REAL LOVE Chapter 15 by Tmawii

REAL LOVE💙


Chapter..15.


By  T mawii.



    Mit bui chuk khawpa  Thangtei  ṭap chu lainat takin ka kaitho a,  ka chhungril hi  a hrehawm vawng vawng  mai.


    A laka  ka pa rilru put dan hre miah lovin,  a pasala  pa  a nih vangin  amah iai ngawih ngawihtu  ka pa chu  hmangaih taka  ko lawm lawmin a ṭah khum chu a ni tak si a.


   Kawng leh lamah chuan ka pa  pawh  ka dem chuang reng reng  lo bawk si,  kei pawh ni ta ila,  ka unau neih chhun  nunrawng tak  leh lainatna  tel  miah lova  dawt thu leh  sumpai itna  vang  ngawta  min thah saktute chu  ka pawmzam bik hauh  hian  ka inring bik si lo a ni.


   Mahse  Pathian remruat nge ni dawn ni,  kei leh  Thangtei lah chu heti khawp hian kan inhmangaih nghet chu a ni lawi si a,  thil lo thlen dan hi  a mak  tih mai loh chu sawi tur hi  a vâng ve thlawt a ni.


   **********



    Inkai rial chungin  khaw chhung lam kan pan  ta hna  hna  a.


    Ka pi leh pu pawh chuan buai tak chungin min lo ngaihven vat bawk  a,  kan  hmel enin an hre thiam ni tur  a ni; engmah min zawt  zui hauh  lo mai.



   Tualah chuan  a tuk maia  ruai  sa  chhumna  tur  thing    chu  an lo keuh  vum thur  mai a, Vawk leh  ranpui  dang  talh tur  chu Leikapui  banah chuan  an lo  thlung  mek bawk  a,  naupang  ho chuan  Sial,  a ki a hnimhnah  thiah khah chuk  mai chu   khawchhung  lam pan chuan  an la rawn chaih luh belh bawk  a,  a khelah  chuan  tlangsam kunga  vaw taih taih  chung  chuan   an rawn haw haw lut  laih laih  mai a.



   Fatu zinga  patling  awm ho chuan  lo chhawkin,  naupang ho chu  Chithlum(Kurtai)  an lo sem diat diat  bawk  a.



   Tlai  lam  inleng  pawh  an ṭin fel ta, keini  pawh  chaw ei tur  chuan kan intintuah  ve ta nghal  a;  ka han  hawi kual chuan bawihtei  ka hmu  ta  hauh  lo mai le.!



   Mahse  chaw ei siam  zova  kan kil ṭhap lai chuan  ka putea  nupui  chuan  duat  tih hriat ngawih ngawiha  lawm pah chungin a rawn paw lut ve ta nawlh  a.


   Chaw pawh  an lo hrai puar vek tawh  zawk hi  a nia, amah lah chu  a la hlim em em zui  bawk nen,  keini  a nu leh  pa pawh  min ngen buai miah lo khawpin  a thei reuh  a; duh aiin a leng  nasa  mah mah  zawk hial a ni.


   Zanah pawh  a hrana titina  hun awm lo lekin midang  leh inleng chuangkai  an ṭhahnem a,  mut hun hma  zawng chu kan ri laih laih  reng mai  a;  lungrualna  tlangah  kan ding  tawh  bawk a, a nuam dangdai hle mai.



   Zinga  kan tho  chu  mikhual  min hmu duh an awm thu  min hrilh  pahin pawnah  min ko chhuak  a,  ka va chhuak chu  ka phu  nasain ka lawm bawk si nen, kan nu Thangtei chu  ka au  chul  mai  a ni.


    Thangtei  pu fate  rualin  nimin khan  Nuzami  te nufa   an lo kal tel ve reng  chu niin,   kan kalsan  hnu  khan  Thangtei  pu  chuan thil awmzia  engkim zawt  chhuakin  a lo va tlawh  diam mai chu niin;  kan lawmna   a va sang teh lul  em..!



    Lawmthu  sawi ni tak   chu  a lo ni ta reng mai le,  khaw  ṭhenawm te pawh  a thei thei  chu  sawm kualin  an lo kal ve nual  bawk  a,  ram hnathawh  hautak zual  zawh hnu  a ni tawh  bawk  nen,  rin ai takin  lawmthusawi  rawn  chhim  pawh  an ṭhahnem ve phian mai a,  kan ri hulh hulh   tham hial  a ni.



     Hun  serh  hman hun a rawn thlen chuan  ka pu chuan  thu sawiin,  kan lakah  ngaihdam dil pah chuan  lawmthu  a sawi bawk  a, " kan fanu  hmangaih tak  kan lo hmangaih pui  har lutuk  hi  kan thiam  lo a ni, anmahni  hnen chauha  ngaihdam  dil mai hi tawk ka ti lova,  kan khaw mipui hriatah  ka dil duh  a ni,"  a tichhuak hial ta  reng  a.



   Ni e, Mihring  damchhung  hi a tawiin  a hrehawm a,  Bible ngei pawhin,  " A reina  chu  thawhrimna, lungngaihna  hrehawmna mai, kan damchhung  nite  chhiar dan min zirtir ang che," a ti reng  a.



  Inhuat leh nghirngho reng renga  hman ral atan chuan  kan damchhung ni hi a tawi lua  reng  a ni.



   " Thinrim u la, sual erawh chu sual suh u, in thinur chu Ni-in tlakpui  suh se," a lo ti leh bawk a.


   Mihring sual ṭhin leh thinrim  ṭhin kan nih hi keini aiin Pathian min siamtu khian  a lo hrechiang em em zawk a.  Amaherawh chu  thinrim vanga  thilti buan buan lo tur leh,  kan thinrimnate paia  hre reng  lo turin min duh  bawk  a, chu chu  min lo sawi khalh sa leh diam mai  a ni.



   Keini chhungkua  pawh  chu thinrimna  leh  sualna   avang chuan  a kum akum tel  kan lo inhmelmak  titih  hial tawh  a; tuna  inremna  kan neih takah hian  a hrehawmzia  a lo lang chiang  ta chauh  a nih hi.



    Ka ti ṭhin,  naupang engmah  tisual lo leh  hre thiam pha lovin kan lo piang a, mahse  Adama sualna  khan  min lo hmakhalh  ve vek zel mai si.



   Chumi sualna  laka  kan zalenna  tur  chuan  Krista  thisen  hlu  kha   a luangchhuak ta reng  a ni.



   Chutiang bawkin keini chhung  pawh  kan thlahtute  sualna   avangin doralah  kan inchan reng  tawh  a, a hre pha  ve lo keini thleng hian chu sualna  chu tuarin min pawt  ṭhen rem rum reng  a.



   Mahse  tunah  hian chu  sual hnathawh chu  hneha  awmin, Pathian zarah inremna  kan lo nei leh ta hi  a va ropui  em.!



    Khing  a chunga  mi ho khi  kan inrem lehna  lawmthu sawi ni a  ka thusawi  ve te  an ni a, mi zawng zawngin  min lawmpuiin, keini chhung hlei  hlei  chu  a lawm  nasa sa  kan ni lehnghal nen;  tlaiah  ruai  ropui taka  ṭhehin, Changel hnah  phah chung  ngeiah  buhchangrum leh  ran lu kima  talh  sa chi hrang hrang  ngei chu puar eleuhvin kan  bar zui ta hawng hawng  hlawm a.



     Kan lawmna  ruai ṭheh  a zawh hnu rei lo te-ah  Krismass  thing phurh  a hun zui  a.



    Mas  hma ni  chuan  ruai ṭhehna  tur  Sial  chu  rawn kai hawngin,  a lo leh  a ki inkar vel zawng zawngah chuan  Tlaizawng  par  an rawn thiat  khat  chuk  mai a; hneh taka  a ki leh  a lu velah chuan hruizena  ṭawn khirh tlat chung  chuan khaw chhungah  an rawn chaih lim ta zawk zawk mai  a.


   Tun laiah chuan  ran  tih duhdahna  angin kal hial tawh mahsela,  a huna lai kha  chuan Mas  ti mas tu  a ni ve tlat si  a ni.



   Krismas  ruai  sathing  phurh te mawlh kha  a va nuam tak em.!



   Mahni  lawmnu te leh  ṭhianho  ngei khan  kan han chhuak ve a, mipa  hovin thing  fawmin, kan nula  hruaite  phur tur  kan fawmsak  mawlh mawlh  a; naupang  min zuitute put tur  tawi te tein kan tan bunsak thliah bawk  a.



   Haw kawng tluana  inchhaih leh infiam.pah zel chungin  Biak  In tual  kan  thleng  a, Nu leh  pa valai  deuh thingpui  lumtuten  Kurtai  leh thingpui  sen hâng  min lo  thlit vat bawk  a.



  Kurtai,  aw Kurtai, hnahthiala  fun ngei mai kha  hihii.



   A tia lawm,  kan khaw  tlangau  Pu Chawikima  a rawn au lauh lauha:


    " Khaih khaih  khaih,   zaninah  YMA Social  tur  a ni a,  fiamthu thiam Pu Lianthanga  leh  Pu Chalrikhuma  te  an che ang  a,  chumi zawh chuan  Rihkhawdar  Kurtai, Hnahthiala  fun ngat  kan sem  lehnghal  dawn  a ni.


   YMA  member zawng zawng  kal vek tur  a ni a, a kal lo chu  Kurtai chân  in ni mai,"  anti ngeiah  hahaa.



   Krismas  tlaivar  zan  a ni a.



   Mas  thlen Inah  Khuangpui leh  Khuangte  chumchilhin, puankawp  sawr ang  tluk tluk  maiin an zai  a.



   A piah deuh  In remchangah  ṭhalai ho khan  lengkhawm ho ei tur  chhangban  kan kang  ṭeuh mai bawk  a,  zanlai  rilṭam hun taka  sem hman loh mawlh  kha  kan hlau  a ni.



    Zan lai  chhang  kan sem zo, lengkhawm  kan zai leh  hma  si chuan   kan  khaw  lu tlangah  chuan   Êng  zet maia  rawn êng  thutin,  chu êng  nasa  tak mai  a reh rual chiah mai chuan  zaipawl  thiam lutuk mai hian:




    " Zantlai khawthiang karah,
     Muangten zanmu an chhing..."  an rawn ti thangkhawk rawih rawih  mai zawng, Mas  hi  a ni bik ngawih ngawih mai hian  kan hria a;  Isua pian zana  Van zaipawlte pawh  min hriat  chhuah  tir rum rum mai zu nia.


    Naupang ho phei chuan Van zaipawlah riak ngaiin, an ngai ropui  ngei mai.



     Khang hun lai kha  a va ngaihawm ta em.!  Tunah chuan  changkanna  a sang ta a, rimawi leh chhepchher tinreng nen,  a ṭul love kan tihna  lam ni lovin, khang hun laia  Ṭingṭang leh  mahni  awrawl  hlang tawp  maia, hrawk phiar ṭawng ṭawng  khawpa  kan  zai ṭhin tluk  kha  a awm leh  thei ta meuh lo ni berin ka hria.



   Chutih karah  tunlai kan zaithiam ṭhenkhat  phei hi chu,  anmahni  lan mawi loh  hlauvin,  a thlukah  vala  kan buai ta mai ni hian a lang a, kan fak leh sak chhan ber aiin, no nalh loh leh mawi loh  kan hlauh luatah  kan zai ṭha hlei thei lo ni ta zawk hialin ka lo hre ve ṭhin.


   Zaithiam kan selna  ngawr ngawr ni lovin, kan inbih chian nan  zawk  aw.



   Vawi khat chu  ka Putea  hovin  hla  kan zir a,  hlapui  kan tih mai ṭhin zinga  mi:


   " Lalberte Lal ber...,"  tih kha  kan zir a,  kan sak zelnaah khan  Hosana  tih kha  a rang leh muang  sak hun  a awm bawk  a.


   Hosana  muang deuha  vawihnih  kan sak hnu-ah  a rang hun a lo thleng thut  a,  ka putea  zunram thiar lo lutin min rawn zawm chiah  bawk  a.


  Thluk fân tura  a ngaih kha  a lo rang ta si nen,  thum fiah deuh  mai hian  a hruaitu ber  chuan,


 " Ho-na,"   anti bawng hut mai a, hahaa.


    Mas leh Kumthar te kan hmang zo ta bawk  a, keini chhung pawh  Zopui  lam pana  hawn  kan tum ve ta a.



   Kan cham chhung khan  ka putea  te nupa  chuan  ka nupui  man leh mual pawh, nu leh pa chan changin min tihfel sak  thlap tawh  a;   keia  uang lah chuan,


  Tunah chuan ka nupui tak tak i ni ta e, ka'n ti zauh  pek  a.



  Thangtei chuan lo haw derin,


    " A hma  zawng zawng khan  i nupui lem em ni ka nih?"  a rawn ti let  ve hlak bawk  a.



   Chutah  ka putea  chu rawn inrawlh vatin:


   " Inhau s'u,  in la inkawm leh duh ang  asin,"  a rawn tih chuan  kan vai nuih  zo ta  a.



   Min chelhin min uider ve viau  hlawm  a, a lawmawm hle mai, mahse  a hmingin hna   thawh lai nei  kan ni bawk si a, kan haw  lo thei bik si lo  a ni.


   Kan kal  dawn chuan  ka putea  fapa  tleirawl ve ak ak tawh chuan  min thlah  a tum  a, Tharzela  lah chu  hmuh ṭha hmu ang maiin a lo inrawlh  ve sek lehnghal  a.



    Thangtei chuan  mei nei deuh hlek  hian  a fiam zauh  pek  a.


   " Mama  pui hi  Nutei  kha  i hmu  leh chak  a ni hrim hrim, nula  dang i rim bawk si lo va, kan khua  a kal i phur  thei riau mai,"  a ti zauh  mai a.


   Tharzela  chuan rum tawka  melh nghek pahin:


   " I ṭawng thei mai  e a,"  a lo ti bak hluk  ringawt  a.




    A tawi chuan min hau leh mai rawh u aw...ka chhang kan loh zan  ve  nih hi.hihii

Real love chapter 13 by Tmawii

REAL LOVE💙


Chapter...13.


By    Tmawii.



    Kan zuk thlen chuan  Thlam lamah  an lo inkuah phei tawh a.


   Lawmsanga  pawh  rilru inthlahrung  em emin   anmahni riahna  lamah   a kal tawh bawk a,  amah chuan engmah sawi lo mahse,  a mizia  danglam nasat  em avang chuan  enge maw  dik lo  a awm  a nih chu  a riahpui turte chuan  an lo ring thiam vek mai a.



   Nute-in min han hmu chu  a lung  rawn chhe thar lehin,  a u Maka  chu  a kuah thlawp  a,  a ṭap leh ta char char  mai  a;  chuti taka  kan farnu  lungchhia  chuan  min ti  hrilhhai ngei mai,  Nu Buangi lah chu  thinrim leh  lungchhe  inpawlh  bawk nen, tawt  tih hriat zet  hian a lo thaw hrawih hrawih  mai bawk  a.



  Rei mawi tawk tak chutiang boruak ippik churh maiin min chiah  hnu chuan,  Nutei pawh  chu  a lungchhe zual chu ziaawmin  a rawn meng sen  ram mai a,  Nu Buangi pawh  rawn inthing harhin,  Maka  nena  kan hamhaih  lutuk  chu  min rawn  hmu ve ta chiah a.


   He mi ṭum hian  Nutei hi  an ri te lova  riah  ve lawk  tum a ni a,  an lo bul mai  a nih bakah  riak ve dang  an awm nual  avang leh, Lawmsanga  nen hian  an inlawm bawk  a vangin;  engmah  hlauhthawn nei lovin a riak lut ve kha  a ni a.


   A hmangaih em em leh  amah  hmangaih ve tu ni a a hriat, Lawmsanga , amah  thlamuantu tur  berin hetia  a lo ti ta mai  hi  a hre thiam thei lo va,  a rilru  natna  pawh  a thuah hnih/thum  hle reng  a ni.


   Nu Buangin  an boruak tawn  zualpui  a sawi zawh chuan  Maka  chu a inhum sek nasa  ta mai  a,  kei pawh  chuti  ve bawk;  mahse  nu Buangi  chuan  min lo khap daiin, 


   " Eng pawh  nise, in lam i pan phawt ang u, Nutei hian kawng kal a zuam chuan,  sawta  a riah thawmhnaw leh  mamawh  chu nidanga  lak atan dah mai ila, ' Nute,  i zuam em  haw chhoh chu,'  zawi muangin kal  chho ila  a ṭha zawk ang e,"  a ti a.


   Keini  pawh chuan  ṭha zawka  kan hriat  avangin  kan insiam a, haw tur chuan  kan kal ta nghal  a ni mai  a.


    Zawi awia kal zelin, leng  hawn ar khuan velah chuan  in kan thleng ve ta a.


    Nutei pawh rin aiin a pachang viau a,  a zahthlak tih thu mai loh chu  a tlawm miau loh avangin  atan tak pawh  a tuar a zia ngei  kan beisei  reng  a ni.


   Kawng lehlamah erawh chuan rilru chu a na lo thei dawn lo va, a hmangaih leh duh ve em em, chu chen a lo zui ve tawhin  a chunga  a thiltih duh dan hian   a tina lo thei bik dawn lo a ni.



    Engtia tih nge i duh ber  Nute? 


   " Â..! Ka hre mai lo zawk mang e,  u leh nu  ka la nei che u a,  ṭha intih angin ti mai u la, in tih dan dan ka pawm vek mai ang,"


   Nu Buangi chu lo ṭawng  chhuakin,


   " Ni e, Nutei hi chu hmeichhia-ah pawh  nû tak mai a la ni leh chhawnga, amah chuan eng ro mah hi a rel kaw lovang ka ring.


    Engpawh nise, anmahni Lawmsanga  te rawn len dan a zir te pawh ni ve se la, zanin rum rum a an lo len loh pawhin, an lo leng ve ngei turah chuan i ngai ang u;  amah  Lawmsanga  tak pawhin hrehawm tiin  a zak ve khawp ang  le.


   Hman hmawh rum rum theih  pawh niin ka hre lo kei chuan," a ti charh charh  a.


    Nu ber  a nih ang chiah  hian a rilru pawh hi a puitlinga, rilru fim leh thiang  hman  a ṭul hunah  chiah  hian  a puitlinzia  hi  a lo lang chhuak leh ṭhin a ni.



     Zanah chuan  Inpuiah  chuan kan awm khawm vek a, keini chhung  pawh  kan  riak nghal dawn  a,  naupang leh  a ṭhen chu  mut tuma  an intintuah lai chuan  kan kawngka pui chu an rawn kik kauh kauh  a.



   " Lo leng rawh u,"


   Chu zan tlai tawh lam  takah chuan  kan  tum loh deuhin  Lawmsanga  hmel bui chur mai  leh  a nu leh  a putea  chu  kan hmu hlawl mai  a.


     Lawmsanga  te lo luh veleh  chuan  Nutei chu  Pindanah  chuan  a tlan lut vat bawk a,  chu ringawt  pawh chu  Lawmsanga  tan chuan  a na  tham ve hle-in ka ring  a;  a hmel en ringawt pawhin a thiltih sual chu  a tuar nasa  hle  tih  a hriat reng  mai.


    Lawmsanga  nu chuan  thu hmawr  rawn keu hawngin,

 Ngaihdam  pawh  kan dil ngam lo a, kan beisei hek lo, engtia  min tih nge induh  kan rawn ngaichang tawp mai che u a ni e,"  a ti tawl mai a.


    Lawmsanga  Putea pawhin pawmpui tih hriat takin  a lu  a lo bu nghat nghat  bawk  a;  Lawmsanga  ber chu  thim.lam hawiin a la  ṭhu kun chal  mai a.  Tlangval a pumpa  a ṭap tih hriat zet mai hian  a rawn insut ri leh hrawih ṭhin  a,  chutah  a theihna  zawng zawng  sawm khawm hian  a rawn inher  a;  Maka  ke chu  a rawn vuan tawp mai  a ni.


    Engmah  a sawi chhuak thei lo achha  chu  a ni e.


   Harsa  taka rawn ṭawng  chhuak hram hramin:


   " U Makthang, i duh dan danin min ti rawh, ka thiam lo a ni, mahse  Nutei  chân hi  ka hlau em a ni;  khawngaihin min neihtir hram rawh u,"  a rawn ti a, a insut zui  hlawp hlawp  a.


   Mipa  hetiang taka  atlawm ta mai chu  ka lo khawngaih letling  hle  nghe nghe  a.



    Mipa  leh hmeichhia  a fala  kan han awm hi chuan,  kan duh dan lo taka  awm hi a awl em reng  lah tak a;  Pathianin  min siam phung, mipa  leh hmeichhia  inhip tawn tura  a duan  kha  kan ni miau si  a le.!




    Maka  pawh chuan  tih vak ngaihna  a hriat hmel loh  khawp mai a,  a mitmeng  chuan  a nu leh  kei chu  min rawn rawn zauh  bawk  a, sawi chhuah  mai tur  a haihchham  a nih  ve hmel khawp mai. 


   Nakinah chuan  Maka  chu  rawn ṭawng chhuakin:



    "  A pawi khawp mai  Lawmsang,  mahse  ngaihṭha  tak  khan  lo awm phawt  mai u la,  chhungkua  inbe rawnin, amah  Nutei  ngei pawh  kan lo  be ve ang a;  chanchin kan  inhrilh  leh  dawn nia,"  a ti  chhuak ve ta  phawng  mai a.




*****----******



     " Ni e, tunah mai chuan  thu han  pawhchah  ngaihna  pawh  kan hre rih  lo va,  in thiltih dik loh hria leh, palai midang hmel pawh  hmu lo va, nangmahni  chhung ngei hmel  kan hmu  pawh hi  kan tan a lawmawm  nasa  a nia;  ngaihngam deuh  khan  lo awm phawt  mai rawh  u," Nu Buangi chuan  a ti charh charh  bawk  a.



   Thu mum nei vak lo chuan Lawmsanga  te pawh chu  an haw  ve leh ta phawt a.



   Keini chhung  pawh mut zai relin,  Thangtei chu  Nu Buangi  bulah  a mu  a,  a mang lam thlengin  a thil tawn chuan  a nghawng  zel ni tur a ni;   a muhil lai chu  a   a phu leh  awn awn ṭhin a,  a chang leh a rak deuh  ṭhat ṭhat  ṭhin bawk  a.


 
    Eng  ṭha vak lo hnuaiah  chuan Nu Buangi  chuan  a fanu hmel chu a thlir  vang vang  a,  a mit  aṭanga  mittui  lo luang chhuak  ngiah ngiah  mai, a hmaia  luangthla  zel chuan  a muthilh  ve chhung pawhin a  thlamuang  lo  tih  a lantir  chiang  hle  hian a hria  a.


   Nghet taka  kuah  chialin   a kut  leh lam chuan  a hmai hliahtu   a sam chhawlleng  awm niaih  mai chu  a huikian sak hliau hliau  bawk  a.



    Nutei  rawn au deuh  ṭhat chuan  keini  pawh  mut hmunah  kan hawi  phei  nghal vat  zel  bawk  a, mahse  Nu Buangi  chuan:



   " Engmah  buaipui ngai a awm lo a nia, tui tak  leh  hahdam tak khan  muthilh  tum zawk rawh u;  a ṭul chuan  ka rawn kaitho  mai ang che u,"  a tih tlat avang chuan  kan mutsan leh ta nghal  a.



   Zingah dam tlang takin kan tho va, Nutei pawh  mit bui lak chungin a rawn tho ve chat chat  a, a taksa  na leh silawng  tih mai loh chu  vanneihthlak takin khawih  chhiat a ni lo hlauh  a, chu chuan  rilru  na lutuk tur pawh a ti ziaawm letling  phian a, mahse  a ni ang nula  naupang tan chuan a zahthlakin  a mualpho thlak ve tham fe tho ang chu.



    Zing  lamah chuan la hma  ang reng takah  Lawmsanga  palai te leh  a nu hmel chu  an  lo lang  lehnghal zat a.



   An inngaihtlawm dan leh  inhuam dan aṭang ngawt pawhin lo  sual khum chiam  a rem thei tlat lo mai a, bakah  Nutei nen pawh  lo inzui ve reng tawh  an la nihzui bakah, Nutei hian  a la duh phawt chuan  tihtak meuhin  Mo atan  an duh nghal bawk  si a.



   Mahse  Nutei hi  a u Maka  nen kan zawt tawh a, engtikawng  mahin  amah  tihchhiata  a thianghlimna  a hun hmaa  thliah  bawrhban sak duhtu  hi  a duh tawh loh  thu  a sawi  tlang vek tawh a ni.


    Chutia  Nutei berin a duh tak si lovah  chuan  Lawmsanga  pawh  Pawngsual case  anga  kalpui  lovin, ṭha tak chuan  kan inrem thei ta hlauh a; anni  tan pawh  a lawmawm rualin  a hmangaih ve em em Nutei  a chan phah ve thung  tur chu  a thinlung  chu  a dam kim bik hauh lovang le.


    Ama  virpilh leh thiam loh  a la ni zui chhap  nen.



**********--*-




      Hun a kal  ve zel a,  Lawmsanga  pawhin Nutei  a duhzia chu  tilang  er teh  ṭhin mahse, Nutei chu  a inlamlet thei miau si lo va;  Nutei  remtihna  thlap  zawkin  kum a lo vei  leh  meuh  chuan  amah  aia  sinior fe  mai  nuthlawi  chu, nupuiah  a nei ve ta hlawl  mai  a.



    Khaw hran daihah  an pem chhuak  a,  fanu  hlir mai  pathum  an neih  meuh  pawh chuan  Lawmsanga  chuan:


    " Aw  heng  ka fanu te hi  Nutei  nena  kan  hrin ni zawk se aw,  ka lei lawm  a kim tur a,"  a ti vawng vawng  ṭhin  an tih chu.




    Ka regular  thei lo lutuk  a, min lo hre thiam ru aw,  ka regu lo satliah  mai ni lovin,  hei hi  ka titawp  a nih  loh vek pawhin  eng nge maw chen chu  ka chawl zawk  a ngai hial mai thei  zawk a ni.  Theih veleh chhunzawm leh  kan tum ang chu.  Hna  pawimawh tak  ka nei si a.

REAL LOVE Chapter 11 by Tmawii

REAL LOVE💙


Chapter..11.


By T mawii.



Thangtei u Tharzela chu rawn ṭawng chhuakin:



" Nau zawk mah ni ula, zep lovah chuan inhmai êng zah a na ngei mai; kan thiam loh a ni e.


A bik takin kei hi a meizâng hlaptu ber ka ni nghe nghe a, keimah vanga inrem thei lo leh hei leh chen nun ralṭia siamtu che u ka nia; mahse tunah chuan kawng engkimah a ṭha lam zawnga hma latu ka ni tawh thung dawn a ni.


Hmangaihna dik tak hi a lo awm ngai a nih chuan, tuna ka nau te pahnih inhmangaihna ngei hi a ni ang, inpahnih hian min ngaidam mawlh teh u," a ti ta duah a.



Engmah ngaihdam ngai in awm lo ve, keini pahnih pawh hi kan thiam vek bik chuang hleinem, nasa takin kan timangang che u a, rilru hah mai bakah keimahni vangin tha leh zung tam tak insêng ral bawk si a; eng pawh nise, i inngaidam tawn phawt mai ang u aw.



Tharzela bawk chu rawn ṭawng lehin:


" Han cham hahdam deuh ila, chumi zawh chuan kan khua chu kan pan mai dawn nia, ka nu leh pa pawhin an lo hmu chak dawn em che u asin, an tar ve tawh bawk nen," a ti barh barh a.


Hei zawng Valtea tan chhan a nuam.lovang, keiman ka lo chhang ang e Thangtei chuan a rawn ti zet a.


Valtea hi hetah hian Zirtirtu a ni ve tawh si a, chuti mai chuan kan hman lovang Mama, rawn kal chu kan chak ve teh meuh mai, mahse sikul chawlh lai te a nih loh chuan, duhsak taka he hna thawk tura latute an hmaizahawm lutuk ang e,"



" A ni dawn tak maw, hetah hna zahawm tak inthawk tih kan lo hre lo a nih chu, a dam hauh ila, remchang chu a la awm leh em em ang," Pu Zorama chuan a lo ti ve bauh a.



Ni e, Sikul chawlh lamah kan rawn tum ve dawn nia, tun atan chuan Sikul kan lut leh tawh bawk nen, dam taka kan inhmu thei hi lawm phawt ila; ka pi leh pu chu min rawn biak ang a, Mas leh Kumthar hmang turin kan rawn zin kan tum dawn nia, ka ti thla ve ta ngawt a.


Ka sawi lai pawh chuan kan nu chu ka va melh pah zauh a, ani lah chu a lo bu vei nghat nghat ringawt a; Thangtei hi chuan min chawimawi thiam teh e.



Chutah Thangtei u Tharzela chuan:


" Thanmawi, lo zin chauh maw? Lo haw intum tawh nange, lo haw ve tawh ula, chhungkua han awmkhawm a, a thlum a al eizaa han khawsak ho pawh kan chak tawh asin le.


Nang lahin lo zin i tum chauh mai si a, ka va duh khawp lo tak em.!"


Ni e, Khuanu zarah dam ila, a hawn te pawh kan la rawn haw ve ang chu, mahse tuna heta hna kan neih chhung hi chuan khaw danga han pem sawn chi pawh kan nih rih loh hi, kan hma hun hi engmah sawi lawk chiam theih a ni lo ve.


Nakinah chuan duh lo teh mah ila, kan la rawn fin buai fe che u pawh a la ṭul leh tho maithei asin; inngeih leh lungrual takin i awm phawt mai ang u.



Kan damchhung tawite hi inhmangaiha induhsak tawn nan hmang ila, innghirngho leh inhuat nan chuan mihring damchhung hi a tawi si a; i hmang ṭha hram hram ang u, ka ti ve ta duah a.



Tui taka mu-in zingah kan tho leh a, rei tak mut pawh tum ila, bawihtei hi mut rei a thei thlawt si lo va, a nu emaw kei zawkin emaw thawhpui hi angai ngei ngei ṭhin.


Kan chhuat zin te-ah chuan a pute pahnih chu an mu ve mai a, an tawi vak lo dun si a, an khat khup a; bawihtei tan han ninhlei ngaihna pawh a awm lo.


Ka rin loh tak maiin zing lam eirek hma fe chuan Maka a lo lang hlawl mai a,


" Ṭhianpa, ' tukin chu Inpui lamah kan vaiin chaw ei ang u hmiang, ka nu'n a ti a,' ṭukṭhuan ei in rel hmain ka rawn khalh ta mai che u a nih hi," a rawn tinghal bawrh bawrh a.


Kan mikhual te pawh an la tho si lo va, Maka ka lo tawng fuh hi chu kan tan an hlutna hi a zual deuh deuh mai a nih hi.


Khai, Maka nu hming ka lo la sawi reng reng hleinem le.!


A hming tak chu Lalhlimthangi niin, amah hi a ngo paw vah mai a, a vun rawng ngo em vang hian a balh ve lai pawh hian a lang faiin a buang vah zel mai a; chuvang chuan a hming tak aiin mi kohna ' Buangi/Nubuangi,' tih hian a lar ta zek zawk a, amah lah hian a inhmeh em em mai lehnghal vei nen.



Ka nu Buangi rilru zau leh puitling tak mai, zaidam dap mai leh, a ṭul huna awrawl vin hauh si lova tiṭhak zel mai si hian min uap hneh ngei mai.



A fanu te ber Nutei thla 4 lek a nih hian Maka pa hian nat lawk em em nei lovin a thihsan thut mai a, mahse chu vanduaina chuan Nu Buangi pachanzia leh puitlinzia a rawn pho lang ta zawk a ni.


Pa uap loh chhungkua tih hriat miah loh khawpin a fanaute a kilkawi hneh a, taimak lam thu chu khi tah...a hma lamah kan sawi tawh kha.


Thangtei pawh ei rel vel pui turin a kal phei vat a, kei pawh Sikul kal nghal turin ka insiam sa thlap bawk a.


Tukṭhuan ei hun hma fe chuan kan in chu chhuahsanin, kawngka pui chu Thingfak pakhatin kan do rân mai a; ngaihṭha em em chuan kan kalsan ta a ni.



Inpui kan va thleng chu an lo la buai laih laih hle mai a, mipa ho leh Nu Buangi chu zing nilum ai pahin Leikapuiah chuan kan ṭhu khawm laih a, kan titi pah malh malh bawk a.


Nutei chuan nau awmin, a u te pahnih chuan ei an rel ve thung a; kan indaih ang reng phian mai.



Kan khaw hlui lam chanchin chu Pu Rama chuan a rawn sawi chhuak a, Thangtei nu leh pa a rawn sawi chuan Nu Buangi chuan a lo hre ve reng mai a. Mahse a hriat dan erawh chu a sawi chuang lem lo va.



Chu chu Tharzela lawmah a lo tla ve tumhrang a, dik tak chuan an thlahtute chanchin sawi a, anpu ber han sawi thlen hi a nuam lovin, a chhuanawm lo ve em mai lah tak a; an lo zak ve ṭhin a ni.



Nu Buangi erawh chuan sawi tur chin a hre hle mai thung a, angaihawm lai leh mawi lai zel sawi kaiin, ka nu leh pa erawh Maka ka aṭangin hmanah a lo hre ve tawh thung a ni.



" Chaw ei kan peih tawh e,"



Inchhung lam aṭanga an rawn tih chuan kan tho sang sang a, inchhungah chuan kan inzui lut ta dial a.



Nu ber a ṭawngṭai zawh chuan kan kil tlang ta far a.



Alluminium thleng bial karh maiah chuan Zo buh hlang ngat mai, rum lampang lek lek a chhum chu an rawn khawrh khu vang vang a.


Thangtei chuan chaw thleng pathum chu siam hmasain, naupang pathum tan chuan a dah hrang ta ngat a,(Nutei hi naupang ang maiin kan la en vek hlawm vang a ni.)




Khuh hriang lian ṭha hemhawmah Artui lai sa ngei mai, buh tlem te kawi vak lova thlak chu kan suak khu hlat hlat mai a.


Maian bai leh Anṭam tlak nen, In bul chuktuah huan a purun pum.leh Pudina hnah rawt pawlh rim rawn nam vang vang mai karah chuan, hmarcha hring rawt rim chuan a rawn pawlh chiat mai bawk a.


Pu Rama chuan,


" E khai, a hu-ah patling kan puar mai dawn alawm le, kan khuaa in lo kal hun chuan Vawk talhsak ngei che u kan ba a nih hi," a ti kamṭha luam a.



Nutei nau awm pahnih lah chuan inchhungah an rawn luhsan tak avangin amah chuan a awm ran mai a.



" Nute, hetah ka bulah hian rawn kil ve daih rawh, i nau awmte hi an phakar em mai," tiin Thangtei chuan a sawm a.



Nutei pawh chu a rawn ṭhu ve mai bawk a.



Mahse a hawi chhuak ngam meuh lo tluk a ni e.



Chutih nakalai chuan Tharzela phawk a chhuak pek a.


Zak chung chunga Nutei Ar khel suah lai chu a va suah ṭawm chat mai a.!


Chutih pah chuan amah Tharzela zawk chuan:


" Ka nu, kan mikhualin ka sa suah tur min lak khalh," nui duh hauh lo chuan a rawn tizui ta mai a.



Nutei zak leh hrilhhai bawk si chu a sen ṭan ṭan a, Thangtei chuan a u chu a va melh vak ringawt a.



Chutah Maka chu za fe mai hian a rawn nui chhuak ta hawk hawk a, midang pawh chu kan nui zo ve ta vek a.



Thangtei u Tharzela hi tlangval ṭawng tlem tak mai leh a ruka phawk viau si hi a ni roh va, amah kawm chiang tawh laklawh chuan an thlah leh ngai mang mang lo a ni.


Amaherawh chu a mizia hriatchian hma chuan kawmngeih a har ngang mai thung a, a ngamtlak sa fe lo hi chu a be hmasa mai mai ngai lo thung a ni.



Alluminium thleng leh fian a chhuak ve tawh a, chutiang chu nei ve tho mahse, mahni hman ṭhan tih takah maufian kan la kawl fur bawk a; hemi ṭuma chaw kan ei pawh hian maufian ngat kan hmang a ni.



Chaw eikham chuan kei leh Maka chu Sikul kal tur chuan kan insiam nghal a, kei phei chu insiam sa ka ni zawk a.


Kan chhuak tur chu Thangtei chuan min rawn au ṭhat a.



Ka ke pen lai khai va va chunga ka ding chu min nuih tat tat hlawm a, Thangtei lo kal thlen chuan ka Kamis hak lai nghawng chu a rawn khawih niah niah a; a nghawng ka lo pawt chhuak kim lo chu niin, nupui fel neih manah naupang hovin min nuih loh phah dawn ta a nih hi.


Lawmthu sawi nan a biangah ka lo piaisak zeuh a, ani zak lah chu a sen ṭan ṭan thung a.


Ka uan a chhuak thut pek a, kan nu chu va pawt let lehin kan vaia hriat tur ngei chuan:


" Thangkhiu," ka'n ti ngei a.


Ani lah lo ngawi duh bik hek suh:


" Thankhiu a rawn ti ve ta ngat a.


Kan vai nuih ta tlawrh tlawrh a.


Chutihlai chuan ka fanu chu lo tlan bap bapin:


" Papa, Papa a rawn ti lauh lauh a.


Ka bul a rawn tlan thlen chuan ka kaihzaah a uai chat a, min rawn chhoh melh ta kar mai a; sawi duh nei la sawi thei si lo khan a mitmengin kal ve min dil ni ngei tur a ni.


Thangtei chu lo tlan vatin Bawihtei chu a rawn la mai dawn a, ani lah chu a lo ṭap ta ṭhat ṭhat a.



Kan net chhe lutuk vangin zan 2 lai ka'n awl chu a, inhmaizahawm viau rualin kei pawhin ka hun ka ui hle mai.


Story Competition ami tur ka type mek bawk a. Ṭan a na ṭiah ṭiah hahaaa.

REAL LOVE Chapter 12 by Tmawii

REAL LOVE💙


Chapter..12.


By.. T mawii.




      Chaw hma  lam  Class  kan lak zawh  chuan  in lamah  thingpui in turin  kan haw  zawk  a.


   Eng  mah  dang  sawi  lovin ka  fanu chu ka zawng  vat a,  ni a la vui  zawh loh  avangin  khumah  a lo muhil  ngat  mai  a.


       Chaw hnu  kan kal  leh thleng chuan  a rawn harh ta hrih  lo va. 


   He mi kar tawp lamah  hian  pu Zorama  leh  Tharzela  pawh chu  an haw  ve ta  bawk  a.


     Mahni hnaah  tui leh  ṭul taka  inpe-in,  ṭhahnem ngai zet maiin  kan  thawk a, zirtirtu  kan  indaih  vak lo bawk  nen,  kan hah ve ṭhin khawp  mai.



   Chutianga  hun  kan hman  chhoh  zel  lai chuan  tlai  khat  chu   chanchin ṭha  lo deuh  maiin min rawn deng  dawt  mai  a,  kan thin  a va  rim teh lul em.!



   Nutei  pawh  nula  ni ve tawhin,  ngaizawngtu  pawh  a nei ve nak nak  tawh  a,  amah hi  a ler lo chi  a lo ni hlauh  zawk  a,  chutih thu lovah  chuan  nula   luck  ve tak chu  a ni  e.



    Naupan  lai deuh  aṭanga  kawm ngeih em em mai  a nei  a, an in  chhak  lam  a mi,  Lawmsanga  nen hian  an inzui  hlen  ta deuh  ber  a;  Lo lamah  pawh  an inlawm  ve zak zak  ṭhin a.



   Lawmsanga  hian  a duhin  a hmangaihna  pawh  a tilang nasa  ve ṭhin hle  a,  a khawihchhiat phal loh  thu thlengin  a sawi ve nasa  ṭhin a  ni.



   He mi kum  Zopui  thlawh  hma  hi  a hlat deuh  avangin  an riak  zauh  zauh  ṭhin bawk  a.



    Nutei  te lo hi  a chung  lamah  leh  tlak deng  lamah  hian  ri nei ve  bawk mahse,  a chhuah  chhawng lamah hian  ri an nei  lo thung  a; amaherawh chu  chhuah  lamah hian  pumpelh  kawng  awmin, chu chuan  an thlam kawmchhakah chiah  tan tlangin, Vau ngaw hnuai  an luh hma  chiah hian Lui lian vak lo leh  dam deuh mai, thiang tui fe mai hi  an vat chhuak bawk a.


   Chu Lui kan chiah chuan  chhak lamah  ngaw hnuaia  chhoh  char charin  feh kawngpui  a han pawh  leh  ta  a ni.


   He mi tlai hian  Nutei pawh  riak lut turin a inphur chhuak ve a.  Nu Hlimthangi  hian  thlah pahin a fehpui  nghe nghe  a ni.


    Chhunah  chuan  a ṭhianpa  Lawmsanga  nen chuan  inlawmin  an pathum chuan  an bung dal dal  a, Nu Hlimthangi pawh hian  Lawmsanga  hi  a ring tawkin, amah  lah  a insawi rinawm thiam bawk a,  a makpa  chei  deuh tawh  nghe nghe  a ni.



   Lang haw hun chuan  nu ber chuan Anhnah  hawn turte  la-in,  haw tur chuan a insiam malh malh a,  tun lai angin Sana  han en mai tur  a la awm lo va, Ni awm dan aṭanga   hun bi  vawng hi  an tam ber reng a. 

   Hemi tlai lam hian ni  a dul deuh avangin  haw hun  an  lo hai lek lek chu niin,  Lawmsanga  leh Nutei chu  riak tur an nih  avang chuan  an la bung zui mawlh mawlh bawk a.


    Nu ber  hman hmawh  chuan,


   " Nute  ka kal  a nia aw,"



    Kar lovah  an vau ngaw  hnuaiah chuan  lutin, hmanhmawh  takin pumpelh  kawngah chuan  a chho sawk sawk  a.



   Pumpelh  kawng  a chhuah  chhoh  hma deuh si, feh  kawngpui  leh  an lo inkar chanve vel  a kal tawh ang tih  chuan:



    " Min chhan r'u, ka nu  min chhan rawh...,"  ti a au vau vau  hi  a hria  a.



   A han ngaithla  chiang  leh deuh a, thawm chu  a reh leh ang lawi si a, a han pen ṭan leh chiah tih  chuan  a ngai te bawk...



   " Min chhan r'u,  ka nu  khawiah nge i awm?"



    Chutah meuh  chuan  a fanu  mangang  aw chu  a hai ta  mawlh  lo mai,  a phur chu  a nghat lawk a,  hman hmawh  em em chuan  hah taka  a chhoh  ṭauh ṭauhnaah  chuan  a tlan  thla  ta hlawk hlawk  a.


   Au aw  lah chu  a changin  a zawi riai riai a, hup beh  niawm tak hian  a tawp  leh chawt  ṭhin bawk  a,  a thlen hnaih deuh  phei chuan  tui chu a ri leh  bawrh  ṭhin bawk  a.



    An vau lui  a hmu thei ta  maw  tih chuan  thawm dim em emin  a veh  ta  ṭhem ṭhem  mai  a.



    Lawmsangan  Nutei  a sualna  hi  an vau  lui tui  luang lai, dam deuh mai  kha  a ni a,  pumpelh  kawng  hawi lo lama  an insual  avang leh, Lawmsanga  chuan  tumah  lo kala  a rin loh avangin  Nutei  chiah chu  hlawhtlin ngei tum chuan  a lo  bei ngat ngat mai  a.


   Chutia  an lo chhung  lam hawia  engmah  dang ngaihtuah loa  Nutei  chunga  Lawmsanga  bungbu kut  mai  lu chu  a ri lawlh a,  engmah  hre  lo chuan  Nutei chung  aṭang chuan  a let thla  ta hlawl mai a.


    Nutei chu  rang takin a nu chuan  a kuah vat a, a nu awm nghengin ani  chu  a ṭap nghal  zawih zawih  mai bawk  a.


     He lui hi  thuk lo te niin,  Nutei te kha  insil fai turin  an chawl zawk  a,  chu chu  Lawmsanga  rilru  bal rawn chhuak thut  chu  insum zo lovin,  Nutei  inring  lo lai chu  a bawh ta thut  mai  a ni.



   " Lawmsang,  heti'n awm suh,  tho rawh,  a hunah chuan  kan innei ang a, ka pum hian i ta tur  tho alawm  ka nih, i uang  thei lutuk,"



    " Inneih  ka sawm ngun tawh che a, min hnial zel a nih kha, zanin hian  ka ta-ah  ka siam ang che a, kan innei nghal  dawn  a ni,"




    " A teuh lo, Pathian leh  Kohhran ho  hriatpui  thlap lo chuan  ka nei dawn lo che,  chu chu  i nghak  thei lo a nih chuan  dam chhungin  kan  inṭhen  ve thung  tawh ang,"



   " Ṭang ṭang  buai lo mai teh, au pawh  au hek suh, ka tlawm dawn  khawp che  hi,  zaninah  i bulah ka riak  nghal dawn a ni,"




   Hetiang  vel hi  an inhnialna  chu  a ni a,  vanneihthlak takin Nutei  hian  Kekawr  Batern  nei  a lo ha  hlauh  mai a,  a him phah ta bawk  a ni.



   Kan rin aia  Nu Hlimthangi  feh  a lo haw har avang chuan  Maka  nen chuan  kan  awm  a nuam chiah lo deuh  a,  khaw thim  thlenga  a lo la  thlen loh takah  phei chuan  Sihdet  kengin  ka nu hmuak tur chuan  kan  chhuak ta rawih  mai  a.



    A khat tawk chuan  Maka  nen chuan kan in au chhawk reng bawk a.


    Hmanhmawh thil a ni bawk a,  pumpelh  kawngah chuan  kan  tlan thla hlawk  hlawk  mai a, kan   thleng thla rang ang  reng hle mai.


    Lui kan chhuah hma chuan  Maka  chuan,


   " Ka nu...,"

  Keiin Nute...  ka ti vau vau bawk  a.


    Zawi tea  min rawn chhangin, lungchhe  inhnit ri faih faih hian a zui nghal zat a;  kan hman hmawh leh zual ngei mai.



    Ka hun a tawt lutuk a, dah loh aichuan tiin ka rawn vawm lut hram e.

REAL LOVE chapter 10. by Tmawii.

RREAL  LOVE 💙


Chapter..10.



By  Tmawii.



    Naute rawl vin zeta  rawn ṭap  ngak ngak chu  lawmin an nui hak  hlawm  a.


    Chutah  a theih ang anga  tifaiin  naute chu  an mut fel tir ta than a,  Thangtei pawh  chu  tui taka  muhil  ang mai hian  a ngawi chiah chiah  reng a;  zing  ni chhuah  rual chiah  chuan  Maka  nu chuan  a han sawi che dat dat  a.



   Tho phang  zeta  rawn harhin  a hawi kual  riai riai  a,  an rin loh dan takin a tho thut  a, a pen ta pawk pawk  a.



   " Khatin pen pawk pawk suh  Thangte,  i inhliamna  kan ṭhiina  kha  a septic ang  asin,"



  " Ka zun a chhuak tawh lutuk  alawm,"



   " Chu pawh nise  hniak chhiarin kal rawh, zawi te tein  i bawp kau lo thei ang ber  khan pen tum.la,"



    Chutia  a kal  zel chu  kan Darthlalang tar zawn a va  thleng a,   Darthlalangah chuan  a mah  chu  a inhmu  ta thut  mai a.



   " Valte  khu khu  tunge?.!!


     A tiang hawl lohna lama  a hmai a khawih rual chuan Darthlalanga  mi chuan a lo khawih ve ta  si a,  hlau leh  mak ti lutuk chuan:


   " Awi ka duh leh lo  Thanmawi  keimah alawm, min khuh em?"



   Khuh nang aw,  ka tan chuan i mawi ber alawm  ka khuh phal teuh lo che, ka lo ti ta tlat a.


   A nau nei sanna  leh  nau veina  kha  a vungin a hmai vel chu  a duk cher chur a, chu chu hre lovin Darthlalangah khan  a lo zuk hmu  ve chu niin;  amah leh mah pawh  inhai khawpin a lo dang lam ve reng bawk a.


    A inthiar zo  lo lut lam chu a duh lo chung  chu ka pawm nawlh a,  a mutna  khum lama  ka dah phei chuan,


   " Chu  eng rim nge? E...Sangha chhum rim a ni ngat mai,"  a ti nghal hmiah a.


   A khum bulah chuan  sangha  kut zung 2 beng awm vel hi  khuhhriang  khat thar mai hian  a lo khu vat vat mai a,  kan ṭhenawmpa  lui kalin min suah hi a lo ni a; mizo  nih hi  a nuam ṭhin mang e.


    Chutianga  keimahni tawka  kan buai ve nak nak lai chuan hun a lo kal liam ve duak duak bawk  a.



**************



    Kan naute pawh  kum khat lai a tling ve ta,  duh tak maia  a pi-in (Maka nu)a hming  a sak, *Lalduhawmi* tih chu a pu zo ngei mai.



   Kan tan chuan a mawi a, a hlimawm a,  a ṭha famkim hi a ni ringawt mai a ni,  a nu chhunin a biangsum  lah chu  a nuih zawng chauh hian a rawn lang leh kelh ṭhin a; ngaih hi  a la  hliah hliah mai a ni.



    Vawi khat chu  Duhawmi tla lai chu  kan thlir nupa  a,  a chezia leh nungchang engkim mai chuan min tihlim  a ni;  chutah a nu chu  ka rin loh lam daih hian a rawn ṭawng chhuak hlawl mai a.


   " Valte,  ka nu leh pa khan min lo va hmangaih nasa awm ve le..!!


  Bawihtei ka hmangaihzia  ka ngaihtuah hian, anni pawh khan  hetiang chiah  hian min thlir ṭhin dawn tih ka hre chhuak ve chiah a ni,"  a rawn tichhuak phawng mai a.



   Rilru chhungah  kan chhungte vei ve ṭhin mah ila,  a taka  han sawi chhuah hi kan  nei ngai lem lo va,  Thangtei thu rawn sawi chuan  ka tilru a tithar hle mai a.


   Ka u hmeichhia-in  a fa hmasa ber  a hrina, a pawm lai khan  a naute chu a thlir vang vang a, tuna  Thangtei  rawn sawi chhuah chiah kha...  a rawn  sawi ve ngei tak kha le.!


   Ka nu dam lai kha  a la ni a, ka nu khan  Tapchhaka  bai chawk hauh hauh chunga  nui var varin,


   " Um, tunah chuan  pakhat  a harh chhuak ve ta e,"  a lo tisap tak asin.


    Chutianga  kan chhungkua  chauha  kan awm a, kan hlim ve viau lai chuan  kan kawngka chu  an rawn kik kauh kauh  a.


   Rang taka thovin  kawngka  hawn pah chuan,


   " Lo leng rawh u," ka ti bawk a.



   Kawngka pawn lama ding  ka hmuh  erawh  chuan ka phu dawrh mai a, inchhung lamah  tlema  tawlh lut deuhvin  kawngka  aṭanga  an lo lut tur dal tawk chiah si chuan  ka ding dat a.


   Ka taksa  chu  a in ready nghal ṭawk ṭawk hi ni maiin ka hria,  ka kut chu  lang lo lamah ka hum ruh nasa  mai a,  ka rilru chu  a vak thui hman ngei mai le:


   " Engpawh  lo thleng se  ka hmachhawn ngei tur a ni a, ka nupui fanau te hi tu mahin ka thu lo chuan  an tawk hlek lo vang a, ka kut aṭang hian min chhuh hek lo vang,"  ka ngaihtuah kual nasa  hman ngei mai.



   Ka awmdan  dik chiah lo chu  man thiamin kan  nu Thangtei chu nau pawm chung chuan a rawn kal hnai ve a,  ka sir hnung lam  aṭanga  a rawn en  chuan, a mi hmuh te vang chuan  a rak ṭhawt a,  hlau em emin min kuah chawih chawih a.


    " Valte,  ka duh lo  a nia,  khawiah mah ka kalsan dawn lo che,  Hrangthanmawia  i nih kha  min chhan tlat ang che aw," a ti malh malh a.



   Chutianga  kan hamhaih leh  Thangtei thlaphang  hmel  a hmuh chuan  mikhual pakhat zawk chuan  rawn banin  Thangtei chu  rawn hnaih  a tum a.


   Thangtei lah chu hlau lutukin a lo ṭe tuar bawk a, a nu hlau ṭe avang chuan naute engmah hre lo chu hlauthawngin, uar zet hian  a rawn ṭap ve ta vak vak bawk a.


   Chutah  meuh chuan  mikhual te chu rawn ṭawng chhuakin, chet thawh chi a ni lo tih an man thiam ve ta a.


   " E khai  Thangte,  Thanmawi,  min hlau tawh reng reng  suh u,  hlauhawm lam ni lovin, in laka  kan tihsualte siam ṭha a, ngaihdam dil tur che u-in kan lo kal zawk  a nih hi, indam ṭha reng reng zawk em?


   Ngamthlemna  leh  tihderna  rilru kan pu lo va, thlamuang takin awm rawh u khai,"  a ti dap dap a.



   Kan mikhual te pahnih chu,  Thangtei u chiah mipa leh  a putea  an ni a;  keini chhuah dan dik tawk lo nen, tlema tlemah  kan ralkhel  nasa hman ṭep  a lo ni a.


   Chutia  ṭawngkam pangngai leh dam thlarh mai  a  rawn phuh chhuah takah chuan,  kei pawh chu ka inthlahdul ta hret hret  a,  ka lo insehruh nasa  hman  deuh a niang e; ka thaw huai ta nghe nghe  a.


   Kan lo dawnsawn dan  avang che u khan min ngaidam dawn nia,  rilru  hlauthawng renga  hun hmang ṭhin kan nihna  a lo lang chhuak leh ta  a nih hi;  kan thiam loh  a ni e, ka tichhuak ve ta a.


  Thangtei erawh  a la hlauthawng  ru deuh  tlat a, ka phen lam zel  chu a la chuh tlat mai a.


   Mahse  a u chuan lungchhe rawl lek lek hian,


   " Ka nau Thangte  min ngaidam rawh,  kan tihrehawm rei lutuk tawh che u  a ni,  Zopui khua  lam lamah  keini  min hlauh vangin in han khawsa ta chu a nia;  in inhmangaihna  kan lo hmu thiam har lutuk hi  min ngaidam rawh u.


   Thanmawi, kan thiam loh liau liau  a ni e,  kha kha  in fanu em ni?



   Ka tunu,  ka duat leh lawm pawh hlawh lovin, hei tiat i lo ni tawh maw;  ka thiam loh  a ni e bawihte  lo hnai teh ka lo pawm ang che,"  tiin a mittui rawn hnam sawk chu  a khap per sak sak  a.


    Chutah meuh chuan keini  nupa  pawh harh chhuak tawhin,  ka  pute  pahnih chu  inchhungah  ka hruai lut a,  hlim taka  in chibaiin  chanchinte kan inzawt tawn a.



   Hmeichhe lungno tih takah  Thangtei chuan  a u chu  a kuah thlawp a, a inhnit hlawp hlawp a,  ani pawh chuan lainat taka  kuahin  a lo hnem ve mawlh mawlh  bawk a.


   Zanriah  kan ei hma  a nih vangin  ei rawng chu  kan bawl belh leh a.


   Kei chu tlan chhuakin  Maka  te chhung  ka va hrilh  bawk a,  anni pawh  a hman hmasa  apiang chuan  min zui pheiin,  kan in lam chu kan pan nghal a.


    Zanriah puar taka  kan kil ho hnu chuan  Maka te chhung  pawh  an rawn thlengkim leh  reng tawh a, kan thawm hre phak ṭhenawm  hnai ho pawh  rawn chuang kaiin, kan in te tak teah chuan  kan  khat ṭha heng hawng ngei mai.



   Thangtei u hi  Tharzela  niin,  a putea  hi  Zorama  a ni thung  a.


  Pu Zorama chuan:



  " Khawinge  zanin chu ding  meuhin  thu  ka han sawi teh ang, hlim leh  dam takin chhungkua  kan inhmu  thei a, a lawmawm  em mai a,"  tiin  thu hmawr  a rawn keu  a.


   Maka  nu  chu rawn  ṭawng chhuak ve-in,


   " Ṭha lam thu  a niang chu maw?"  a lo tibauh a.


  " Ni teh lul mai e, ṭha lam thu ni e,  kan naute  chunga  inṭhatzia leh inngaihtuahzia  a tak ngeiin  kan rawn hmu a, nangni chhungkaw  chungah mawlh hian  lawmthu sawi tur  kan ngah mai ka ti,  nangmahni  vangin hei  mi ang sa angin  kan  inhmu leh  thei  a nih ber hi,"  Pu Zorama chuan  a ti let nghal zat bawk a.

REAL LOVE Chapter 9 by Tmawii

REAL  LOVE 💙


Chapter..9.


By  Tmawii.



    Kan mizo nunah hian hlimna  leh lawmna  a lo tam khawp mai le.


    Tluang takin Lo kan vat zo thei te, zum.leh hriam.kara nitin hnathawk chunga inhliam buai miah lova  kan khaw chhuak ṭhin te hi a lo va lawmawm tak em.!


    Chutah Lo kan han hal a,  a kan ṭhat chuan  kan lawm  leh em em  a,  buh leh thlai chi thlak lo hun chhovin,  keimahni tuhrah, kan kutkawih ngei mai  kan han  ei leh  nghal  thei mai te hi  a va hlu tehlul  em..!!


    Keini tak chuan Lo nei lo mah ila,  Maka  te lovah  chuan  kan  feh ve fo mai a,  Maka  nu lah chu  a faten feh lo tura  an tih chuan, a thin a la ur zawk  zawmah  a,


   " Thih hnu maha  kan thawh  tawh loh tur  hi  ka ui nen,  ka dama  ka thawh theih  phawt chuan ngawi mai teh u;  Ina  ka awm chuan ka na zo,"  a ti tlat zel mai a ni.


   A ni taka, kan nu leh pa te hun lai kha chuan thatchhia  tih thumal hi  a ri khât pharh mai asin le,  an nunah khan  thatchhia  hi a awm lo tluk  a ni ber mai.



   Nikhat ka sikul bang  Ina  ka lut chu:


   " Thanmawi, lo kal vat vat teh, ka pum a na  lutuk,"  na tuar  tih hriat  taka  rawn sawi ri chu ka hre  var a.



  Thangtei chuan min lo ko mawlh mawlh a, ka hriat theih loh avangin ka lo ei mai si lo va;  ani mangang  tawh lutuk chuan ka hming tak chuan min ko a lo nia.


    Rang lutukin pindanah chuan ka tlan lut a,  ka nupui Thangtei na tuarin kuah tur dang nei lo va khum bul chhuata ṭhinṭhi chunga, khum tlang leh Rizai vel a lo hmer ngat ngat mai chu ka khawngaih ngei mai;  amah chu ka  kuah vat a, khumah chuan ka ṭhut kaipui ta nghal a.


    Ka be mawlh mawlh a, a na  a ziawm changin min rawn chhang ṭhin a,  a khat tawk  hian  a rawn si leh hlap ṭhin bawk a.


    A la na zing lutuk lo bawk a,  keimah chu tlan chhuak lehnghalin,  Maka nu chu ka va pun ta ngawt a;  vanneihthlak tak maiin  Maka  nu chu Zopui  khaw nau chhar thiam a lo ni hlauh nghe nghe  a.



  " Thangte,  a natna  a rei tawh em?"


    " Rei lutuk lo ve,  chawhnu lam khan  chhuat nawha  inbual fai ka tum a, ka chhuat  nawt tur  han  kun rual chiah  khan  a rawn na ta  mai alawm le,"



   " Khawi maw  khumah hian  han mu la, ka theih ang angin  ka lo check  ang che aw,"  Maka  nu chuan  a tidam diai a.


    " E khai Thangte  kan vannei dawn a nih hi,  hei vawiina  tui leh  thi tlem tlem  aput i tih pawh kha  i tuiphul  a lo keh daih tawh alawm le,  zanin  leng hawn ar khuan velah chuan kan nei hman ngeiin ka ring e;  tui leh thisen inpawlha  nau vei hi chu ana bik nain, nau  an hmelṭha duh bik a nia,"  a ti siam siam a.



    Amah vek chuan, " chaw te lo ei ula, ka va ei ve zet ang e," ti a chhuah mai a tum.lai chuan Thangtei chuan,


   " Ka nu  hetah  Nutei nen hian ei ve mai rawh u, ei pawh ka rel thei lutuk ang, haw phei lo zawk mai teh u," tiin a lo chelh hlauh a.


   Kei pawh chuan,

  Ni e, ka nu, tibuai  viau che u mah ila, nangmahni lo chu tumah kan nei chuang si lo va, ka lo ti ve bauh a.


   Ani pawh chuan:

   " A ni dawn teh tak e Nute, i u Thangtei chet ngai lovin nangman ei han relsak teh tak,  khawchin leh nau chin hi chu hriat lawk theih a nih tak tak loh hi,"  a ti ve ta zawk a.


    Tlai lam Ar lawi pahin Ar chaw ka  theh lauh lauh a,

   " Chir chir chir,"
Kan Arla  tui lai  chaw rawn chuk ve den den chu  ka man thut a, engmah dang  sawi lovin ka talh ta sawt sawt a. Thangtei chu a lo nui var var  a,


   " Chawhmeh zawnna  i va hre hnai ve,"  a ti sap a.


    Thangtei pum ka nun a check leh chuan,


   " E khai, hei nau lu a lut thla vek tawh mai,  chaw ei kan hman  veleh  kan inbuatsaih  sa  vek dawn nia, Thanmawi, Lalṭin tui te kha  lo thun khat sa la a ṭha ang,  ' Nute,  nang tui lum  lo nei sa  reng bawk la, mamawh thuta  hman mai theih turin lo inring ang che u,"  a ti a.


   Amah chuan nau lai hrenna  tur  vel chu  a hrual pah mawlh mawlh  bawk a.


   Nutei chuan chaw ei a siam  malh malh a.


   Ar tui lai  kawchhunga  a tui leh tur  la awm, a kawr la chang chiang lova dup liar mai chu Nutei thlengah ka dahsak zauh a;  ani lah chu a lo lawm thiam emem mai lehnghal a.


   Kan chaw ei chanve velah chuan  Maka  te chhungkua  pawh  an pathum chuan  an rawn thleng ve chiah  bawk a,  kan ri ve laih laih mai a; kan thawm hriain kan  ṭhenawm ho  an rawn lut ve nak nak  bawk  a, kan in te tak te chu kan khat ve hmar mai a ni.



   Zanah inleng  ho an ṭin fel ta ang maw tih velah chuan  Thangtei pum pawh a rawn na zing ta malh malh khawp mai le,  karlak awm hman mang lovin a na  a,  amah pawh  a hahin  a thlan  a tla nasa  ngei mai,  san  a rawn pek chang chuan  min hmer ngawt ngawt a, a heh a pet fan fan bawk a;  chuti khawpa  na tuar  chung  si chuan hlim lo hmel leh  hrehawm ti hmel erawh  a pu duh hauh lo mai a.  Hmeichhe ho lo tuar  chhelzia  hi aw, ka ti ru nauh nauh mai a ni.


    A na tuar lo zawk keimah chu ka lo thlaphang ve em em ringawt mai a,  ka thiam tawka  hnemin  tui leh  Artui  te ka lo pe ve bawk a; theih chang se  a tuar ai chu tuar chhawk a, han san persak lawp mai ka va han chak tak em.!



    Ka nupui lu chu ka chulsak  hliau hliau a,  a sam sei ngil siau te chu  a huh  vek tawh mai bawk nen;  ka lainat tak zet a, fa neih hautakzia  leh hlutzia te ka ngaihtuah pah bawk a.


    " Thangte, ṭang fan fan rawh le, nutling  i nih kha, hei kan nei fel ṭep a nia,  le han sang fan fan teh le," tiin ka nu chuan  a fuih pah mawlh mawlh  a.


   Heh pet ruh fan fan chunga  theih tawpa  a han san leh meuh chuan  a hring chhuak ve ta hlawl mai le..!!



   " Hmeichhia  a ni,"


 Fatirah  hmeichhia  kan nei chu  ka lawm ngei mai,  mipa dang ang lo takin  fanu ka duh zawk ve tlat mai a; fa neihah hian kan thu lo viau nain, duh hi  thlan  er teh kan lo ve ziah chu a nih hi.


   " Thangte  fanu i nei e,"  Maka nun a tih chuan  Thangtei chuan a chhang ta hauh lo mai a.


    A lu chu ka han sawi deuh lak lak a, mahse  amah chuan a rawn che ta tlat lo mai a.


   Mangang zetin Maka nu chu ka va en a, ani lah chu a lo mangang ve hmel mang si lo va; Thangtei mar chu a rawn dek a:


   " Engmah hlauhthawn tur a awm loh hi, a chau tawngkhawng a thidang rih mai mai a nih hi,  rei vak lo tihian muhil se le; nakinah a rawn harh ve leh mai ang,"  a ti sam et a.



   Naute chu  lakangin a han en chiang a, a ṭap hauh lo mai tih a hriat chuan a sawisa ta vat vat a,  a kaah chuan  a fawp vak a, hnang leh eng engemaw bawlhhlawh a rawn chhuak a, naute chu a khuh barh barh a;  a letling zawnga khaiin a kephahah  tak chuan a beng  thlawrh thlawrh mai a.


    Ṭeng fe hian a rawn ṭap chhuak ta ṭak ṭak a.

Real Love chapter 8. Tmawii

REAL  LOVE💙


Chapter..8.


By   Tmawii.



    Rin aimah chuan Thangtei chuan raino chu a hua  a, chaw  haitho/chhum  hmin hlim kan ei lahin chaw rim.a nam em mai  tiin a ei thei ngai der lo va,  chaw ṭhing  lah a ei thei chuang si lo;  chaw lum dai hi  kan ei fo mai a ni hahaa.



   Mahse  amah hi  a tuarchhel ve hrim hrim  a,  a taksain a mamawh tih  a hria avangin harsa titak chungin ei leh in pawh a ti hram hram ṭhin a ni.


   " Keimah chauh ka ni tawh lo va, ka pum chhunga awm, kan fa lo piang tur tan hian engkim ka tihkep a ngai zawk tawh a ni,"  a ti mai ṭhin.



   Thla 2 vel  a vei leh chuan Thangtei pawh  engmah ngei leh huat a nei ta lo, thil ei a theih loh lai khan tlem chuan atla hniam hman deuh nain,  amah  a tuar chhel bawk a,  tlem te tak tak chauh  a ni.


   A han rai chuam chho chu  kan nu chu analh ngei mai, a nulat lai aiin a nalh daih  zawk hian ka hre nghe nghe  a.


   A ni taka, hneichhe ṭhen khat chu  nau an han pai hian  an danglam dawrh ṭhin ve reng  a ni.


   Kan ṭhenawm te monu pawh hi  a nulat lai aiin  nu a nih hnu hian  a nalh daih zawk tlat.


   Ka theih tawpin kan nu chu ka duat ve a,  a ei duh zawng leh ei chak te ka zawt awl lo va,  ka ban phak ami chu  ka laksak  kim ve viau chuan ka inhria.



    Nau a pai chin chu  a feh leh ram hna hram a thawh pawh ka phal ta lo va, chhunah chuan  kan inpui  ve ber  Maka te inah chuan lengin, Maka  nupui nen chuan  an theih leh thiam ang angin naute  thawmhnaw  tur te  an buaipui  ve malh malh  ṭhin  a; Maka  nupui  nen hian  an inrual tawkin, kawm pawh an inkawmngeih hle.


    Tunah chuan  hlauh thawn em em nei hran lovin, keimahni tawkah  kan hlim ve em em a,  kan khawsak  a hautak lovin kan nu a inremchem thiam bawk nen, zawi zawi chuan kan intodelh  chho ve bek bek  zel  a ni.



   Krismass  a rawn thleng ta le, dik tak chuan lung  aleng ve hle mai, chhungkaw  kim lai te rilruah a rawn lang a, ka nu leh pa ho va kan awm lai te nen, chutiang tho chuan kan nu Thangtei pawh a nih ve ngei ka ring bawk a;  mahse  engmah  kan sawi lang lem lo va.


   Hlim taka Mass ruai te ṭhehin,  ruai chu kan ṭheh nawn ulh ulh  mai bawk  a. 


   Zopui khua  hi  la thingtlang reih rawih tak mai  a ni a,mahse  an changkang lo hauh si lo. 


  Kum thar  ruai  kan ṭheh zo fel ta maw  tih chuan le, Vawk talh  runpui  an lo la  nei ṭhin chu niin,  chhungkaw pangngai chin chuan intin deuh thaw mai chuan  Vawk an talh ngek ta chuah chuah  mai le.!


   He hun hi  an hlutin,  a nei deuh ten  nei ve lo te Sa an hleh  mai bakah, an sa talh hi hralh  lovin an ei tawp mai hlawm a,  tun lai anga  sum to sum  hi la awm vak hek lo le.


    Kan inpuiah pawh an talh  ve reng chung  chuan keini nupa pawh chu, kan ṭhenawm te chuan namen lova nasa  hian  chaw eiah chuan min sawm a,  Maka  te lahin min lo chhiar tel ve nasa  tawh bawk si nen; tih tak meuhin ṭhenawm te nen chuan min inchuh  te tehreng  a nih kha.



    A puitling  a naupangin, he hun zet chu a nuam dangdai kan ti ngei mai,  kei phei chuan " Induhsakna  Ni," tiin ka vuah tawp nghe nghe  a.



   An sa talh ṭheuh kha  eitu neih tlem hlauvin leh, inhmangaih leh duhsak em emin, a talh ve ve ngei pawh kha  an han inpawt chawt chawt mai zawng; an va hmuhnawm teh lul em.!



  Keini pawh chu  kan ṭhenawm hnai tak Pi Ṭhazingi te inah chuan  kan lut ve ta nge nge  a.



  Maka  phei chu a lawm lo lek lek zawk  a,


   " Ṭhianpa, mahni ngeiin kan talh ve ti ta che," a ti chhuak  hial a.


  Mahse kei erawh chuan,


   Ṭhianpa, dam chuan nangni te chu kumkhuain kan tan in awm reng  alawm le, Nu zingi te hi anhmaizahawm ve bawk si a; a lawmawm lamah  ngai hram hram ang aw,  ka tih tlat takah chuan  lungthlu vak lo chung chuan a haw phei ta nul nul a.



    Mahni in lam ṭheuha chaw in eitir tum chuan  an inpawt lawp  lawp a,  duhsak luat thiltih a nih a vangin a nuamin  a hmuhnawm ngei mai.



   Kan kawmthlang han tihtur  nei ve ta lo chu  mi zawng zawng  kawmthlangah kan awm a;  duh reng vanga  mi zawng zawng  kawmthlanga  awm lah kan ni bik hek lo.


   Ka ṭhenawm te naupang kum 10 mi vel chu  a ṭhiante pahnih hian chaw ei atan an lo inchuh  a, pakhat8n a ban vei lamah  manin, pakhatin  a ding lamah, an lo inpawt chawt  chawt mai a, an hmuhnawm phian mai.



     Thingtlang nun  simple leh awlsam tak mai, thianghlim em em mai leh  anhnah  leh  therhlo fahran pawh  la inhleh kual diat diatna  ka hmuh  hian, mizo  nih hi  a tinuam a, siamtu min siam chhan hi  alang fiah bik riau hian ka hre ṭhin.



   Vawi khat chu  Maka nau Nutei  feh haw  laiin  a nu a lo awm lo va,  tumah an inah awm lovin  a lo ruak hiau mai a ni awm e.



   Dawrawn khat thur hian  chawhmeh leh  a awm ang ang kha  Lo aṭangin a rawn phur haw ve a, phur tam a intih ve dawn vei nen;  kan inlamah a rawn phur phei ta zel mai  a.



   Thangtei hnenah chuan,



   " U Thangte, ka chawhmeh  phurh  zawng zawng  hi  a Dawrawn chawp hian ka pe vek ang che u,"  a rawn ti phawng mai a.



    Amah lah chu  a lungawi hmel vak bawk si lo va.



    " E Nute, engtizia nge ni?  A va tam em em ve.!  Hawh  lo chawl la, thingpui sen tal rawn in teh,  chumi chhung chuan i phut hi ka lo phawrh dawn nia,"  a ti seuh seuh  a.


  Thingpui chu thlitsakin Nutei chu a pe nghal zat bawk  a.


    " Nanu hi  ka feh tih a hre reng a, ka haw laia  i lo awm loh vaih, ka ti sa reng bawk a, a lo awm duh lo nih kha," Nutei chuan a ti hmarh hmarh  a.



   " Ka nu chu  ava sual ve, keiman ka lo hau dawn nia,  hei keimah i u  ve tho ka awm  alawm tiraw  Nute.


   Ka nu chuan thil pawimawh tih  laklawh  a nei a ni zawk tak ang a, i u Maka te chhung chu  a pi te in lamah  an leng  chho ta  a nih kha,  hawh  Nute  keiman  ka va thlah ang che aw,"



    Chutia  inthlah  tuma  Nutei phur Thangtein phurhsak  a tum  lai tak chuan  Maka  nu  pawh chu  a rawn thleng ve ta chiah  bawk  a.



   "  Khai, Thangte, eng nge ni uaih uaih ṭhin a, i naupai nen rit lak a hun tawh lo viau a nia, Nute, ka zawng vak vak che a, helam daihah a ni maw i lo awm a?"



     " Nanu hi sual ve si, ka hawn laiin lo awm ngei ang che ka ti ka tia, i lo awm duh lo nih kha,  Au Thangtei bulah ka awm daih dawn,"  a lo la titau bar bar a.


    Dawrawn chu Nu berin han phurh mai a tum chu  Nutei chuan,



   " Nanu, phur suh, avaiin leh Dawrawn chawp khan  Au Thangtei te ka pe vek tawh,"


     Chutah nu ber chuan,


  " Nute, ka tihsual  palh liau liau a ni e, chuti maia  i lo thlen hman ka rin loh avangin Mualrawt  bulah sawn, Artui  bawm tur  Chakawk  ka va  la lawk e  ka tia, chumi ka thang  chhung chuan  i lo haw hlauh  si a, a pawi ka ti khawp mai;  tun achinah chuan  ka lo awm ziah  tawh dawn nia,"



     Nuihza  nui ri ngam si lo chuan  kan ri awp awp a,  Nutei phur  chu keiman  ka phur lawk a, kan vai chuan  kan  haw phei ta zawk  a.


     A ni taka,  nula  tleirawl tir tê  a nih bakah  an tlum ber  ala ni zui  bawk  a, tlang ngaihin nula  ve uaih  tawh  mahse,  Nutei hi  a la pangchang  hle reng a, hei hian  nute hlutzia  a pho lang chiangin, nu leh fa  inzawmna   thukzia  a tilang chiang hle bawk  a ni.



  Mihring  tung chhoa  kal ho  zingah hrim hrim hi chuan,  kan hmangaihte leh  min hmangaihtute  a ni kan tihtauh  khum a,  min tihtauh khum ṭhintute  hi ni.


    I ṭhian emaw  i unau, chhungkhat  zinga  miin a tih tauh khum  bar bar  che chuan  haw mai lovin,


   " E khai, min lo ngaina/hmangaih  hle  a nih hi,"  ti then mai la,  thinrim khum ve lovin han duat hlauh teh,  an tauh  khum rei peih miah lovang che anga, a ngaina  em em zawk ang che.


    Kum thar kan  hmang zo ta a, rei lo tê-ah  Sikul luh pawh a hun leh mai dawn ta,  keini nupa  chuan  a hranpain  thlawhma  kan la lo va,  Thangtei naupai leh  kei  sikulah ka thawk bawk si nen,  Lo lam enkawltu kan  awm ta lo va;  a rem changin Maka  te lovah te kan fej ve lawp  lawp mai ang chu.


   Thingtlanga  awm ho-ah  pawh  hmeichhe  ṭhenkhat chu  nau  an neih dawn hnaih tak tak chaaha  chawl hahdam an awm a, a tam zawk chu  kawla ni chhuak chhiarin an feh ṭhin tak meuh  a ni.



   Keini  erawh chu  a feh  ka phal miau loh avangin  thingtlang nu  rau rauah  a hah pawh a hah nep hle reng a,  rim  leh hah lutuk a a awm kha  ka phal lo a ni;  ṭhen khatin thatchhia  an tih laiin  ṭhen  khat  erawh chuan  vannei  anti ve thung  a, thatchhiat  lam thuah  chuan  Thangtei  hi  a that chhe lem lo a ni.



   Vawi khat chu  Sikul chawlh meuh puangin Zopui  khaw  thlawhhma  tur,  Lo hal tur  a nih thu  an rawn puang  dum dum  mai a.


   A pachhuaka  thawh tur  a nih avangin kei leh  Maka  pawh chu  mahni chawfun,  changel hnah ngat maia  fin chu  akin kan  thawk chhuak ve ta a.



   Tluang taka  lo chu halin  keini  halna  lam phei chu  a kang ṭha viau  nghe nghe  a.


  Kan kal lohna  lam, Rampuia  te halna  lam erawh chu  a chiang kuang  vak lo hle mai a. 



  Chumi kang ṭha lo  hal nawn leh  tura an kal chu  an hal  zawh chuan  ngaihṭha takin an kirsan  ve mai bawk  a.


    Chutah le, Rampuia  chuan ri thut  hria-in a silai  put lai  chu  a dah lawk a,  thwihpataqpa  chak chuan  a tlan ta dawr dawr  a.



   Chuti chung pawh chuan  a kut vei lam  ban vunpui  chat  ṭhawt  khawp  erawh chuan  hliam a tuar ta tho a ni,  khatia  thlamuang taka  a kal ta kha  thli na  deuh mai a rawn thawk phut a,  Rampuia  awmna  lam hawi chuan  thli chuan  mei chu  a chhem kal ta thut a.


    Ani pawh  harh chhuak thutin  a silai  leh  ipte pui ah chu  paih lawkin,  a theihpa tawp tak meuha  chak chuan a tlan ta chiam a, tlema  tlemah nun a chân  lo chauh  a ni; minute tlem te pawhin han khawmuang na vaih se chuan  a kanghlum chiang  ve viau awm e.



   Nikhat chu:

   Lo hal zawh chuan  Maka  nen  an kangvarah chuan  kan feh  ve ta  alawm.
     Mang bung  te chhar khawmin  kan  khawh ve nual  a,  kan khaw  nula  nalh  leh  hmelṭha  tak tak  te pawh chu  an dum niuniau hlawm  reng  a.


   Tlangval  phawk zual deuh  lahin fiam chik takah  neiin,  "Sudum niauin em ni i lo hawn a Thangpui,"  tih chu  an vawrh lar hlen ta phian a.


  
In kan thleng  chu vengthlang  tuikhur  kan pan sup sup  mai,  tun lai angin tui lak te la awm hek lo le;  chutah chuan  a mipa a hmeichhiain kan  inbual sup sup  mai  ṭhin a ni.


Keini pawh chu  kan inbual tur chu  a vawtin  kan peih lo ngang  mai a, kan hêl kual deuh chhen  bawk  a,  ka ṭhianpa  inleih  huh  hreh  lutuk  chuan  inleih pawh  la tum.lo va  ka ding peu ul  lai tak chu,  fenthlir  khat  pawpa  tuisik chu suakin, ka lu-ah  chuan  min rawn leih ta thut  mai.


   Ka va phu nasa  teh reng em.!  Thla chu nei ila,ka thlawk chhuak daih hial ang chu  haha.


   Thinrim tawkin:


 Makthang, engahnge  khatia  min rawn leih ve ringawta?  Ka ti tuar mai a.  Ani lah ngawi duh bik hek suh:



     " A kir ve tho si a, ka lu emaw  ka ti  alawm,"  a lo ti fel et a.



    Chaw  ei tui vek u le.

REAL LOVE chapter..7. by T mawii

REAL LOVE💙

Chapter..7.

By  Tmawii.



    Zan dar 10 thleng dawn kan titi a, kan chanchin kimchang  ṭhianpa Maka  ka hrilh chuan  mak a tiin  min lainat ngei mai.


   " Hetianga  thlahtute thiltih sual  kan chhuia, kan in ṭhelṭhaw zel dawn a nih si chuan  khawvel hi a va hrehawm awm ve la.!


   Kan thlahtu lah chu  mi pakhat Adama  kha  a la ni reng mai si a, tumah hi mihrang tak tak lah kan awm si lo, mahse kawng lehlamah  chuan  i pa pawh ka dem hauh lo mai Valte, kei paqh ni ila, ka rilru chu a dam thei hauh  bik lo vang le," a ti charh charh a.



    Kawng thui tak kan kal bawk nen,  mut chhuak chuan min rawn ṭham ṭan ta bawk a, mu tur chuan kan insiam ta hlawm a.



   Hmanlai  han ti ila, keini ho naupan lai ngei pawh hian Champhai te chu  ke ngatin kan kal thleng fo ṭhin a, kan khua  aṭang hian champhai hi  hmar lam km 40 vel chiahah  a awm a, feh tur ang maiin mahni chawfun nen, ke ngatin kan kal thleng ta ṭhin a ni.


     A changin mahni zawh tawk buhfai kan phur a, nilengin rit phur chungin  kan kal a, thim hmulah  Champhai thlengin thlantui leh  vaivut kai paw ther thur chungin; Champhaia  kan  thlenna  te an lo ṭhat viau loh ṭum  phei chuan  hah kha  a va dam  lo ṭhin em.!


    Jeep motor  a lo chhuak ve tawh a, vawikhat chu  ka pu Luta  motorah kan chuang  hlauh mai a, keia motor chuang ngai hlei lo khan ka han rui mai mai khawp a, theichhungsen ka lo ei kher nen;  ka bun chhuak sen ta piat piat mai a.


   Driver  min ngaihtuah lutuk chuan a motor  dintir meuhin  ka bulah  a lo kal a:


   "A seatah  hian  va ṭhu rawh khai, a body  lam.ai chuan a mi sawi pawh a ziaawm a nia,"



   " Ka rui si  ka muthlu duh bawk si nen, poster  an muthlu ngai lo i tih kha, ka muhil duh zawk hetah hian,"



    Vaphai nuthlawi  hai favang zawrh tur kha  a dil a, pum 5 vel  min rawn pek pahin:


   " Kha hei hi seh sawk sawk  la, luak chhuak a reh duh,"



   Ka han seh sawk sawk  a lo thur ve si  leh  ka kawruak lutuk, luak chhuak bawk si khan  pu Luta  chu  zuk bih kar chungin:


   " Min duhsakna  ka tan a thur,"  ka zuk tisap  a.


   A va han haw ber mai em..!! hahaa.(tmawii)



    Zingah  dam ṭha ver vawrin kan tho chhuak  a,  favang  ni chhuak  mawi tak mei  leh  boruak thiang kalh  mai  kan  han dawng  leh chu  hah hi a dam sawng  sawng  mai  a ni.



   Kan thlenna  tw hna ṭul leh  kan tihtheih  ang ang chu kan thawhpui  ve bawrh bawrh  zel  a; chutiang chuan  chawlhkar khat  lai chu  a lo zo ve ta der  mai a.


   Dam hi chuan hun hi chu a liam ve zung zung  mai a nih  hi.


    Kan chamchin tlangpui  leh  khawsak  dan vel chu  Maka chuan  an committee naah chuan  a lo sawi ve bawk a.



   Lehkhathiam te kan la tam.lo bawk nen, kei pawh chuan  zirtirtu  hna  dil theiha  an rawn chhuah chuan  ka dil ve ta thawr mai a.


    Endik leh  intervieq em em pawh awm lo chuan ka tlin thu chu  min rawn hrilh  veleh mai bawk nen. Mak ka tiin kan tluang ve tawh dawn a nih hi, ka ti rilru  nauh nauh  hial a.


    A hnua  ka hriat leh chuan,  hna diltu kha keimah chauh ka lo awm reng chu niin..!!



   Chutia  hna  chhete tal ka han vawn ve takah chuan  Maka te fin reng pawh chu  a ni thei ta bik lo va, min ngaiin min ui der  ve viau mahse, an hnen  aṭanga  indan mai chu  ṭha zawk  dawn hian ka hre ta a.


   Maka  nu hnena  ka sawi chuan,


  " Valte, kan hnen hi a hrehawm inti viau a niang chu maw?"  a ti ta daih mai a.


  Thangtei chu lo inrawlh vatin,


   " Ka nu, chutiang lam a ni awkawng lo mai, nuam.kan ti lutuk zawk asin,  hei  a hming chuan  nupa kawp chawi niin, puitling  ve ve  kan ni tawh bawk a.


   Tunlai sanah  engmah thawhchhuah  nei si lova mi thawhchhuah sa lo ei ve rikngawt  zawng  a mawi ngai love kan tih thu mai a nia,  hei hi kan inpui chu a ni kumkhua dawn tho va,  a hmingin kan inbawk hrang ve mai mai dawn a ni zawk e, tlang ngaihah pawh aamawi zawk dawn lawm ni ka nu?"  tiin  zawhna  bawk chuan  a chhanna  hmawr chu a bawk fel than a.


   Sikul  chu ka kal ve ta bauh bauh  a, Thangtei pawhin  a theih leh  phak tawk ang ang hna  a thawk ve reng a,  kan dama  kan  thawh theih phawt chuan  rualpawl phak ve ngei chu kan tum  nupa  hle a ni.



   He khuaah hian  Tution  class  an lo la nei ngai miah lo tih ka hriat phei chuan, chona  nasa tak mai  min pein, a hmasa  ber  ni turin tution  class  hawn chu  ka tum ta ran mai bawk a.


     Kan theih anga tam Maka  te inah chuan kan kal reng tho va, kan kal khat deuh chuan  ka nu (Maka nu) chuan  min duh hau hman ziah bawk a.


   A changin anmahni  an lo kal ve thung a, kan inluah lah chu a te ve mai bawk sia  maw; kan khat ṭhin ve ngawt mai.


    Ṭhahnem ngai taka thawkin, sikula ka hlawh bak tution fee tlem tlem ka lo la lut ve bawk nen, kan mamawh zualpui chu kan thawk chhuak ve ṭan ta der mai a, kan lawm nupa viau nghe nghe  a ni.


   Thangtei lah nu taima tak mai  niin, inhlawhna  a hmuh apiang  a thawk a,  a hmuh loh ṭum  lahin buh seng hun  atan tiin abuha  rulh turin a feh hram zel bawk a.


   Hna  hram a thawh hi phal lo teh mah ila, " keimah thingtlang nu, thingtlanga  awm ve manah  thingtlang hna  ka thawh loh te chuan," a ti tlat zel bawk si.


    Kum tawp  sikul  chawlh  a lo hun  ta reng mai le.



   Buhseng runpui pawh a zo tawh a, Thangtei buh hlawh khawl pawh  Saiipah kan dah vum ve thar mai a.


   Maka  a rawn lut ve nawlh mai le..!



   " Khawi lan thliin nge rawn len lut teh nawlh che a, a va thaw nasa  awm ve,"  tiin Thangtei chuan a lo fiam bawrh bawrh  a.



   " Thli ṭha zawk  a thaw  a nih hi, Vawiin chu ṭhianpa, in nupa  khan  kan lovah  i feh teh ang u,  kan nu  a feh ve bawk ang a, kan Fazu  buhban  kha  la zai loh  a nia, ' ka nuin in nupa khan zuk zai tawh u, tam  pawh  a nih loh kha,'a ti a," a ti a.


   Keini lah chuan  kan lo chak ve tumhrang  nasa  mai a.


   E kan feh dawn nia,  kan in awm no zo tak ngial dawn alawm le, kan rawn sawm  phei dawn che u nia, ka ti hlut a.


   " Phei hi  i ti ve ziah,  anni in te chu  chho tihtur zawk alawm, kan rawn sawm chho ang che u ti ta che," Thangtei chuan a  lo ti barh barh a.



   Mizo ṭawng professor  tiin ka lo nui suk a.


   Thangtei runthlak ti chuan  min rawn melh ram ram  pahin:


    " Nangni pahnih khan lo hre teh u, grammer leh dan leh hrai chu engvak mah ka hre ve lo, mahse  kan phak tawkah mizo ṭawng  hi uluk ila, nangni  a zirtirtu te ber ber  pawhin  inhman dik  si loh chuan, in naupangten engtin nge  a dik  an hriat tak ang le,"  a ti hmarh hmarh  a.


   Maka nen chuan kan in en hehaw  a, kan nui dun put put  bawk a.


   Rei vak lo hnuah chuan Maka  chu haw  zui nghalin keini pawhin chaw ei  siamin kan eizui ta nghal  a.


   Lo kan zuk  thleng  chu  a lo  kawlh deuh fur tawh mai reng a, kan buhban zai tur  chu  thlam piah mual  dam laiah chuan  a lo ding  êng tuar mai bawk a.


  Zai sawk sawk a khawn nghal tum  kan ni  a, kan phurh haw nghal  dawn avangin kei leh Maka chuan Nghawngkawl leh Saiip kan keng  nghe nghe  a.


    Buh zai pawh ka lo la thiam viau mai e,  ka zai sa chu kan nu Thangtei chuan telin, Maka zai chu  annu chuan a tel ve bawk a; a zai chu chawhma tling lovah kan zo a, chaw fak phawtin a khawn chu  chawhnuah  kan  tlingtla  fel thei ta hram a.


   Rin aimaha  a lo tam avang chuan duh aiin kan  rit ta mah mah  a, kan nupuite ve ve chuan Dawrawn phurin, keini pahnih chuan Saiip  kan  phur thung a; kan hah pang pang hle mai.


   Mahse mizo nunzia hi a lo nuam em a ni. Fanghma tang rah bilbawlawk te te  a lo la awm hlauh bawk a, rit viau e ti lo chuan  kan hlim  haw phian lawi a.



   In kan thleng a, Nutei chuan thingpui sen leh Kurtai nen  min lo chhawp thuai a, hah a tidam sawng sawng mai.


  Thangtei  thingpui in turin kurtai  a ban a, a ei ṭan chiah tih chuan  in veng hman  hauh lo hian a uak ta tuar mai a,  a nisa tuarna  hmai lah chu a sen ṭul mai bawk nen;  hlauthawng taka  kan  en ṭhap lai chuan  a uak a reh a, a rawn nui sen sen  reuh a.


   Maka  nu  chuan,


  " Thangte,  engtizia nge ni ngai?  Ni i rui deuh  em ni zawk  tiin  a zawt vat a.


  Thangtei lah  chuan ni a ruih  loh thu leh  a chauh  loh thuin a chhang fel et bawk si a.



  Keini nupa  haw  tur chu  kan phur tel lova kal  mai  kan tum a,  Maka  leh  a nu chu rawn ding  zawkin,


  " Thangte, inchau viau em ni le?  Mahni phur intheihnghilh  tak mai le,?"


   " Ka nu, kan chau lo va, kan theihnghilh lo bawk, kan pui thei che u hi kan lawm em em a ni,"


   " Vawiina  in buhban vuak hi Fazu a ni a, upa ho pawhin,

   ' Sa lovah chuan a tui ber mai chu Fazu  chhang, anti mathlawn lovin, tuna inphur  ve ve kha  inhawn ngei tur a ni,  ka fate chuan kan neih ve chhun chhun min ṭawm ngei ang chu,"  a tih tak tlat avang chuan  kan phur chu  min chawi a; kan phur haw ta nge nge  a.


   In kan thleng  a kan inbual fai hnu chuan  Thangtei chuan ei a rel malh malh a,  Purun  thip leh Run pum vel  kan hawn chu  rawt thaka  siam tum chuan a kheh var siau mai bawk a,  chutah le  a inrin hman hma chuan a uak leh ta tuar mai a; a ka hup chung chuan  tui dehna  lam chu a pan chawn chawn a.


   Hlauthawng zeta  ka zui thlak duan duan  takah chuan  a uak zualpui a reh veleh a rawn hawi chhuak a, a chala  ka lo dawmsak rengna  kut chu rawn vawn thuah chatin:


   " Valte, ka ṭha  a nia, min ngaihtuah suh,"


   I ṭha lo va, i uak i uak reng alawm le hei, kan nupa chauha  kan awm lai chuan  intihpachan a ngai lo a nia Thangte, ka ti ve ngat a.


   Mittui tla phung chung chuan  a rawn nui hram hram a.


   " Nau ka keng dawn  a niang  Valte,"  a rawn ti thawp sat a.


   Ka lo ngaihtuah loh lam tak a nih vang chuan ka phu deuh zawk a.


   Kan dinhmun leh awm dan hian a zir loh em avangin,  fa neih lam reng reng ka lo ngaihtuah chang tawh lo a ni;  tunah chuan  kan chhungte nen inpawh rem hrih lo mah ila, hetah  Maka te chhung zarah  muang leiah  leirem rah  kan tum ve ṭan ta  a nia.


   Pathianin kan  ṭhatna  turin  kan hun hma lam  buai takah  khan  min lo veng a, tunah  hun a tih takah  fa  min pe dawn taah ngaiin ka hlim ta em em mai a.


   Ka nupui chu ka pawm lawk a, kan chhuat zimte-ah chuan ka vir kualpui ta chawi chawi a; ani lah  hlim avangin a lo nui ri iar iar  bawk a.


    A tawi leh pek em hihiii.

REAL LOVE chapter 6. by Tmawii

REAL LOVE 💙

Chapter..6.


By..Tmawii.



    Nu upa zawk hnenah chuan:


  Ka pi, hei  Khualfang mai kan ni a, helam hi kan la kalna ngai loh  a ni tlat mai a,  eng khua  leh  veng nge tih pawh hre hauh lovin kan rawn lut hlawl mai a ni a; kan nupa te mai hian kan ni bawk si a, eng khua nge min hrilh thei em aw?


  Khualpang zin satliah mai kan ni bawk si a, kan tum dan takah chuan  Zopui khuaa  ka  ṭhianpa, Pu Makthanga  tlawh tum  kan ni. Kan kal ngai lohna  lam aṭanga  kan lo chhuah thut vangin kan bo ta he haw mai a nih hi  ka ti charh charh  a.



   " E khai, inkal sual lo ve, sawlai mai saw  kan khua  Zopui chu a ni tawh a, i ṭhianpa chu tu amaw  a hming i tih kha?" tiin min han zawt nawn leh ngat a.


  " Lalmakthanga,"


  " Aw haw haw,  a nih tak chu maw le,  kei hi  Makthanga  nu  chu ka ni a,  hei ka bula  nula hi  a nau,  ka  fa tlum ber a nih hi, Nute titeh hei, unau kan inchhar chhuak hlauh a nih chu, i fanghma  phurh te kha han phel ta che,"



   A va mak leh si em aw, chuti taka kan tluang leh  nangni kher kan han hmu hlauh mai che u chu, khuanun kan chungah  zah angai a nih hi.


   Ka nu, kan lawm lutuk e.


  Kei hi Makthanga College kalpui ṭhin, Hrangthanmawia  kha  ka ni a, Valte  tiin min ko ṭhin thung.


  Ka bula  mi hi  ka nupui  Rothangliani a ni a, Thangte tiin kan ko ve thung a.


  E khai, Nute, i fanghma  han tui dan em  em chu aw, chhawlhal  a dawm ngei mai, Tar fanghma  ngat kha  a ni maw, ka lo ti chul a.


  Chu nula tleirawl te pawh  chuan  a u ṭhiante kan ni tih a hriat chuan  min nel ve sawt a, nui sen sen  chung hian  min rawn melh ve ngam ta a.


   Fanghma dang kan duh leh duh loh min zawh chuan  kan duhtawk rih thuin ka lo chhang vat a.


   " Hawh u, kal i siam leh tawh ang u hmiang, tlai lam zel a nih tawh hi, kan tlai chhe lutuk palh ang e, khaw thim hma a in kan thlen a ṭha zawk tak ang,"  tiin Makthanga nu chuan kal hma  a hruai nghal a.


   Kal chung chuan kan titi  pah  bawrh bawrh a,  nula leh Thangtei pawh an lo ṭawng ve  malh malh bawk  a.


  " Valte, vanneihthlak takin kan intawng  remchang bawk  a, khawi lai indang mah pan ka  phal dawn lo a nia aw, i ṭhianpa pawh inah a awm ang ka ring.


   A han hmu thut  tur che chu mak a ti ve ang chu aw,"  a ti mawlh mawlh  a.  Makthanga nu phur chu ka chhawk a, Thangtei erawh chuan chhawk a tum  ngial pawhin nula  phur chu a chhawk  thei tlat lo va;  amah  chuan a phur tlang ta zel zawk  a.


   Kan kalsan tak lamah aw niang.


   Nu zami pawh khan  Anhnah mamawh zual lain tlai chhe lo takah  a haw ve nghal  kha  a nia.


   A ri te lo  a thlen chhoh chuan  rin loh takin Thangtei zawngtute  chu  an lo chawl nghuk mai a, amah  nu zami pawh  chu  an lo  hmu lawk lo zawk  a.


  Nu zami hi  veng  tawp lama  awm tih takah  veng tawnt8rh lama awm te chuan  an hre chang chang  chauh  a ni reng  a. 


 A fate phei hi chuan hriat  hi an hlawh viau lem.lo a ni. Chu chu  kawng leh lam takah chuan  keini tan malsawmna  a lo ni ve thung  ta hlauh a nih hi.


    Nu zami haw chho chu  a hmu hmasa  ho chuan  lo be lem lo mahse,  puitling  ho chuan  an lo be ve tho va, nu Zami pawh chuan eng nge  an tih  tihte zawt  khawmawi  ve nghalin  rei vak lo a ding  chawl det bawk  a.


   Favang  lo kan hun lai  a ni a, Thlai chi hrang hrang:  Samṭawk, Bawkbawn, Hmarchapui leh  hmarchate,  Berul, Changkha  leh  anhnah lam chi pawh a awm chikim hle  mai a, Fanghma  tuai  leh  a hur ṭantir thur deuh suk suk  rual  pawh a awm ṭan  bawk  a.


   " Khawinge  ni,  rit  kan phur  bawk si a, zawiin ka lo han  haw mai ang e aw, Thangtei chu  a zia lo hle  mai; engmah  ka lo  hre ve pek  lo va,"  nu Zami chuan  kal tura  inher pah chuan a ti niah niah  a.


   Tun maia  tan chuan engmah  an hre chhuak hrih lo niin a lang a, a lawm ru hle  mai  a,  amaherawh  chu  an hre chhuak leh  a nih hlauh erawh chuan  a chan chuan  Maian chan a tluk ang em?



   Kawngtluan chuan  inngaihtuah  chung zel chuan  akal bauh bauh  a,  a phur rit tak leh khin ṭha melh nawlh  pawh  chu  a lo hre chang hauh tawh lo va.


   Kawtchhuah  a thlena   a fanute pahnihin an lo hmuah takah  chuan  rit  ve thawkhat tak a phur tih a inhre ta chauh reng  a ni.


   A rilru chuan Valtea te nupa tan chuan a ṭawngtai mawlh mawlh a,  an tum ram leh  khua  chu  tluang  tak leh dam takin thleng thei tak ang maw le?


    Amah  intheihnghilh  ṭhakin  a naute pahnih  tan chuan  ngaihtuahna  a seng nasa  a,  him se, hlim bawk se tih mawlh  chu  a duhsak  tak zet a ni.


     Tlai lamah  leh  a tuk thlengin, hemi kar tluan hian  Thangtei chu  an hmu  lo  tluan ta parh a,  Nu zami erawh  chu  a ruk tak chuan  a lo lawm ve em em thung  mai a.



     Thangtei  Pu te khua  aṭang hian  Zopui  khua  hi  hla  vak lo mahse,  keimahni  khua  aṭang kha chuan khaw hla tak mai a ni thung  a, khaw ṭhenawm ti pawhin kan sawi  phak meuh ṭhin lo a ni.


   Vanneihthlak takin  kan  kalna  lam chu  rawn zawng  an awm hmel loh  hlauh  mai bawk  a,  kei ngei  pawh  khan  hetiangin Maka  te khua  Zopui  hi a awm tih  hre sa ngat ila chuan,  Nu zami te khuaah hian  awm lo vin ka kal tlang law law  zawk mai thei  a ni.


  Mahse hei  ka hrai loh zarah,  ka hmabgaih Thangtei  ka tawn leh phah ta  zawk  a,  a lawmawm hke tho mai.



    Aw le,  Zopui  khua  kan lut  chu  ka beisei  ai mahin a lo khaw lian ve  a,  ka ṭhiante in chu  Mualveng lamah  awm in, hmana  lal lal  laia  lal inhlui  hmun bul maiah  chuan  a lo awm a, amah  Maka  ber erawh  chu  inah  a lo awm lo thung  a.


    Kan thlen hnu chuan  naupang  tirin ka ṭhianpa  chu  an va koh tir ta nghal  a.


   Ṭhianpa lo lutin min rawn hmu thut  mai chu  a phu deuh dawrh  ni ber hian ka  hria  a, a awm ve pah reng  bawk  e, kum hei chen hi  kan inhmu  tawh lo  a ni a.


   Maka  te inah chuan tlangnel takin kan innghat  ve nghal  mai a,  an inchhung  pawh  a lo changtlung  ang reng  phian  a,  mizo  thingtlang  inah chuan  zahpuiawm lo pawl tak a ni awm e.


   Makti zeta min en vung vung pah chuan:



   " Tlangvalte, nang hetah maw.!"


   Hei  ka awm chu a nih si hi.


   " Engtizia lam.lam nge ni ngai le aw,  hna te pawh i nei/thawk  tawh zawk  em le?  Ka hmu thut che u chu ka hamhaih tak zet  a ni;  hei hi  innu nge i farnu ni le?"  a nui pah suk suk a.


    Ka farnu ni ta se...



   " Nupui  ka nei tawh aw Valte,"


   I melh dan vung vung  kha  dik hek lo maw...kha kha  kan nu chu  a nia, Thangtei  a nih kha, keini zawng  ṭhiana, hmangaih thiang lo kan inhmangaih bik a niang e.


   Kan inhmangaihna kawng bumboh lutuk vang a nia helam thleng thlenga  kan rawn zawn buai tak che ni,  nakinah muang marin kan  la titi chhunzawm dawn nia  tiin  kan chanchin chu sawi zo duh lovin ka ti tawp lailawk ta daih a.


    Maka  nupui chuan chaw ei a hman tawh thu a rawn sawi ta bawk a, chaw ei siamin  an buai ta nak nak a, thangtei chet ve tum lah chu Nutei khan a phal der lo lehnghal a.


    Chaw ei chung chuan chhungkaw ei zawnna lam te kan sawi pah a, ṭhianpa  chu  a lo zia viau reng a ni.


   Zirtirtu hna  thawkin, fapa  pakhat leh nupui duhawm zet mai  a lo nei ve tawh reng a; a pa erawh chu thi ve tawhin  a nu leh  a farnu  nutei  nen chuan  an lo khawsa  ve a.


   An inchhung  awmdan vel enin  an  khawsak  pawh  harsa  lutuk tur  an ni bik lo.


   Chaw ei kham  puar  tlak nghah pahin thingpui sen kan dawm far a, kei leh  Maka chu  muk fe hian  kan titi malh malh  a, hmeichhe  ho pawh  anmahni tawk tawk chuan  an lo titi ve nasa  hle mai bawk  a.


   Thangtei chuan kan chanchin a sawi ni ngei tur  a ni, midang chu  an ngawi ṭhap a, Thangtei chu an thlir rawn ṭhap bawk a.


   Maka nu chuan  insut ri faih chung hian:


   " Awi maw  ka fanu, ka va han lainat tehlul che u em.!  Mahse  hetah chuan tu mahin  antih buai che u ka  phal thei tawh lo,  thlamuang takin in khawsa  ang a, lungngai reng reng  suh ang che u," ṭah aw deuh ṭiau chuan  a rawn tichhuak  mawlh mawlh a, thangtei chu a kuah ran mai bawk a.


    Maka  nupui hi Thangtei ve bawk chu lo niin,


  " Awi  Thangte, lungngai miah suh aw, hetah hian theihtawp kan chhuah ang a, engmahin a tihnat belh tawh tur che u a ni lo; u maka  ka zawt ang a, in mamawh engkim chu kan ngaihtuah zel ang, ' tiraw  ka nu, khawiah mah Thangtei te hi kal tir tawh lo ang u aw,'  ka van lainat tak che u em.!"  a ti mawlh mawlh  bawk a.


   Nutei erawh chu  Thangtei malchungah chuan  bawk titih hian  a thle phei a, a mittui chu a hru leh zauh ṭhin a; a mengsen ram mai bawk a.



   Ṭhianpa  Maka nen hian  a hun alai khan  ṭhian satliah mai bakin kan lo  inkawm ngeih ve reng bawk a,  a tha  a nain min khawngaih ngei mai, mahse hmeichhe ho ang erawh chuan a ṭawng ve zung zung  hauh lo thung  a.


    " Ṭhianpa, lingngai lo phawt ila,  a hming chuan hei  kan sikulah hian  Headmaster  ka ni ve  a, tunah chuan heti hian han awm nawnaw phawt mai ila, kan  board Committee leh hunah  theih angin ka lo sawi dawn nia; Zirtirtu  chu kan indaih lo ngei mai a, lak belh tura  rawtna siam ka lo tum lai tak  pawh a ni nghe nghe a,"  a ti  charh charh  a.



    Awi tawi intih chuan min hau mai teh u,  angaihna  awm ngang lo a ni tun lai chu, nil aiah ka rawn dah e.