REAL LOVE Chapter ..5 by Tmawii

REAL LOVE💙

Chapter..5.


By .Tmawii.


    Pathian zarah  chhungkaw pangngai tak aṭangin  ka lo sei lian ve a, mahse thingtlanga awm tih takah hlo thlawh leh  thingtlang hna ṭul chu engkim ka thawk ve thiam vek  a.


   Mahse nu leh pa leh unaute karah ka seiliana, duat rawn niin sadaiek hampherh mumal lovin khawpui lamah zirna runsang min belhtir a, ka zir chhuah ve lah chhawr hman lohvin hmangaihna  khur khirh zet maiah  tum sa hauh lohvin ka tlu lut ta si a nih hi.


   Nu Zami  lo hi  Lo bing kan tih mai ang deuh hi a nia, a lo lu lamah erawh chuan ri chu a nei ve ngei nain, an lo a zau tham avang leh  an thlam awmna  a chhak si avangin kan inhmu phak ngai meuh chuang lo a ni;  kei chuan eng pawh hmachhawn dawn ila ka zuam a, ka hmangaih em em Thangtein hrehawm tinreng keimah min hmangaih vanga  a tuar ve zel tur erawh hrehawm ka ti ngei mai.


   Nu Zami ho chuan  engemawchen kan awm lai lawkna  tur  lam chu kan pan thla hnak hnak a,  buh pawh an sang ve tawhin, mizo nu vantlang deuh chu  an kal pil ve hmarh hmarh tawh  a; hlo thlawh ṭul lutuk pawh  kan zo fel  lek lek tawh zawk a ni.


   Thlam  thlen thleng chuan tuma  hmuh em em loh chuan  kan kal thei ve ta mai bawk  a,  mahse hetah hian rei tak chu kan awm thei dawn hauh lo tih  a hriatsa reng mai bawk a.


  Eng nge maw ni vei chu, kan mizo upa te ngei pawhin:


  Hmangaihte nena  Bahra laih  an lo thlan ve ṭhin kha  maw...tiin  ka insehruh  lui ve ta tlat a, ka hma hunah eng nge lo thleng dawn lah ka hre der si lo;  eng pawh nise tuna  kan hun hi  a theih ang anga  ṭhain hman tum  phawt mai teh ang aw.


   Nu zami a hawn hnu chuan  Thangtei nen chauh  kan ni ta, pahnih chauh ni mah ila, kan khawvel chu  a par a, kan hlima  kan kim bawk a ni ber mai; keiin ka hmangaih tluk zeta  nasain Thangtei lahin min hmangaih ve bawk si a.


  " Valte, hlo pawh lo thlo hah duh reng reng suh ang che u, kan thlawh hneh lutuk chuan midang reu reu hian  min ringhlelin  an rawn zawng dah ang che u,  ka theih tawk tlem mahse, in mamawh zual tal chu rawn phuhruksak zel che u ka tum tlat ang e," tiin nu Zami chuan min ṭawng thlamuan malh malh a.


  Kan theih tawk chuan kan che vel  pawh kan fimkhur ve nasa  khawp  mai a, mahse  fimkhur sen loh chin leh min zawng an awm hlauh erawh a hlauhawm hle reng  mai.


   Dipdaltu nei hauh lova  kan pahnih chauha  kan  awm chu  mi zawng zawng hi kan kim ve thlap mai asin le..!!


   Zanah rannung leh  zana hram chi Vabak leh a dang dang an hram chiah chiah a,  ramhnuai boruak thiang ruih mai leh, mihring thawm bengchheng  reng reng hriat tur awm hauh lo va  reh duk mai te chu  a thianghlimin, kan inhmangaihna  chu a belhchhah hliah hliah mai hian ka hria  a.


   Ka nupui duhtak Thangtei chu  ka awmah, ka kut ding lam lukhamin, tui taka muhilin a thaw ri sak sak a, a hmelṭha tak mai leh pawisawi lo hmel hliah hliah mai chu  lungchim taka thlir vang vangin;  a chalah chuan dim te-in ka fawp zeuh a, kei pawh chu  thlamuang takin ka muhil ve ta siai siai a.


    Zingah chuan  Thangtei chuan ei relin,  thlam.kawt maia  maian chu a sik malh malh a,  a thawm hre phak rengin leh,  a piah maiah chuan ṭhahnemngai zetin kei chu hlo thlovin ka bung mek thung  a.


   Awrawl nena  han auha, han chhaih hlim  pawh  ka chak viau nain kan dinhmunin zir miau si hek lo le.


     Nu zami  lo feh leh hma ngeia  a tam thei ang ber lo thlawhsaka, favang mi lo zawh rual ngeia zawhtir chu ka tum ruh hle  mai bawk  a.  Thangteiin chawei a hman chuan ka bunna  lamah lo kalin,  zawite te  hian buh kar aṭang chuan min rawn au dat dat a.


   Thlam chhung kan luh ruala  Maian bai thar lam rim lo nam vang vang mai leh,  thuka  rawh ngei mai Bawkbawn leh samṭawk nen,  Hmarchapui no te te meia rawh a,  raw châng  bung  rawt thleng ngei maia  lo awm niai mai ho chuan  ril  a fan raih raih mai alawm le.


   " Ka siam nghal mai ang aw Valte, i hah viau em?  I ril a ṭam tawh viau ang a," tih pah chuan ka lamah a rawn thle pah nghalh bawk  a.


   Mahni nupui te mah nise, nupui neih ka hun leh ur ur mai hian ka inhre hial a.


   Thlam chhuat, Rawpui chik pharhah ngei mai chuan  thing buhtlei hmangin,  thlam thuk phena chaw her hmin ngei mai, herna  hnu chhinchhiah nana vut theh ṭial niau mai bel, chatuana  nawh ngai loh niawm fahrana  dum kim niau mai aṭang chuan  chaw, mizo buh hlang ngat mai, rum  lam  lek leka  chhum chu   a rawn khawrh khu ta vang vang mai a.


   Kawlpa ṭhuta chhuatah bawp kawkalh nalh maia ṭhu chung ngei maiin  dul hmul khât phuarh khawp ngeia ei tum chuan  ka lo en vung vung  a.


  Chutah, Maian   sih tharlam  tak mai  bai nghal tih hriat reng reng, a kara  berul no leh lengmaser hnah no thlak pawlh chiat mai chu  a rawn suak khu leh ta vang vang mai a.


   A suaktu chawp hian ei theih mai se ka va'n ti em.! tiin  Thangtei chu ka lo chhaih pah zuk zuk  a.


    Puar nelh nawlha  kan han ei chuan, mahni in lama  Dal leh dailuah, Nutrila leh tel tih vel chu kan mamawh bik lo chiang ngei mai le.


     Kar khat dawn lai chutia kan awm hnu chuan  tuk khat chu, zing hma tak maiah hian Nu zami chu a lo thleng nawlh mai a; a hmelah chuan  hmanhmawh rukna  riau hi  a lang tel tlat mai hian  ka hre hman pek a.


   Pawihai  a awm em ni ka nu?


   " Á...! awm em em lo ve,  chaw kha  puar takin ei phawt mai teh u, ka rawn chhukna  lam zawng zawng lah chu  a fai hnum hlarh vek mai a; Thangte, in va han thawk nasa  em em ve, hlo chu lo thlo hah duh suh ang che u ka tih kha,"  a ti barh barh  a.


   " Ka nu hi, engmah  kan thlo hman hleinem le, kei phei chu  mahnia  tuichawi tur takngial.pawhin ka laktlak der lo  lehnghal a,  i fapa hi a lawm ka nu, Mualzathlova  a ni ringawt alawm," ti chuan  a nui pah var var a.


   Chaw ei chu a siam  pah malh malh a, ka nu pawh chu Ina  ei lova lo kal a nih avangin kan rual chuan  a ei ve ta nghal a.


  Chaw ei chhung zawng chuan hlim takin kan titi pah bawk a, keimahni tawkah  inhmangaih em em vek mai kan ni bawk a, kan inpawh tlangin kan hlim ve ngei mai;  kan nui ho dar dar  reng mai a ni.


   Chaw kan eikham chuan nu ber chuan thlam namthlak lam chu panin:


    " Ka fanu leh fapa te u, lo hnai teh u,ka bulah hian  rawn ṭhu chawl u la, kan titi ho dawn nia; Thangte nang nula-ah  thingpuisen  kha  rawn chhawp bawk la, puar tlak nghah pahin i chawl ang u khai," hlim hmel sang hian a ti a.


  Nu zami bulah chuan ka ṭhu chhuak ve vat a, chutih pah chuan Thangtei chuan  thingpuisen chu  a rawn chhawp ve mek bawk a; kan pathum chuan  inhnaih zet zet hian kan ṭhu bial tiau mai a.


   " Kan thu dang alai chuan...,"  ka nu chuan a ti hman chauh a.Thangtei chuan  hlauthawng zetin  min rawn en a,


  " Ka nu, chanchin lawmawm lo a awm em ni?"


   Thangtei chu  Nu zami chuan a kuah vat a,


  " Awm em em hran lo ve Thangte, thlamuang takin awm phawt mai teh u,  thil hmanhmawh  thlak chuk chuk pawh a ni em lo vang chu maw? I awm loh thu hian i nu leh pa hnen thleng tawhin, nangmah lam turin  kan khua  an rawn thleng chiah a ni, nizan khan  an riak tawh nghe nghe  a; vanneihthlak takin  i pu fapa te berin a sawi lai ka fanu upa zawk Zodikin  a lo hre fuh hlauh mai a, hei ka theih anga rangin ka rawn kal ta nal nal  a nih hi," a ti charh charh  a.


   Phawk deuh hru chung hian kei lah chuan Thangtei chu ka kuah vat a,


   Ka lak aṭang hian engmahin an pawh hran che ka phal tawh lo, ka lo ti ve ngawt bawk a.


  " Ka nu engtia tih chi nge niang le?"


   Mangan hmel taka Thangtei zawhna  chu  nu Zami chuan:


  " Thangte, hlauthawng suh aw, ka ngaihdan chuan vawiin chhun lamah emaw  hian heta ṭang hian  kal chhuah tum ta mai u la, fimkhur leh a ruk thei ang berin inkal  ang a,  mihring tupawh  intheih chin chinah pumpelh intum dawn nia," 


   " Ka nu leh pa chuan  rawn kal hnaih mai an tum lo em ni?"


  " Ka chiang chiah bik lo va, amaherawh chu, naktuk lam hi chuan an zawn tawh ngei che u ka ring si a ni, vawiin tut tutah chuan  an rawn chhuak peih bik em lo vang chu maw  ka ti deuh a, nge  an rawn kal nghal ang a, an rinthu zawn chiam mai ang che u tih ka hlauh vanga rawn hmanhmawh ka ni ve pah bawk a," a ti siam  siam a.



   Nu zami kan tana  a inpek zawhzia  ka ngaihtuah chuan, atan eng nge maw tal han tihsak thei ila  aw...tiin ka ngaihtuah rauh rauh a.



   Rei rial  lovin kan insiam a, tunlai hi  favang  an hman ṭan tawh hlawm avangin mi feh pawh an tlem pharh tawh bawk a.


  Kawng pangngaiah pawh kal ngam mang lo chuan  kawng bo lo tawk si chuan feh kawng hrulah kan kal  ve mawp mawp mai a.


   Nu zami  amaha kan kalsan chu nuam.lo hi kan ti ang reng khawp mai a, mahse tihngaihna  dang  a awm bawk si lo a ni.


    Chutiang zela  kan kal chuan  kan awmna  khaw dai hnai maiah chuan kan chuang chhuak ve ta hlawl  a, chuta tang erawh chuan  chawl.muang hauh lovin, chhim.lam.panin kan kal ta zel  a.


   Ka rilruah chuan thil pakhat  a rawn lut zawk  a,  ka ṭhianpa  Makthanga  Zopui  khua  kha  ka hre chhuak thut  mai a,  ani hnen chu pan ta vang vang mai ila,  ani chuan  min phatsan hauhin ka ring ta lo va.



   Tuna  kan kalna  kawng hi  an khaw lam kawng chu  lo ni mial se tiin ka ngaihuah rauh rauh a,  chutih rual chuan  Thangtei chhungte  hmuh  hlau leh  midang pawh  hel chung zel chuan  kan kal a ngai si a.


  Thangtei chauh  ka hlauhpui  avang chuan  ka chawlhpui zeuh zeuh bawk  a, kan feh thawmhnaw  kha  hlip duh lovin, kan thawmhnaw ṭha ho chu kan ak ve am mai a.


  Hetih hun laia Zo khaw kar kawng hi chu a la reh ṭha raih raih ṭhin khawp mai, chuvangin keini pawh chu  fimkhur  lutuk lovin kan kal ta zel zawk a.


   Tlailam thim hma deuh chuan khaw pakhat kawt chhuah hi kan chuang chhuak hlawl mai a,  chuta  pitar  deuh hlek leh  nula  pakhat lo chawl chu  tim deuh dai chung hian  ka va pan hnai a, anni pawh chuan hmela ṭi deuh hlek chung hian min lo en ve reng a.


  Tawk lawk aw.  Ka ril aṭam ve tlats.