Valte, i hmangaih tak nula ṭhentir che a, iai sak hrim hrim che ka ni lo a nia, min hre thiam ang tiraw," a ti ta a.


Ka rilru chu a buai map ta mai le..!


Ka pa zawk ni ta ila, kei ngei pawh hian ka pa unau thattu chu famo atan ka pawm thei hauh lo vang le, kawng leh lamah erawh chuan thiam lohna nei hauh lo Thangtein a lo tuar ve zel tur leh, a pian hma daih thilin tuna a nun a nghawng chhiatsak tur chu ka lainat em em mai bawk si a; ngaihdan fel tak pawh ka siam mai thei bik lo a ni.


Ka pa, engpawh nise, i rilru tur chu ka hre thiam lutuk e, mahse hun tlema zawng tal min pe thei ang em? I thu ka zawm lo lam ni lovin, pawisawi ve hauh lo Thangtei hrilh dan tur pawh ka van lutuk dawn a, zawi zawia thlah hret hret tum ta zawk ila a ṭha mai lo'ng maw te ka ti ta deuh a ni, ka ti chhuak ve ta phawng mai a.


Ka pa pawh chuan min hre thiam ve viau chuan ka hria a.


Ka mangang lutuk chuan ka nutei fapa, kei aia u hret, mahse kawng engkima ka biak rawn ṭhin chu ka pan ta chawt mai a. Ani pawh chuan kan boruak a lo hriat chuan khirh a ti ve hle mai bawk a.


" Khai aw Thanmawi, thil hi a lo va mak thei ngai em aw..!! Hman lai thil leh hun liam tawh daih ami emaw kan tih mai te hi, tunah kan hmuh theih leh hmuh phak rengah a lo la inchhawp chu a ni tak si a le; engpawh nise tuna tan mai chuan thurawn han pek mai tur che ka va vân hrih tak em.! Pakhat a thiam a, pakhat a dik an tih ang mai lah ni.


Ka pa Zuala(Thanmawia pa) dinhmun aṭanga ka thlir chuan dem theihna reng reng ka nei lo mai ka ti, chutiang chiahin Thangtei pawhin a pian hma thil rapthlak tak a lo thleng leh liam daih tawh chungah chuan thiam lohna lah a nei hek lo; engah nge maw nangni pahnih kher chu in lo intawn palh mai le aw," a ti vawng vawng ve ta zawk a.


Hun a lo kal zel a, kei pawh chuan Thangtei chu hlat hret hret ka tum ṭhin a, mahse a har a ni, ani lah chuan ngial ngan tak tak hian chutia ka danglam tak chhan chu min zawt awl lo va, a ruh lang rawta han sawi lah chu ka ngam bik mang bawk si lo va.



Ṭum khat chu zin khawthawng ila a ziaawm deuh mahna tiin zin chhuah ka tum ta a, ka pa leh nu pawhin min hre thiam viau mai; zingah chuan keini chu Tuipui lamah Serchhip lut turin kan kal a, kan chhuah hma chiah chuan Thangtei pawh chu Aizawl sumoa a chuang ka hmu hman hram bawk a. Ni khat thil thu-ah intiam rual ang maiin kan khua chu kan chhuahsan ta ve ve a, kei chhim lamah chhuakin ani hmar lamah a chhuak ta thung a, mahse rilru erawh hmun khatah a luang za zel tho si chu a nih hi.


Engemaw chen Serchhipa ka awm hnu chuan nuam pawh ka ti ve ta phian a, zawi zawiin Thangtei pawh ka hlat ve thei ta viauin ka inhria a; keimah pawh ka ziaawm sawt ve khawp mai.


Thla thum/li vel ka awm hnu chuan ka nu nuamsam thei lo vangin min rawn chah haw ve ta thung a. Mak tak maiin Thangtei nen chuan kan khua kan lut rual leh ta chiah mai le..!!


Hmana kawngpui âna an dawr kha a chhungten an lo chei ṭha ve leh chu niin, kei lah ka zing ni lum ai kawngpui kama kan Verandah a ka ṭhu, ka piah lama pawttu nei ang mai a ka hawi chhuak chu, kan mit leh mit chu dan rual loh hian a intawng leh ta chiah mai le.


Eng nge maw ni tak chu, chuti taka kan hun a inrual zel mai chu tiin, Thangtei dawr nghahna lam pan chuan ka phei ta nge nge a.


Khua a thlen hun leh Aizawlah eng chen nge a awm ka han zawt chu, kan chhuah ni leh luh leh ni a lo inrual chiah zel mai chu lo niin; chutia kan inbiak bawrh bawrh lai chuan ka u, ka nutei fapa kha lo kalin,


" Hei, nangni pahnih kha inkawm tawh suh u, eng nge in lo inhmuh leh vel a, in inṭhen tawh a ni lawm ni?" a rawn ti fiam chul a.


Kei lah pek chuan lo ngai kawi lui ngatin,


Inṭhen turin kan la innei lo hrim hrim, David lo inrawlh suh, i nupui tur pawh a nih loh hi, ka lo tifiam a.


Ani lah diau duh hek lo le.


" I u ten mo atan Thangtei an duh loh kha,"



Anni nupui tur a ni hleinem, keima nupui tur a nia, ani hmeichhia pasal neia inhrang chang tawh lehnghal, lo inrawlh hlek suh se, ka han ti let leh zet zawng, duh aiin ka ṭawng thui ta mah mah tih ka hriat chhuah meuh chuan ka lo sawi zo vek tawh si a le.

*********-


Hun a liama, kum a vei a, kan tum nasat poh leh Thangtei nen chuan kan inthlah thei lo ting a ni ta mai si a, engtikah mah chhungte rem tihpuina phei chuan kan innei ngai lovang tih kan hria; mahse chuti chung chuan kan inthlah thei chuang bawk si lova, huihamm, keini pahnih inhmangaihna ve hi, khua a va var lo tak em..!!



Hun a lo rei leh tak deuh hnu chuan engpawh huamin kan inru ve ta thawr mai a.


Ka nu leh pa erawh chuan min sawi rem sak chu antum lo ve chiang asin aw; keini lam chang pawh ni lovin, amah Thangtei pa te pawh chuan engmah an lo hai bik si lo va, chuvang chuan rei vak pawh kan inkawl hma chuan min pawt ṭhen leh ta nge nge zawk a.


Tu mah dem tur awm si lo hian kan rem thei bawk si lo va, ka nun chu a thimin a pik chiang ngei mai. Vanduaithlak takin chumi hnu kum.khat velah chuan ka nu leh pa pawh chuan min kalsan veleh ta bawk si nen; hringnun hi ka tan chuan a hrâng mah mah a ni.