KA HNEH TA.
By ..T Mawii,
Mahni tawka duhthlang ve thei inti ngat, duhthlanna erawh nei thiam vak si lo ka ni a, (hming leh khua hi thup ang aw)
Ka rawn tleirawl chhuak chu nun hi nuam ka ti ve khawp mai, Tleirawl tet aṭangin Kohhran upa fa tih takah Kohhran ka bel chawt a, ka thi deuhthaw a nih loh chuan inkhawm leh Kohhran thiltih ka thlahthlam ngai lo a ni ber.
Kum 18 ka kai ve dawn chiah a, ka u te pahnih nula kum 20 leh 23 mi a kum zâwnin an thi ta si a. Chhungkaw rinrawl berah ka ṭang lo thei ta lova, sikul pawh kal zaqm thei lovin, High sikul ka rap ṭan chauh tih chuan chhungkaw harsatna avangin ka chawl hlen ta a ni.
Kum 20 ka kai ve ta.
Duhtu tam tak nei ve chung khan duh chu ka thlang ve ta ngei mai a, kan khaw tlangval hmelṭha zet mai, pa te chhe lem lo tak leh pian pawh nalh tak mai, mi ṭhenkhat erawh chuan 'a kawtlai mi em mai, sakhua a ngaihsak si lo,' ti a an sêl ruk deuh nen chuan inzui chho vein, kum tawp lamah chuan mi zawng zawng mak tih luai luai chung leh, ka nu leh pa rilru na em em chung chuan kan tlan dùn ve ta rawih mai a.
" Awi, mak ka ti lutuk, kan khaw nula sakhawmi ber mai leh, kan khaw tlangval kawtlai mi ber mai an innei chu a nia, Mafeli chu ka uiin, a mi duhzawng chu ka rin a lo va ang lo tak em..!!" tih chu mi tam zawk titi leh an inhrilh chhawn dan a ni a.
Kei erawh chuan,
" Kan innei anga, a nun hi chu ka siam ṭha thei ngei ang," tih rilru kha ka pu ve tlat mai si a.
Ka nu leh pa chu an rilru na hle mahse:
" In nupui/pasal tura induhthlanaah kan inrawlh lo vang, thurâwn kan pe vek tawh che u a, induha inneih chu kutdawh pawh nise kan pawt kir lo ang che u, inthlan fuh leh in vannei ang a, fuh loh leh invanduai a ni mai," an tih ang ngei chuan min pawh kir chu an tum hauh lo mai a.
Chutia innei ve ta chu ama inluahah chuan kan lut ve ta rawih a, tlangval parawl tih takah a inchhung pawh a tlabalin, bungbel lah engmah a awm mumal hek lo. Kan insawi fel hnu chuan kan inpui lamah chuan kalin, bed sheet leh mamawh zual ang ang chu ka fawm khawm ve nasa hle mai a.
Ka tleirawl deuh lai khan ka venneih asiamin, Anganwadi Worker hna ka hmu ve hlauh mai bawk a, Aizawlahte trainingin ka awm phah ve reng nghe nghe a, tin, hei hian kan khawsak harsa lutuk tur pawh min save sak ve nual reng a ni.
Duh leh duh intawng ve ta chu kan hlim ve khawp mai a, hlim lah kan hlim ve na laileng e. Chutiang chuan kan awm chho ve nawk nawk a, hun a lo rei deuh chuan, Kohhran dan chhungah te lutin, kei naupan lai aṭanga sakhaw bel tlat chhungkua aṭanga chawr chhuak ta chu ka lung lengin ka inkhawm veleh ta zauh zauh a, ka pasal pawhin min khak hran lem lo.
Chutianga kal chho zel chuan ka inkhawm tam ve tial tial a, kan pa pawh chu ka sawm fo bawk a, ani erawh chuan inkhawm chu a ngaihsak duh chuang ta hlei lo a. Keimah chuan ka theih tawk tawk a inkhawmin, chaw ei dawn leh chawlhni tuka chhung inkhawmte ka neihpui ta zel a, ngawi reng leh min hnial lem lo chuan a awm ṭha ve mai zel bawk a; hun hmang ve tura ka sawm erawh chuan min hnial fithla ṭhak ṭhak thung ṭhin a.
" Nangman i hman kha a tawk," tiin.
Kum a lo vei meuh chuan kei pawhin nau hial ka lo keng ve ta a, nau ka pai chinah phei chuan inkhawm leh ṭawngṭai chu a hma aimahin ka uar leh zual ta a, ka fa tan chuan nu entawntlak tak nih ka tum ve tlat a ni.
Nau ka pai chu kan hlim nupa ve khawp mai a, ka thleng sil leh eirel laia Gas bula ka awm lai te hian ka hnung lamah min rawn vehin, ka kawngah min kuah a, ka pum chul chung hian kan fa tur chu biain, min chhaih pah a,min duatna leh duhsakna kawng hrang hranga lantirin, min hmangaihzia thu min hrilh nawn sap sap ṭhin a; ka lo beisei leh thlakhlelh em em nun chu ka tawng chho ve ta zel a ni.
Naupai erawh ka haw phian a, chaw ka huain kan ei ngun ber Maian te lah chu ka hmuh ngawt pawhin ka luak hi a chhuak ut ut mai ṭhin a. Chaw lum ka ngei a, 'chaw rim a nam em mai,' ka tih laiin, chaw ṭhing leh dai erawh ka ti thei ṭhak bawk si lo.
Lui lam sa ka ei chak thu ka sawi chuan ka putea chuan a fapa Luiah a lo kal tir a, a tuk zingah chuan sangha tharlam tak mai, la khu vang vang mai Khuhhriang lian khat lawih mai a Nghatak leh Lengphar pum ṭhiau mai min rawn pe chu, a rim ngawg pawh khan ka ril a ti ṭam vawng vawng mai nia. Kan pa takngial pawhin lawmthute a lo hrilh ve nual nghe nghe a.
Ka raino chaw huat pawh thla 2 hnu velah chuan reh chhoin, ka chaw ei pawh a tui leh ṭan tawh a, ka naupai pawh thla 4 a lo kai ve ta reng mai. Inkhawm leh ṭawngṭai ka uar sauh sauh a, a theih hram chuan hritlang leh khawsik satliah vel chuan ka inkhawm min ṭhulhtir pha lo a, tin, ka nu leh pa te pawh tibuai lo a awm hram hram.ka tum bawk ṭhin.
Chutianga ṭhahnemngai taka hun ka hman chhoh lai chuan kan pa erawh a lengchhuak tam ve tial tial thung a, a nu, amah hringtu hian pasal dang nei tawhin, kan khua Hmunṭha-ah hian a awm ve nghe nghe a. Tuna a pasal nen pawh hian fa puitling pali lai an nei tawh nghe nghe a ni.
Kan inneih tirh lama min tlawh ṭha duh hlei lo kha an lo leng ngunin, kan pa lah chuan kei aimah hian a lo ngaihsak zawk ṭhin bawk a, ka ṭha en ve tawp zel mai a.
Zankhat ka inkhawm bang chu ka rin loh deuh mai hian kan pa chu inah a awm ve tih hriat deuh mai hian kan in chu a lo eng ve pap mai a, lawm taka inchhung ka lut tur chu kawngka a lo inkalh tlat mai le..!!
" U Zual, kawngka lo hawng teh,"
Chhanna ka dawng miah lo va.
" I mu em ni? Kawngka lo hawng teh,"
ka tih nawn leh pawh chuan chhanna ka hmu ta chuang lova, ka nu te in hi kan inpiah maia awm a nih vangin ka chawl phei mai mai teh ang tiin ka lut phei ta a. Ka len luh khat em avangin ka nu chuan,
" Â..! Mafeli ve mial chu," min lo ti nghe nghe a.
Ka pa pawh chuan,
" Mafel, innpa a leng em ni? nang ngial i lo thlen phei ve chu," a lo ti bawk a.
" Aw, zanin chu a leng chhuak ve aniang,"
tiin ka pha nawi niah niah a, ka nu leh pa bulah chuan engmah ka sawi duh ta lo va.
Mawi tawk ka ṭhut ve hnu chuan ka nu chuan,
" Mafel, va haw tawh, pasal te lo haw laia awm loh chu a mawi ngai lo a nia,"
" Aw le,"
Ka tho ṭaih ṭaih a, ka lung erawh a chhe ru hle a ni. Ka nu leh pa bulah erawh ka thup ve ṭang ṭang thung a, an thu lova kal cbhuak ka ni si a. An rilru tihhah ka duh lo a ni, an hriat phawt chuan an mi hmangaihna vangin an na ngei anga, chu chu ka duh si lo a ni.
In ka va thlen chuan kawngka chu a lo inkalh tawh lova, mahse muhil nghet tak ang hian a lo awm tlat a, kei pawh chu ka ṭawngṭai a, a bulah chuan ka mu zui ve ta nghal a. Engmah sawi chhuak lem lo chuan ka mu meng reng a; awm erawh a nuam fahran lo hle mai.
A tuk zingah chuan ka zawt ta tho va.
" I lo haw huna ai lum atan tiin mei ka lo chhem a, mahni chauh chuan a khawharthlak em mai tiin ka lo mu zal a, kawngka ka kalh lai ka hre lo reng reng,"
a ti ve tlat mai a.
Kan kawngka hi kan nupa a pawn lama kan chhuak a nih loh chuan kan kalh ngai hauh si lova, thu tak min hrilh erawh ka ring lo ru viau nain ka hnial zui ta lem lo a. A vawi khatna a tan ka pasal chu
*Ka ringhlel ve ta a*.
Chumi kar lehah chuan,
" Lenchhuah lawkna tur ka nei a,"
a tia.
" Khawiah?"
" Ka nu te inlamah, i chhungte ngawt hi kan ti hluau reng a,"
" Ka lo kal ve ang e,"
" A ngai lo e, i pa te bulah lo awm la, ka rawn sawm haw ang che,"
Ka nu te tualah chuan kan inṭhen a, a kal ta nal nal a.
" U Zual, lo haw har vak lo la, ka lo nghak reng ang che,"
Min chhang lem lo chuan a lo hawi zawk a, a kal liam zui ta a. Kei pawh ka nu te inah chuan ka lut zui ve ta a.
" Mafel, teh hlawl che chuan, inpa khawnge?"
"A nu te inah a kal dawn a, tah hian min lo nghak la ka rawn sawm haw ang che, i leng khát bawk si a,"a ti a,tah hian ka lo nghak mai ang," ka ti ve zaih thung a.
Zan dar 9 velah pawh a lo la haw loh avang chuan keimahin ka haw phei a, kan kawngka chu chhung lamah a lo inkalh leh ta a. Min theihnghilh palh a nih ringin ka ko dat dat a, nasa deuh a kawngka ka sawi vak vak hnuah chuan, tho phang hmel tak hian a rawn hawng ve hram a. Min be zui ta lo chuan a mu lehnghal ta daih a. Ka rilru te te chuan,
" Eng nge maw dik lo chu a awm a ni,"
ka ti ru neuh neuh a.
Ka nu leh pa hnenah engmah ka sawi ngai lo a,mahse loh theih loh va an hriat hun chu a lo thleng ta tho va.
Ka nu te hnenah min dah a,min lam loh fo avang chuan ka pa chuan:
" Mafel, engmah zep loin han sawi teh le,tun hi a vawikhatna chauh chu a nih hmel loh a ni, i hmel leh awmdan hian tunhma kha a pha tlat lo mai," a ti chhuak ta phawng a.
Hemi zan pawh hian ka haw phei kawngka alo inkalh leh si kha,ko duh tawh loin ka pa te hnen ka pan leh a,a vawi 5-na lai a nih tawh avangin em em a ka ti ve ta deuh a ni.
Ka pa hnenah chuan engkim ka hrilh ta vek a.
" Kan fanu duhlai i ni a, i inthlahrung mah mah a nih chu, eng hunah pawh lo haw dawn la, mianglo leh rualbanlo hial pawh lo ni palh ta la, kan hmangaihna che hi a pangngai reng; a duh leh loh che a nih pawhin ṭha takin sawi ang hmiang, ka fanu mizia ka ngaihtuah hian, i tuar nasa hle tawh ang tih ka ring tlat a ni, kan thu loa kal chhuak i nih vang hian i inkiltawih rei mah mah tawh a ni; nupa kawngka inkalh hnan fo mai hi thilthiang pawh va ni suh." a ti ta bawrh bawrh mai a.
Ka pa thinrimna hi a awm viau mai a, bakah ka mizia a hrechiang tawk ve bawk si a. Min dem a, min han zilh deuh pawh a tum miah lo hian min hmangaihzia a pho lang chiangin, kei a fanu mizia hi a chiang hle tih a hriat mai a ni.
Tichuan ka nu leh pa hnenah chuan ka riak ta a, nau ka pai hrâm ve ṭan tawh nen, ka nu leh pa thin chu a rim em em mai a, ka naute erawh an la naupang deuh hlawm nen engmah an sawi ve lem lo nain, ka haw leh chu an lawm ve hle tih an hmelah a lang reng mai a; a bik takin ka chhang chhang leh hmeichhia phei chu a lawm zual hle a ni.
Zingah chuan ṭha takin U Zuala chu a lo kal a, " haw tawh ila, i leng rei tawh alawm," a rawn ti vei ngial a.
" Ka léng lo,"
" I in a nih tawh loh hi,"
" Ka nu leh pa hnenah ka haw tawh a, ka in a ni tawh."
Ka pa chuan,
" Zuala, haw phei rawh, keini pawhin Mafeli thawmhnaw hi kan rawn la har lo vang."
" E ..ka pu, ka ṭhen reng reng lo a nia."
" Hausa lo teh mah ila, ka nupui fanau chawmna khawp chu ka thawk chhuak ve asin, i nawm i maka kawngka i kalh hnana i hnawhchhuah a, i vahvaihtir mai mai turin ka fanu hi ka hring lo. Hmangaih leh duh taka i enkawl peih chuan tiin ka rawn ngaihven lo mai a ni e, ka fanu duhlai a nih hi," a ti ve ta bawrh bawrh mai a. Ka pa thin kha a ur ve thlawt a ni.
Engang pawhin min rawn ko leh mahse hawn leh chu ka tum ta lo bur bawk a. Ka rilru a ti chawlawl vek tawh tlat a ni.
A tuk lehah chuan ka bungraw la tur chuan chhungkhat hnai zual kan sawm a, kan va phei ta a. Lak chu a lo phal ta awzawng lo mai a, ka tihngaihna hre lo leh ṭhen ngei duh si chuan ka pa leh ka Putea chu ka va kohtir ta tawp a, ka pa lo thlen chuan ka pa ke vuanin ngaihdamte a lo dil vel a..!!
Keiman ṭhen ka tum tawh em avangin ka pa pawh ka hrilh vek tawh a, chuvang chuan ka pa leh ka putea pawh an khauh far tawh reng a ni.
Ka bungraw chhawm ngei leh ka bed sheet vel kan lak vek chuan chan tur a nei dawn si lova, double bed sheet chu kan phel ta vek a, mutbu fumfe a neih si loh avangin mutbu ṭhenkhat pawh chu kan dahsak ta hial a. Ka pa chuan :
" Mafel, engmah ui suh, kan fapa ve tho a nia, a mamawh tur kha chu dah vek mai rawh, kan indan ve na ni mai se la, kei pawh fapa indang neiah ka inngai mai e; nangmah kan chan che chuan a tawk lutuk alawm." a ti ṭha ve mai a.
Tichuan kan inla chhuak fel ta a.
Pathian zarah kei chu ka awm thei viau mai, U Zuala zawk chu a talbuai deuh hlek ṭhin pawh a. A changin ka pa hnenah chuan ngaihdam a dil a, a chang leh a vau thul, a chang phei chuan kan in lama rawn awm ve te a tum ang ut ut a. Mahse, eng kawng hawi mahin ka pa nena kan rilru chu a kuai her zo tawh lo a ni ber a, ka pa phei chuan a khawngaih lek lek zawk fo mai.
May thla a lo her chhuak ta.
Ka nau neih hun pawh a ni ve ta a, thla tawp ni 30 chuan fapa duhawm tak mai ka nei ve ta hlawl mai le..!! Ka pai laia rilru hah leh hrehawm ka tuar hnem em avang erawh chuan ka fa chu a cher reuh hle a, a hmel erawh a in rel felin a ṭha reuh hle thung mai.
Ka fapa a lo pian meuh chuan ka pai laia hrehawm leh ka nau neihna hrehawm zawng zawng chu nuaibo vekin, thinlung chhungrila lawmna nasa tak nen ka khat ta zawk a. Ka pa leh nu phei chu an tu hmuh hmasak ber a ni bawk a, kei aimah chuan an lawmin an ngaihsak zawk hial reng a ni.
Naute pawh a hriselin a ṭhang chak reuh hle a, kan chhungkua kan hlim phahin, ka naute zawng zawngin pawm ṭheuh an duh si a, ka khawih chang meuh lo hial zawk a ni, a lawmawm letling hlein ka hre nghe nghe a.
Naute kum 4 a rawn tlin chhoh chuan keimah ka la naupang bawk a, Kohhran lam aṭangte pawh chuan chanvo te min pein, min rawn chei nula leh ta viau mai a. Nu leh pa kara la awm nimahila, rei loah nuṭa ten nupui an nei ang a, keini nuthlawi nau pawm tan chuan nun a chep mai awm mang e tihte ka ngaihtuah neuh neuh ṭhin a.
Chutihlai karah ka nih ang ang a duh leh min hmangaihtu an lo awm ve zel nen, ka fapa nise, ka riahpui pawh phal lovin a pi leh pu inkarah a mu kak zel mai si a. Ani chu a ngaihtuahawm lo zawk hle hian ka hre ta zawk a.
Tichuan, keimah ang maia thlawi ve tawh, Pathlawi fanu pakhat nei tawh nen chuan kan innei veleh ta a, a fanu erawh chu a awmpui bik lo a, a nu a lo pe fel diam tawh a, ka hau ka hau ta zawk mah a.
" Fate hi duha kan neiha kan neih loh theih ngawt a ni lova, i enkawl thei rih lo a nih pawhin pek thlawt kher a ngai hleinem, malsawm dawn lohna a ni duh ngai a sin, mizo upaten an tih kha," tiin ka zilh ve mawlh mawlh a.
Kan pa nen chuan a hmasa ber a tan fanu kan nei a.
Chumi hnu kum thumnaah chuan fanu bawk kan nei leh a, a dawt leh chu fapa kan beisei ve tawh hle mai bawk a. Kan pa phei chuan fanu pa thum a nei ta a nih chu..!
Awmhmun te sawn ila, eizawnna te kan thlak ve dawn em mi niang tiin Champhai lamah kan pem phei ta a, kei lah nau ka pawm avangin engmah ka ti thei vak si lo a, kan pa chu a thiam ang anga sum zawng ve in, a changin a sumdawng ve leh zauh ṭhin bawk a, in lama a awm erawh chuan a remchang a piangah inhlawhin, kei pawhin chuk tuah huanah thlai eichawp chu ka lo thar ve mai bawk a; khawl thei lo mah ila, kan eikhawp chu kan thawkchhuak ve ngawr ngawr ang a ni.
Kan fa pathumna tur chu ka pai leh ta ngei a, kan pa pawh a phurin min duat em em mai a, hna hahthlak deuh ka thawh pawh phal loin min awl hneh hle, fapa nei ngei tawh turah inngaiin, nau puan hemna tur thlenga siam lawkin a phur em em mai a, bazara a kal leh naute mipa thawmhnaw a rawn hawn thul. Kei phei chuan duhthlan ka nei lo nain, kan pa awmdan aṭang chuan fapa hrinsak ngei chu ka duh ve ta hle mai a, ṭawngṭaia ka dil ngun ber pawh a ni nghe nghe a ni.
April thla a lo de a, nipui rawn thawt chhoh lai tak chuan nau chu ka nei leh ta a.
" Áh..!! Fanu,"
Nurse chuan a rawn tichhuak phawng mai a.
Chutah kan pa hmel ka va en chu namen lo hian a lo dur khup mai a.! Faa duhthlang thei kan nih lohzia hi a hre duh tlat lo mai a, Hospital aṭangin ina kan haw thla fel chauh chu, ka chet theih hma hma chuan,
" Fapa pawh hring thei hlei lo,"
tiin thinrim tak chuan min chhuahsan ta nal nal mai a ni. Ka rilru hi a na em em a, ka duh vanga fanu hring ka ni bik lo a, tih tak emah chuan kei chu ka fatir pawh fapa ngat a nia, ani chu a fatir pawh fanu tho a nia, fapa hring thei lo chu keimah ni loin amah ngei chu a ni reng si a, apain duh loa a tlanbosan tak ka fanu thar chu ka en a, ka lainat zual sauh nghe nghe a. Amah(naute) lah chu engmah hre lovin ka ṭang lum bêlin a muhil tak sek sek a. Mittui tla zawih zawiha thlir chung chuan:
" Bawihte, lungngai hlek suh u aw, innu ve hi ka dam phawt chuan engmah intlachham bik lo ang, nula hmelṭha leh fel ni turin ka enkawl chho khawp ang che u, in unau thum hian nula fel tak in la ni khawp ang, a dam han hauh phawt mai ila, i pa inchhirna ram ram turin lo seilian mawlh ang che u," ka ti malh malh a.
Ka fanu upa ber chu inchhunga nau veng leh tirh kual atan a tlak ve tawh a, ka chhawr ve nasa thei hle mai. Chutiang chuan engtin tin emaw kan aqm chho ve nawk nawk a, naute thla khat a tling ve ṭep tih chuan kan pa farnu nula chu min awmpui pahin, sikul kal tur chuan a rawn awm ve ta bawk a. Mahse rei vak pawh kan awmho hma chuan kan chanchin chu ka nu leh pain an.lo hre ta hlauh mai a.
Keimah tak phei chuan hrilh ka tum miah lo kha a nia, ka pasal hmasa a fuh lo tawh a, tunah lah fanu hlir hrin vang ringawtin a pain min han chhuahsan leh ta bawk si a.
Ka nu leh pa min ngaihtuah lutuk chuan ka naute rawn tirin min rawn hruai ta daih mai a, tichuan nu leh pa leh unaute nen hlim tak chuan kan awm ho leh ta raih raih a, mahse fa pathum ka hrin belh tawh a, ka fapa nen, min hauin min hmu mawh hauh lo mahse rilru chhung hi a inthlahrung du mai a ni.
Ka nau hmeichhia naupawm hi a awm ve a, hnute tui a nei ṭhain ka fa te ber leh a fa tir chu an inrual hlauh mai bawk a, kei a cher chhe chi nih bakah rilru leh taksa hah bawk si chuan, ka fa hnek khawp hnute tui ka nei zo hauh si lo a, ka nau chuan phir angin a pawm ta tawp a,naute pawn a ngeihin a mam zawt zawt ta mai a ni.
Naute thla 4 vel a ni tawh ang tih chuan a chanchin takngial pawh ka hriat tawh loh, ka fate pa chu a lo lang nawlh mai le.
Keimah pawh min pawh hmasa ngam loin ka nu leh pa a bia a, a inthlahrung lutuk chu khawngaihthlak tham a ni zawk; " Ka pu, ngaihdam tlak ni lo mah ila, ka fate vang tal pawh hian min ngaihdam a ngai si a ni, lak chhuah inphal lo a nih pawhin ka dem thei lo che u a, mahse anmahni enkawlna tal hi chu ka thawh chhuah ve min phalsak hram ang che u." a ti a.
Engpawh nise, keimah hi chuan ka fate an fahrah a, nu leh pa kar loa an seilen hi ka hlau ber a, amaherawhchu ka nu leh pa thu thuah dahin an thu ka nghak tawp mai a ni.
Palai tirin min rawn ko ta ngei a.
Ka pa chuan zahawm taka lo chhandan a thiam khawp mai :
" Â.! Ni e Pu Dawng, keini pawhin kan tu leh fate fahraha an awm chu kan hlauh ber a ni ve tho a, amaherawhchu tun laiah natna leh hri ṭha lo te a tam ve tawh avangin min lo hre thiam u la, chhungkuaah kan insiam leh dawn a nih pawhin, medical checkup neih thlap phawt u la, chu mi hnuah chuan kan ngaihtuah dawn nia; ngaihngam tak khan haw phawt mai rawh u le." a lo ti a.
A hnu chawlhkar hnih velah chuan Dortor lehkha nen thlap a lo kal lehin kan inzui haw leh ta nge nge a , ka fate nu leh pa kara awm loa an fahrah kha ka hlau ve em bawk a ni. Chutih thu loah chuan kan pa kha han thlakhlelh viau ngaihna pawh ka hre tawh mang lo zawk hial a ni.
Chutia kan haw leh ta chu mahni khuaah awm veleh tawhin, khi tah vengsang lamah kan awm ta thung a, ka nau pawm lai pawh a lian ve tawhin, a u te an changkang chho ve zel bawk a, kan khawsak pawh a ziaawm ve sawt khawp mai.
Kan fa pa 4-na tur chu ka keng veleh ta a. Mipa a duh leh duh lo pawh a sawi ngam ta bik lo a, a rilru erawh chuan a awt hle tih ka hrethiam tho a ni. Kan pa pawh a fel tawhin hna a thawk ve nasa em em a, Vaihlo hmun zau tak tak siamin, vaihlo hmun vil.pah chuan Meihawlte a rawh pah a; a nunah hian hunawl a awm ngai lo a ni ber mai.
Ṭum khat a ram riak lo haw chu tlemin a rui deuh chhalh mai a, fiamthu titak hian kan inhnial pah a:
" Fapa pawh hring thei hlei lo,"
" Â.! a ti leh ta."
" Ka ti ang chu i hring thei miau lo alawm."
" Kei chu ka fatir pawh mipa ngat a nia, nang chu hmeichhia bawk a nih kha, tunge hring thei lo zawk chu kan hriat reng alawm," tiin ka nui hau mai a.
" Ni dawn tak e, a ni leh si e." tiin a rawn nui ve ta vur vur a.
Pathiana piantharna tak tak neih loh chuan, mihring ṭhat tumna ve ngawt hi chuan daih rei mawlh hek lo le, kan pa chuan hnathawk nasain hah viau ṭhin mahse zu in a ching chho leh tial tial mai a, engpawhnise, a ṭhat lohzia hrilh ila, Vanram lah tumah inkai kep theih a ni si lo va, mahni rinna ṭheuh a kal leh kal loh tur a ni mai a, vawikhat na reng reng hrilhfiah erawh chu ka ba vein ka inhria a; uluk zet chuan ka hrilh leh ta dap a.
Mahse a pawm leh pawm loh chu ama thu thu a ni tawh a, ka thiang tawh alawm tiin ngaihṭha takin ka awmsan ta a. A sim loh pawhin ka fate pa a ni a, nupa keh kara fate an awm ai chuan tiin, engti pawhin khawsa sela, ṭhen hi ka tum ta lo bur mai a ni; ka fate puitling taka enkawl kha ka tum ber a. Faten 'Papa,' an tih changa a lo eih lauh theih chuan ka duhtawk ta viau mai a, rilru a leh hahdam duh phian mai. Zu chu thlah lo mahse a hnathawh erawh a bei ngawrh em em mai thung a, ka nauten " rawn hawnsan mai teh," an tih chang pawh hian,
" Lo enliam ve mai mai teh u, zu hi inin sual viau mahsela, hna hi a thawk nasa em a sin." tiin a thlavang ka hauhsak zawk ta fo mai a.
Engvang pawh nise, ka fate vang hian tuar chhuah hi ka tum ruh em em mai a ni.
Ni khat chu chawhnu tlai lam deuh hian ka pum a rawn na ngaih ngaih mai a, kan pa pawh chu a ram riak a lo haw ve lai tak a ni bawk a, zanriah chaw pawh ka ei thei mumal ta lova, zan dar 8:30 velah chuan nau chu ka nei ve ta hlawl mai a. Kan health worker chuan:
" Ahh..!! Awi fapa.!"
Kan pa te ṭhian ho choka lama awm chu an rawn tlan thla a, mipa a ni ngei em? tiin naute mawng chu an rawn hlim ta diat diat a.
Kan kawmchhak chiaha awm Pu Thana hian fanu hlir pathum a nei a, keinin chuti bawk, kan kawm thlanga awm Pu Nuna leh a thlang leh ami pu Sanga pawhin a nu bawk pathum neiin, kan tual sir deuha awm Pu Liana erawh chuan fanu pathum tho a nei bawk a. Kan veng hi fanu veng aniange an ti hial ṭhin a ni.
Chutia fapa ka han hring ta chu namen lo hian kan lawm ve a, hemi zan hi chu naute pawh kan tuam lum hman lo a chha chu a ni ber e, a khat tawk hian:
" Khawmaw, a lo pa tak tak em le?"
an ti chhen mai a ni.
Mipa leh hmeichhia Pathianin min siam hian, Hmeichhe chiah hian Chi X chiah a dah a, X hi hmeichhe naute tur insiamna a ni a. Chi X leh Y awm leh a, he chi Y hi mipaah chauh a dah ve thung a, tichuan, mipa leh hmeichhia kan inpâwl a kan chi a lo infin tak khan, Mipa chi Y leh hmeichhe chi X lo intawng fuh a, chinunga a lo ṭhan chhoh khan mipa naute a lo insiam ta a; hmeichhe chi X leh mipa chi X a lo intawng a, chinung niin a lo ṭhang chho ve a, chutah chuan hmeichhe naute a lo piang ve ta thung ṭhin a ni.
Hei hi tam takin kan hre fuh lova, kan nupuite puhin kan nupa kar a khik phah fo ṭhin a, fapa neih theih loh hi kan inpuh dawn rau rau a nih chuan, mihringah chuan mipa mawhphurh a sang zawk mah a nih chu.
Mahse fa kan neihdanah hian kan thu a nih lohzia hi chu a takin a lo lang leh ṭhin chu a nih hi. A enga pawh lo piang se, Pathianin kan enkawl tura min pek phal apiang kha an ṭha ber vek mai tih hi pawm thiam a ṭha hle mai.
Entirnan : Tuai leh Patil kan tih ang chi pawh hi hmusit a, endawng ngawt theih an nih lohna chin a awm ve tlat mai.
Mipa chi leh hmeichhe chi a lo intawng fuh kha, chakna inzat zelin a ṭhang chho ta a. Hmeichhe serh nei reng chung si khan, a taksa a mipa nihna leh ṭhang lian bik zelin, hmeichhia nichungin a lo pa ta em em mai ṭhin a ni. Chutiang bawkin mipa serh nei reng pawh kha a taksa a chi inpawlhah khan hmeiche chi lo ṭhang chak zawk zelin, tuai a lo ni ta mai ṭhin a ni.
Kan chhungkua a keh chhiat loh nan theih tawp tak meuh ka chhuah ve ṭhin a, ka faten a pa an ngainat theih nan ka bei nasa ṭhin hle.
Kan pa farnu sual ve deuh mai hi vawi khat pawh a lo zin a, chaw kan ei dawn chuan naupang ka va kaihthawh tir a, " ka ei peih lo, lo va ei rawh u." a lo ti sia kan ei san ta a, naupang rual nen kan ni ve tawh a, chawhmeh pawh duhthusamin a neih theih tawh bik lo a.
Kan farnu chu ka inkhawm ka ban chuan a lo ṭhu tum buau mai a, engkhaw sawi set set lo chuan kan pa chuan ka inkhawm bang chu :
" Chhuak rawh, haw rawh, ka farnu pakhat takngial pawh ngaithei lo hi ka nei peih tawh lo che,"
Ka fate rawn bang ve chuan hrilhhai takin min enṭhap hlawm a, a pa ánhla aṭang chuan thil awmzia an man thuai a.
" Pa, Nani thiam loh a nih kha, kan kaithova, a rawn kal duh si lo,kan kham veleh a rawn vui leh bawk sia," an lo ti ve tliar tliar hlawm a.
Apa thinrim zual chhung chu ka nu te inah ka chhuk thla daih a, tlai lamah chuan naupang ho min rawn lam tir veleh mai bawk a. Kei pawh ṭha takin ka chho leh a, kan farnu erawh chu a mize dik lo a u in a hriatchhuah tak avangin a a haw ta nal nal mai a ni.
Huat leh hmuhmawh tur hi a hre thei em em mai a, mahse ka rilru ka ti khauh lui tlat a,
" Ka fate hi mipuitling takah ka chhuah tur a ni," tiin.
Ka ṭawngṭai sak reng a, a sual zual chang phei chuan kutte min thlak thuak thuak a, mahse kei chuan ka tuar tam tawhin, vanglai hmabak pawh ka nei tawh vak lo a, ka fate an fahrah ai chuan ka tuar zel law law ang a, naupang ho lo puitlinga nikhua an rawn hriat hunah ka nuam ve deuh mahna ka ti tawp mai a ni.
Ka chungah chuan engpawh thleng se pawi tih vak ka nei lo a, amaherawhchu ka fate enkawl thei loa ka awm mawlh ka hlau thung ṭhin.Rilru leh taksa a rethei a, bei hi a dawng ve rum rum mai ṭhin a ni. Mahse ka fate hian chakna min pe zel a, anmahni vang hian ka guar thei zel a ni ber mai.
Vawikhat chu speaker R Lalbiaksanga hi a lo kal a, chumi ṭum chuan kan pa pawh campah a lut ve a, Pathian khawngaihna changin a rawn inhmu chhuak ve hlauh mai a. Lalpa hian bang lova amah au a dil reng ṭhintu, kei a fanu lungmawl tein ka auhna hi min hawisan lo tih ka hrechiang hle a ni.
Hun thim leh harsa zualpui ka tawn chhung kha a kum chuan kum 15 dawn chu a lo ni reng mai le..!! Engtinnge ka lo tuar chhuah theih zawk ka ti let ve fo zawk ṭhin a, khang hun harsa ber ka tawh lai .pawh khan ka fate zirna hi ka thlahthlam ngai miah lo a, a pa phunchiar leh kawhmawh bawl a nasat lai vel zawng zawng khan zirna vangin Aizawlah anmahni unau a inluah ve in, ṭul tawpah lo chuan an lo haw pawh hi ka remti ngai vak lo zawk a ni.
A chhan chu, a pa vanga ka tuarna leh apa mize ṭha lo lai kha hmu tam lo se ka duh vang a ni bawk a, an pa ve em em hi hmusita an ngainat loh phah te ka hlau bawk a ni.
Kum 15 chhung vel rethei leh rilru hah taka ka awmna chu a lo kiang ve ṭan ta a. Ka pasal duhtak chu piang tharin, inkhawm turin min kalsan ta fo mai a, a dama khawchhunga a awm a nih chuan inkhawm a ṭhulh ngai lo mai ni loin, Bible chhiar leh ṭawngṭai a taima em em a, Pavalai rawngbawlna leh Kohhrana a phak tawkah a tlanchhe ngai hek lo, keipawh kan fanaute buaipuiin, an unau enkawl a hautak chho ve zel nen, kan pa hnung hi ka zui zo lo zawk fo ṭhin a ni.
Chutianga hlim leh lawm taka chhungkua kan kal chhoh ve zel lai chuan In thar te kan sa ve a, mi in tluk mah suh se, keini tan chuan a hlu tak zet a, a chhung lam duhthusama kan chei zawh hma chuan kan insuan lut ta nghe nghe a, a chhan chu kan pa chuan insawiselna a ngah ve neuh neuh a, incheckup pui vat ka duh vang a ni.
Kan fapa pawhin pawl 12 a zir zo tawh a, a u chiah hmeichhiain Bcom zo ve in, chu mi u leh chuan BA 1st Divah zovin, a upa ber hmeichhia chuan Delhi lamah Hotel management lam a thawk thung a. Ani pawh hian Hindi BA a zir thleng ve bawk a ni.
Chutianga chhungkua kan hlim chhoh ve viau lai chuan kan pa ber chu Thin cancer a ni tih hmuh chhuah a ni hlauh mai a, aw kan hlim ve dawn chauh a, Pathian remruat hi a va mak ṭhin em ka ti vawng vawng mai a.
January thla a kan incheckup chu kan haw chho leh a, Ṭawngṭai damthei leh kan pan phak apiang chu kan pan ve zel a, Aizawl lamah pawh kan inphur thla ve zut mai, chutianga theihpatawp chhuaha kan in enkawl lai chuan a taksa a lo chak lo ve tial tial a, April thlaa Aizawla kan chhuk leh chu Chawl muang loin Falkawnah min phei tlang tir nghal a, Falkawnah ni 10 zet zawt kan awm hnu chuan ICU-ah min sawn ta a.
Chutah pawh chuan engmah kan an theih tak loh avangin, Aizawl Civil Hospitalah min sawn phei lehin, ICU-ah bawk chuan min dah leh ta a.
Hetianga anat leh enkawl ngaia a awm chhung hian vawikhat te pawh a phunnawi miah lo a, hmel hlim sar mai hian a nui thei reng mai a, ICU a a awm lai a a ṭawng theih chhunah chuan, " Mafel, Anutei chu ka va ngai em.!" tiin ka nau amah enkawl taima em emtu chu ala lam hram hram a ni.
ICU a kan luh hnu zan dar 6:45 velah chuan hmel hlim sarh mai a min rawn en chungin, thlamuan hmel em em hian Lalpa hnenah min haw san ta a ni.
Pasal sûn chu Dar dinglam sahthlak an lo tehkhin ṭhin hi chu an lo uar hauh lo mai le, upat lam panin kum 50 kan hmang ve ṭan chauh a ni a, chutah mah kan pa nun ṭha leh fel a inṭan ve chiah a, kan hlim ve dawn chauh a ni lehnghal si.
Lalpa hnenah pawh ka vui lek lek zawk hial a, mahse ani(Lapa) chuan min thlamuan chungin nka thinlungah thu a sawi a,
" A sual lai zawng zawng khan thi tlak a ni si lova, tunah mifel niin nang pawhin i thlahlel em em a, kei pawhin a fel leh ṭha te hi ka duh ve tho va, tunah zawng thi tlak khawpin a fel ve ta a, lawm zawk ta che, ka thlahthlam dawn lo che, i kiangah ka awmin ka thlamuan zel dawn che alawm. Kum kha leh chen sual dova i mittui tla ṭhin kha ka hruk fai sak tawh che a, i do chu i hneh a, i pasal leh fanaute pawh ka hnen i rawn hruai thleng alawm;
" KA HNEH VE TA,"
tiin lawmthu min hrilh zawk dawn lawm ni? ka fanu,"
tiin.
A tawp ta.🌹
By ..T Mawii,
Mahni tawka duhthlang ve thei inti ngat, duhthlanna erawh nei thiam vak si lo ka ni a, (hming leh khua hi thup ang aw)
Ka rawn tleirawl chhuak chu nun hi nuam ka ti ve khawp mai, Tleirawl tet aṭangin Kohhran upa fa tih takah Kohhran ka bel chawt a, ka thi deuhthaw a nih loh chuan inkhawm leh Kohhran thiltih ka thlahthlam ngai lo a ni ber.
Kum 18 ka kai ve dawn chiah a, ka u te pahnih nula kum 20 leh 23 mi a kum zâwnin an thi ta si a. Chhungkaw rinrawl berah ka ṭang lo thei ta lova, sikul pawh kal zaqm thei lovin, High sikul ka rap ṭan chauh tih chuan chhungkaw harsatna avangin ka chawl hlen ta a ni.
Kum 20 ka kai ve ta.
Duhtu tam tak nei ve chung khan duh chu ka thlang ve ta ngei mai a, kan khaw tlangval hmelṭha zet mai, pa te chhe lem lo tak leh pian pawh nalh tak mai, mi ṭhenkhat erawh chuan 'a kawtlai mi em mai, sakhua a ngaihsak si lo,' ti a an sêl ruk deuh nen chuan inzui chho vein, kum tawp lamah chuan mi zawng zawng mak tih luai luai chung leh, ka nu leh pa rilru na em em chung chuan kan tlan dùn ve ta rawih mai a.
" Awi, mak ka ti lutuk, kan khaw nula sakhawmi ber mai leh, kan khaw tlangval kawtlai mi ber mai an innei chu a nia, Mafeli chu ka uiin, a mi duhzawng chu ka rin a lo va ang lo tak em..!!" tih chu mi tam zawk titi leh an inhrilh chhawn dan a ni a.
Kei erawh chuan,
" Kan innei anga, a nun hi chu ka siam ṭha thei ngei ang," tih rilru kha ka pu ve tlat mai si a.
Ka nu leh pa chu an rilru na hle mahse:
" In nupui/pasal tura induhthlanaah kan inrawlh lo vang, thurâwn kan pe vek tawh che u a, induha inneih chu kutdawh pawh nise kan pawt kir lo ang che u, inthlan fuh leh in vannei ang a, fuh loh leh invanduai a ni mai," an tih ang ngei chuan min pawh kir chu an tum hauh lo mai a.
Chutia innei ve ta chu ama inluahah chuan kan lut ve ta rawih a, tlangval parawl tih takah a inchhung pawh a tlabalin, bungbel lah engmah a awm mumal hek lo. Kan insawi fel hnu chuan kan inpui lamah chuan kalin, bed sheet leh mamawh zual ang ang chu ka fawm khawm ve nasa hle mai a.
Ka tleirawl deuh lai khan ka venneih asiamin, Anganwadi Worker hna ka hmu ve hlauh mai bawk a, Aizawlahte trainingin ka awm phah ve reng nghe nghe a, tin, hei hian kan khawsak harsa lutuk tur pawh min save sak ve nual reng a ni.
Duh leh duh intawng ve ta chu kan hlim ve khawp mai a, hlim lah kan hlim ve na laileng e. Chutiang chuan kan awm chho ve nawk nawk a, hun a lo rei deuh chuan, Kohhran dan chhungah te lutin, kei naupan lai aṭanga sakhaw bel tlat chhungkua aṭanga chawr chhuak ta chu ka lung lengin ka inkhawm veleh ta zauh zauh a, ka pasal pawhin min khak hran lem lo.
Chutianga kal chho zel chuan ka inkhawm tam ve tial tial a, kan pa pawh chu ka sawm fo bawk a, ani erawh chuan inkhawm chu a ngaihsak duh chuang ta hlei lo a. Keimah chuan ka theih tawk tawk a inkhawmin, chaw ei dawn leh chawlhni tuka chhung inkhawmte ka neihpui ta zel a, ngawi reng leh min hnial lem lo chuan a awm ṭha ve mai zel bawk a; hun hmang ve tura ka sawm erawh chuan min hnial fithla ṭhak ṭhak thung ṭhin a.
" Nangman i hman kha a tawk," tiin.
Kum a lo vei meuh chuan kei pawhin nau hial ka lo keng ve ta a, nau ka pai chinah phei chuan inkhawm leh ṭawngṭai chu a hma aimahin ka uar leh zual ta a, ka fa tan chuan nu entawntlak tak nih ka tum ve tlat a ni.
Nau ka pai chu kan hlim nupa ve khawp mai a, ka thleng sil leh eirel laia Gas bula ka awm lai te hian ka hnung lamah min rawn vehin, ka kawngah min kuah a, ka pum chul chung hian kan fa tur chu biain, min chhaih pah a,min duatna leh duhsakna kawng hrang hranga lantirin, min hmangaihzia thu min hrilh nawn sap sap ṭhin a; ka lo beisei leh thlakhlelh em em nun chu ka tawng chho ve ta zel a ni.
Naupai erawh ka haw phian a, chaw ka huain kan ei ngun ber Maian te lah chu ka hmuh ngawt pawhin ka luak hi a chhuak ut ut mai ṭhin a. Chaw lum ka ngei a, 'chaw rim a nam em mai,' ka tih laiin, chaw ṭhing leh dai erawh ka ti thei ṭhak bawk si lo.
Lui lam sa ka ei chak thu ka sawi chuan ka putea chuan a fapa Luiah a lo kal tir a, a tuk zingah chuan sangha tharlam tak mai, la khu vang vang mai Khuhhriang lian khat lawih mai a Nghatak leh Lengphar pum ṭhiau mai min rawn pe chu, a rim ngawg pawh khan ka ril a ti ṭam vawng vawng mai nia. Kan pa takngial pawhin lawmthute a lo hrilh ve nual nghe nghe a.
Ka raino chaw huat pawh thla 2 hnu velah chuan reh chhoin, ka chaw ei pawh a tui leh ṭan tawh a, ka naupai pawh thla 4 a lo kai ve ta reng mai. Inkhawm leh ṭawngṭai ka uar sauh sauh a, a theih hram chuan hritlang leh khawsik satliah vel chuan ka inkhawm min ṭhulhtir pha lo a, tin, ka nu leh pa te pawh tibuai lo a awm hram hram.ka tum bawk ṭhin.
Chutianga ṭhahnemngai taka hun ka hman chhoh lai chuan kan pa erawh a lengchhuak tam ve tial tial thung a, a nu, amah hringtu hian pasal dang nei tawhin, kan khua Hmunṭha-ah hian a awm ve nghe nghe a. Tuna a pasal nen pawh hian fa puitling pali lai an nei tawh nghe nghe a ni.
Kan inneih tirh lama min tlawh ṭha duh hlei lo kha an lo leng ngunin, kan pa lah chuan kei aimah hian a lo ngaihsak zawk ṭhin bawk a, ka ṭha en ve tawp zel mai a.
Zankhat ka inkhawm bang chu ka rin loh deuh mai hian kan pa chu inah a awm ve tih hriat deuh mai hian kan in chu a lo eng ve pap mai a, lawm taka inchhung ka lut tur chu kawngka a lo inkalh tlat mai le..!!
" U Zual, kawngka lo hawng teh,"
Chhanna ka dawng miah lo va.
" I mu em ni? Kawngka lo hawng teh,"
ka tih nawn leh pawh chuan chhanna ka hmu ta chuang lova, ka nu te in hi kan inpiah maia awm a nih vangin ka chawl phei mai mai teh ang tiin ka lut phei ta a. Ka len luh khat em avangin ka nu chuan,
" Â..! Mafeli ve mial chu," min lo ti nghe nghe a.
Ka pa pawh chuan,
" Mafel, innpa a leng em ni? nang ngial i lo thlen phei ve chu," a lo ti bawk a.
" Aw, zanin chu a leng chhuak ve aniang,"
tiin ka pha nawi niah niah a, ka nu leh pa bulah chuan engmah ka sawi duh ta lo va.
Mawi tawk ka ṭhut ve hnu chuan ka nu chuan,
" Mafel, va haw tawh, pasal te lo haw laia awm loh chu a mawi ngai lo a nia,"
" Aw le,"
Ka tho ṭaih ṭaih a, ka lung erawh a chhe ru hle a ni. Ka nu leh pa bulah erawh ka thup ve ṭang ṭang thung a, an thu lova kal cbhuak ka ni si a. An rilru tihhah ka duh lo a ni, an hriat phawt chuan an mi hmangaihna vangin an na ngei anga, chu chu ka duh si lo a ni.
In ka va thlen chuan kawngka chu a lo inkalh tawh lova, mahse muhil nghet tak ang hian a lo awm tlat a, kei pawh chu ka ṭawngṭai a, a bulah chuan ka mu zui ve ta nghal a. Engmah sawi chhuak lem lo chuan ka mu meng reng a; awm erawh a nuam fahran lo hle mai.
A tuk zingah chuan ka zawt ta tho va.
" I lo haw huna ai lum atan tiin mei ka lo chhem a, mahni chauh chuan a khawharthlak em mai tiin ka lo mu zal a, kawngka ka kalh lai ka hre lo reng reng,"
a ti ve tlat mai a.
Kan kawngka hi kan nupa a pawn lama kan chhuak a nih loh chuan kan kalh ngai hauh si lova, thu tak min hrilh erawh ka ring lo ru viau nain ka hnial zui ta lem lo a. A vawi khatna a tan ka pasal chu
*Ka ringhlel ve ta a*.
Chumi kar lehah chuan,
" Lenchhuah lawkna tur ka nei a,"
a tia.
" Khawiah?"
" Ka nu te inlamah, i chhungte ngawt hi kan ti hluau reng a,"
" Ka lo kal ve ang e,"
" A ngai lo e, i pa te bulah lo awm la, ka rawn sawm haw ang che,"
Ka nu te tualah chuan kan inṭhen a, a kal ta nal nal a.
" U Zual, lo haw har vak lo la, ka lo nghak reng ang che,"
Min chhang lem lo chuan a lo hawi zawk a, a kal liam zui ta a. Kei pawh ka nu te inah chuan ka lut zui ve ta a.
" Mafel, teh hlawl che chuan, inpa khawnge?"
"A nu te inah a kal dawn a, tah hian min lo nghak la ka rawn sawm haw ang che, i leng khát bawk si a,"a ti a,tah hian ka lo nghak mai ang," ka ti ve zaih thung a.
Zan dar 9 velah pawh a lo la haw loh avang chuan keimahin ka haw phei a, kan kawngka chu chhung lamah a lo inkalh leh ta a. Min theihnghilh palh a nih ringin ka ko dat dat a, nasa deuh a kawngka ka sawi vak vak hnuah chuan, tho phang hmel tak hian a rawn hawng ve hram a. Min be zui ta lo chuan a mu lehnghal ta daih a. Ka rilru te te chuan,
" Eng nge maw dik lo chu a awm a ni,"
ka ti ru neuh neuh a.
Ka nu leh pa hnenah engmah ka sawi ngai lo a,mahse loh theih loh va an hriat hun chu a lo thleng ta tho va.
Ka nu te hnenah min dah a,min lam loh fo avang chuan ka pa chuan:
" Mafel, engmah zep loin han sawi teh le,tun hi a vawikhatna chauh chu a nih hmel loh a ni, i hmel leh awmdan hian tunhma kha a pha tlat lo mai," a ti chhuak ta phawng a.
Hemi zan pawh hian ka haw phei kawngka alo inkalh leh si kha,ko duh tawh loin ka pa te hnen ka pan leh a,a vawi 5-na lai a nih tawh avangin em em a ka ti ve ta deuh a ni.
Ka pa hnenah chuan engkim ka hrilh ta vek a.
" Kan fanu duhlai i ni a, i inthlahrung mah mah a nih chu, eng hunah pawh lo haw dawn la, mianglo leh rualbanlo hial pawh lo ni palh ta la, kan hmangaihna che hi a pangngai reng; a duh leh loh che a nih pawhin ṭha takin sawi ang hmiang, ka fanu mizia ka ngaihtuah hian, i tuar nasa hle tawh ang tih ka ring tlat a ni, kan thu loa kal chhuak i nih vang hian i inkiltawih rei mah mah tawh a ni; nupa kawngka inkalh hnan fo mai hi thilthiang pawh va ni suh." a ti ta bawrh bawrh mai a.
Ka pa thinrimna hi a awm viau mai a, bakah ka mizia a hrechiang tawk ve bawk si a. Min dem a, min han zilh deuh pawh a tum miah lo hian min hmangaihzia a pho lang chiangin, kei a fanu mizia hi a chiang hle tih a hriat mai a ni.
Tichuan ka nu leh pa hnenah chuan ka riak ta a, nau ka pai hrâm ve ṭan tawh nen, ka nu leh pa thin chu a rim em em mai a, ka naute erawh an la naupang deuh hlawm nen engmah an sawi ve lem lo nain, ka haw leh chu an lawm ve hle tih an hmelah a lang reng mai a; a bik takin ka chhang chhang leh hmeichhia phei chu a lawm zual hle a ni.
Zingah chuan ṭha takin U Zuala chu a lo kal a, " haw tawh ila, i leng rei tawh alawm," a rawn ti vei ngial a.
" Ka léng lo,"
" I in a nih tawh loh hi,"
" Ka nu leh pa hnenah ka haw tawh a, ka in a ni tawh."
Ka pa chuan,
" Zuala, haw phei rawh, keini pawhin Mafeli thawmhnaw hi kan rawn la har lo vang."
" E ..ka pu, ka ṭhen reng reng lo a nia."
" Hausa lo teh mah ila, ka nupui fanau chawmna khawp chu ka thawk chhuak ve asin, i nawm i maka kawngka i kalh hnana i hnawhchhuah a, i vahvaihtir mai mai turin ka fanu hi ka hring lo. Hmangaih leh duh taka i enkawl peih chuan tiin ka rawn ngaihven lo mai a ni e, ka fanu duhlai a nih hi," a ti ve ta bawrh bawrh mai a. Ka pa thin kha a ur ve thlawt a ni.
Engang pawhin min rawn ko leh mahse hawn leh chu ka tum ta lo bur bawk a. Ka rilru a ti chawlawl vek tawh tlat a ni.
A tuk lehah chuan ka bungraw la tur chuan chhungkhat hnai zual kan sawm a, kan va phei ta a. Lak chu a lo phal ta awzawng lo mai a, ka tihngaihna hre lo leh ṭhen ngei duh si chuan ka pa leh ka Putea chu ka va kohtir ta tawp a, ka pa lo thlen chuan ka pa ke vuanin ngaihdamte a lo dil vel a..!!
Keiman ṭhen ka tum tawh em avangin ka pa pawh ka hrilh vek tawh a, chuvang chuan ka pa leh ka putea pawh an khauh far tawh reng a ni.
Ka bungraw chhawm ngei leh ka bed sheet vel kan lak vek chuan chan tur a nei dawn si lova, double bed sheet chu kan phel ta vek a, mutbu fumfe a neih si loh avangin mutbu ṭhenkhat pawh chu kan dahsak ta hial a. Ka pa chuan :
" Mafel, engmah ui suh, kan fapa ve tho a nia, a mamawh tur kha chu dah vek mai rawh, kan indan ve na ni mai se la, kei pawh fapa indang neiah ka inngai mai e; nangmah kan chan che chuan a tawk lutuk alawm." a ti ṭha ve mai a.
Tichuan kan inla chhuak fel ta a.
Pathian zarah kei chu ka awm thei viau mai, U Zuala zawk chu a talbuai deuh hlek ṭhin pawh a. A changin ka pa hnenah chuan ngaihdam a dil a, a chang leh a vau thul, a chang phei chuan kan in lama rawn awm ve te a tum ang ut ut a. Mahse, eng kawng hawi mahin ka pa nena kan rilru chu a kuai her zo tawh lo a ni ber a, ka pa phei chuan a khawngaih lek lek zawk fo mai.
May thla a lo her chhuak ta.
Ka nau neih hun pawh a ni ve ta a, thla tawp ni 30 chuan fapa duhawm tak mai ka nei ve ta hlawl mai le..!! Ka pai laia rilru hah leh hrehawm ka tuar hnem em avang erawh chuan ka fa chu a cher reuh hle a, a hmel erawh a in rel felin a ṭha reuh hle thung mai.
Ka fapa a lo pian meuh chuan ka pai laia hrehawm leh ka nau neihna hrehawm zawng zawng chu nuaibo vekin, thinlung chhungrila lawmna nasa tak nen ka khat ta zawk a. Ka pa leh nu phei chu an tu hmuh hmasak ber a ni bawk a, kei aimah chuan an lawmin an ngaihsak zawk hial reng a ni.
Naute pawh a hriselin a ṭhang chak reuh hle a, kan chhungkua kan hlim phahin, ka naute zawng zawngin pawm ṭheuh an duh si a, ka khawih chang meuh lo hial zawk a ni, a lawmawm letling hlein ka hre nghe nghe a.
Naute kum 4 a rawn tlin chhoh chuan keimah ka la naupang bawk a, Kohhran lam aṭangte pawh chuan chanvo te min pein, min rawn chei nula leh ta viau mai a. Nu leh pa kara la awm nimahila, rei loah nuṭa ten nupui an nei ang a, keini nuthlawi nau pawm tan chuan nun a chep mai awm mang e tihte ka ngaihtuah neuh neuh ṭhin a.
Chutihlai karah ka nih ang ang a duh leh min hmangaihtu an lo awm ve zel nen, ka fapa nise, ka riahpui pawh phal lovin a pi leh pu inkarah a mu kak zel mai si a. Ani chu a ngaihtuahawm lo zawk hle hian ka hre ta zawk a.
Tichuan, keimah ang maia thlawi ve tawh, Pathlawi fanu pakhat nei tawh nen chuan kan innei veleh ta a, a fanu erawh chu a awmpui bik lo a, a nu a lo pe fel diam tawh a, ka hau ka hau ta zawk mah a.
" Fate hi duha kan neiha kan neih loh theih ngawt a ni lova, i enkawl thei rih lo a nih pawhin pek thlawt kher a ngai hleinem, malsawm dawn lohna a ni duh ngai a sin, mizo upaten an tih kha," tiin ka zilh ve mawlh mawlh a.
Kan pa nen chuan a hmasa ber a tan fanu kan nei a.
Chumi hnu kum thumnaah chuan fanu bawk kan nei leh a, a dawt leh chu fapa kan beisei ve tawh hle mai bawk a. Kan pa phei chuan fanu pa thum a nei ta a nih chu..!
Awmhmun te sawn ila, eizawnna te kan thlak ve dawn em mi niang tiin Champhai lamah kan pem phei ta a, kei lah nau ka pawm avangin engmah ka ti thei vak si lo a, kan pa chu a thiam ang anga sum zawng ve in, a changin a sumdawng ve leh zauh ṭhin bawk a, in lama a awm erawh chuan a remchang a piangah inhlawhin, kei pawhin chuk tuah huanah thlai eichawp chu ka lo thar ve mai bawk a; khawl thei lo mah ila, kan eikhawp chu kan thawkchhuak ve ngawr ngawr ang a ni.
Kan fa pathumna tur chu ka pai leh ta ngei a, kan pa pawh a phurin min duat em em mai a, hna hahthlak deuh ka thawh pawh phal loin min awl hneh hle, fapa nei ngei tawh turah inngaiin, nau puan hemna tur thlenga siam lawkin a phur em em mai a, bazara a kal leh naute mipa thawmhnaw a rawn hawn thul. Kei phei chuan duhthlan ka nei lo nain, kan pa awmdan aṭang chuan fapa hrinsak ngei chu ka duh ve ta hle mai a, ṭawngṭaia ka dil ngun ber pawh a ni nghe nghe a ni.
April thla a lo de a, nipui rawn thawt chhoh lai tak chuan nau chu ka nei leh ta a.
" Áh..!! Fanu,"
Nurse chuan a rawn tichhuak phawng mai a.
Chutah kan pa hmel ka va en chu namen lo hian a lo dur khup mai a.! Faa duhthlang thei kan nih lohzia hi a hre duh tlat lo mai a, Hospital aṭangin ina kan haw thla fel chauh chu, ka chet theih hma hma chuan,
" Fapa pawh hring thei hlei lo,"
tiin thinrim tak chuan min chhuahsan ta nal nal mai a ni. Ka rilru hi a na em em a, ka duh vanga fanu hring ka ni bik lo a, tih tak emah chuan kei chu ka fatir pawh fapa ngat a nia, ani chu a fatir pawh fanu tho a nia, fapa hring thei lo chu keimah ni loin amah ngei chu a ni reng si a, apain duh loa a tlanbosan tak ka fanu thar chu ka en a, ka lainat zual sauh nghe nghe a. Amah(naute) lah chu engmah hre lovin ka ṭang lum bêlin a muhil tak sek sek a. Mittui tla zawih zawiha thlir chung chuan:
" Bawihte, lungngai hlek suh u aw, innu ve hi ka dam phawt chuan engmah intlachham bik lo ang, nula hmelṭha leh fel ni turin ka enkawl chho khawp ang che u, in unau thum hian nula fel tak in la ni khawp ang, a dam han hauh phawt mai ila, i pa inchhirna ram ram turin lo seilian mawlh ang che u," ka ti malh malh a.
Ka fanu upa ber chu inchhunga nau veng leh tirh kual atan a tlak ve tawh a, ka chhawr ve nasa thei hle mai. Chutiang chuan engtin tin emaw kan aqm chho ve nawk nawk a, naute thla khat a tling ve ṭep tih chuan kan pa farnu nula chu min awmpui pahin, sikul kal tur chuan a rawn awm ve ta bawk a. Mahse rei vak pawh kan awmho hma chuan kan chanchin chu ka nu leh pain an.lo hre ta hlauh mai a.
Keimah tak phei chuan hrilh ka tum miah lo kha a nia, ka pasal hmasa a fuh lo tawh a, tunah lah fanu hlir hrin vang ringawtin a pain min han chhuahsan leh ta bawk si a.
Ka nu leh pa min ngaihtuah lutuk chuan ka naute rawn tirin min rawn hruai ta daih mai a, tichuan nu leh pa leh unaute nen hlim tak chuan kan awm ho leh ta raih raih a, mahse fa pathum ka hrin belh tawh a, ka fapa nen, min hauin min hmu mawh hauh lo mahse rilru chhung hi a inthlahrung du mai a ni.
Ka nau hmeichhia naupawm hi a awm ve a, hnute tui a nei ṭhain ka fa te ber leh a fa tir chu an inrual hlauh mai bawk a, kei a cher chhe chi nih bakah rilru leh taksa hah bawk si chuan, ka fa hnek khawp hnute tui ka nei zo hauh si lo a, ka nau chuan phir angin a pawm ta tawp a,naute pawn a ngeihin a mam zawt zawt ta mai a ni.
Naute thla 4 vel a ni tawh ang tih chuan a chanchin takngial pawh ka hriat tawh loh, ka fate pa chu a lo lang nawlh mai le.
Keimah pawh min pawh hmasa ngam loin ka nu leh pa a bia a, a inthlahrung lutuk chu khawngaihthlak tham a ni zawk; " Ka pu, ngaihdam tlak ni lo mah ila, ka fate vang tal pawh hian min ngaihdam a ngai si a ni, lak chhuah inphal lo a nih pawhin ka dem thei lo che u a, mahse anmahni enkawlna tal hi chu ka thawh chhuah ve min phalsak hram ang che u." a ti a.
Engpawh nise, keimah hi chuan ka fate an fahrah a, nu leh pa kar loa an seilen hi ka hlau ber a, amaherawhchu ka nu leh pa thu thuah dahin an thu ka nghak tawp mai a ni.
Palai tirin min rawn ko ta ngei a.
Ka pa chuan zahawm taka lo chhandan a thiam khawp mai :
" Â.! Ni e Pu Dawng, keini pawhin kan tu leh fate fahraha an awm chu kan hlauh ber a ni ve tho a, amaherawhchu tun laiah natna leh hri ṭha lo te a tam ve tawh avangin min lo hre thiam u la, chhungkuaah kan insiam leh dawn a nih pawhin, medical checkup neih thlap phawt u la, chu mi hnuah chuan kan ngaihtuah dawn nia; ngaihngam tak khan haw phawt mai rawh u le." a lo ti a.
A hnu chawlhkar hnih velah chuan Dortor lehkha nen thlap a lo kal lehin kan inzui haw leh ta nge nge a , ka fate nu leh pa kara awm loa an fahrah kha ka hlau ve em bawk a ni. Chutih thu loah chuan kan pa kha han thlakhlelh viau ngaihna pawh ka hre tawh mang lo zawk hial a ni.
Chutia kan haw leh ta chu mahni khuaah awm veleh tawhin, khi tah vengsang lamah kan awm ta thung a, ka nau pawm lai pawh a lian ve tawhin, a u te an changkang chho ve zel bawk a, kan khawsak pawh a ziaawm ve sawt khawp mai.
Kan fa pa 4-na tur chu ka keng veleh ta a. Mipa a duh leh duh lo pawh a sawi ngam ta bik lo a, a rilru erawh chuan a awt hle tih ka hrethiam tho a ni. Kan pa pawh a fel tawhin hna a thawk ve nasa em em a, Vaihlo hmun zau tak tak siamin, vaihlo hmun vil.pah chuan Meihawlte a rawh pah a; a nunah hian hunawl a awm ngai lo a ni ber mai.
Ṭum khat a ram riak lo haw chu tlemin a rui deuh chhalh mai a, fiamthu titak hian kan inhnial pah a:
" Fapa pawh hring thei hlei lo,"
" Â.! a ti leh ta."
" Ka ti ang chu i hring thei miau lo alawm."
" Kei chu ka fatir pawh mipa ngat a nia, nang chu hmeichhia bawk a nih kha, tunge hring thei lo zawk chu kan hriat reng alawm," tiin ka nui hau mai a.
" Ni dawn tak e, a ni leh si e." tiin a rawn nui ve ta vur vur a.
Pathiana piantharna tak tak neih loh chuan, mihring ṭhat tumna ve ngawt hi chuan daih rei mawlh hek lo le, kan pa chuan hnathawk nasain hah viau ṭhin mahse zu in a ching chho leh tial tial mai a, engpawhnise, a ṭhat lohzia hrilh ila, Vanram lah tumah inkai kep theih a ni si lo va, mahni rinna ṭheuh a kal leh kal loh tur a ni mai a, vawikhat na reng reng hrilhfiah erawh chu ka ba vein ka inhria a; uluk zet chuan ka hrilh leh ta dap a.
Mahse a pawm leh pawm loh chu ama thu thu a ni tawh a, ka thiang tawh alawm tiin ngaihṭha takin ka awmsan ta a. A sim loh pawhin ka fate pa a ni a, nupa keh kara fate an awm ai chuan tiin, engti pawhin khawsa sela, ṭhen hi ka tum ta lo bur mai a ni; ka fate puitling taka enkawl kha ka tum ber a. Faten 'Papa,' an tih changa a lo eih lauh theih chuan ka duhtawk ta viau mai a, rilru a leh hahdam duh phian mai. Zu chu thlah lo mahse a hnathawh erawh a bei ngawrh em em mai thung a, ka nauten " rawn hawnsan mai teh," an tih chang pawh hian,
" Lo enliam ve mai mai teh u, zu hi inin sual viau mahsela, hna hi a thawk nasa em a sin." tiin a thlavang ka hauhsak zawk ta fo mai a.
Engvang pawh nise, ka fate vang hian tuar chhuah hi ka tum ruh em em mai a ni.
Ni khat chu chawhnu tlai lam deuh hian ka pum a rawn na ngaih ngaih mai a, kan pa pawh chu a ram riak a lo haw ve lai tak a ni bawk a, zanriah chaw pawh ka ei thei mumal ta lova, zan dar 8:30 velah chuan nau chu ka nei ve ta hlawl mai a. Kan health worker chuan:
" Ahh..!! Awi fapa.!"
Kan pa te ṭhian ho choka lama awm chu an rawn tlan thla a, mipa a ni ngei em? tiin naute mawng chu an rawn hlim ta diat diat a.
Kan kawmchhak chiaha awm Pu Thana hian fanu hlir pathum a nei a, keinin chuti bawk, kan kawm thlanga awm Pu Nuna leh a thlang leh ami pu Sanga pawhin a nu bawk pathum neiin, kan tual sir deuha awm Pu Liana erawh chuan fanu pathum tho a nei bawk a. Kan veng hi fanu veng aniange an ti hial ṭhin a ni.
Chutia fapa ka han hring ta chu namen lo hian kan lawm ve a, hemi zan hi chu naute pawh kan tuam lum hman lo a chha chu a ni ber e, a khat tawk hian:
" Khawmaw, a lo pa tak tak em le?"
an ti chhen mai a ni.
Mipa leh hmeichhia Pathianin min siam hian, Hmeichhe chiah hian Chi X chiah a dah a, X hi hmeichhe naute tur insiamna a ni a. Chi X leh Y awm leh a, he chi Y hi mipaah chauh a dah ve thung a, tichuan, mipa leh hmeichhia kan inpâwl a kan chi a lo infin tak khan, Mipa chi Y leh hmeichhe chi X lo intawng fuh a, chinunga a lo ṭhan chhoh khan mipa naute a lo insiam ta a; hmeichhe chi X leh mipa chi X a lo intawng a, chinung niin a lo ṭhang chho ve a, chutah chuan hmeichhe naute a lo piang ve ta thung ṭhin a ni.
Hei hi tam takin kan hre fuh lova, kan nupuite puhin kan nupa kar a khik phah fo ṭhin a, fapa neih theih loh hi kan inpuh dawn rau rau a nih chuan, mihringah chuan mipa mawhphurh a sang zawk mah a nih chu.
Mahse fa kan neihdanah hian kan thu a nih lohzia hi chu a takin a lo lang leh ṭhin chu a nih hi. A enga pawh lo piang se, Pathianin kan enkawl tura min pek phal apiang kha an ṭha ber vek mai tih hi pawm thiam a ṭha hle mai.
Entirnan : Tuai leh Patil kan tih ang chi pawh hi hmusit a, endawng ngawt theih an nih lohna chin a awm ve tlat mai.
Mipa chi leh hmeichhe chi a lo intawng fuh kha, chakna inzat zelin a ṭhang chho ta a. Hmeichhe serh nei reng chung si khan, a taksa a mipa nihna leh ṭhang lian bik zelin, hmeichhia nichungin a lo pa ta em em mai ṭhin a ni. Chutiang bawkin mipa serh nei reng pawh kha a taksa a chi inpawlhah khan hmeiche chi lo ṭhang chak zawk zelin, tuai a lo ni ta mai ṭhin a ni.
Kan chhungkua a keh chhiat loh nan theih tawp tak meuh ka chhuah ve ṭhin a, ka faten a pa an ngainat theih nan ka bei nasa ṭhin hle.
Kan pa farnu sual ve deuh mai hi vawi khat pawh a lo zin a, chaw kan ei dawn chuan naupang ka va kaihthawh tir a, " ka ei peih lo, lo va ei rawh u." a lo ti sia kan ei san ta a, naupang rual nen kan ni ve tawh a, chawhmeh pawh duhthusamin a neih theih tawh bik lo a.
Kan farnu chu ka inkhawm ka ban chuan a lo ṭhu tum buau mai a, engkhaw sawi set set lo chuan kan pa chuan ka inkhawm bang chu :
" Chhuak rawh, haw rawh, ka farnu pakhat takngial pawh ngaithei lo hi ka nei peih tawh lo che,"
Ka fate rawn bang ve chuan hrilhhai takin min enṭhap hlawm a, a pa ánhla aṭang chuan thil awmzia an man thuai a.
" Pa, Nani thiam loh a nih kha, kan kaithova, a rawn kal duh si lo,kan kham veleh a rawn vui leh bawk sia," an lo ti ve tliar tliar hlawm a.
Apa thinrim zual chhung chu ka nu te inah ka chhuk thla daih a, tlai lamah chuan naupang ho min rawn lam tir veleh mai bawk a. Kei pawh ṭha takin ka chho leh a, kan farnu erawh chu a mize dik lo a u in a hriatchhuah tak avangin a a haw ta nal nal mai a ni.
Huat leh hmuhmawh tur hi a hre thei em em mai a, mahse ka rilru ka ti khauh lui tlat a,
" Ka fate hi mipuitling takah ka chhuah tur a ni," tiin.
Ka ṭawngṭai sak reng a, a sual zual chang phei chuan kutte min thlak thuak thuak a, mahse kei chuan ka tuar tam tawhin, vanglai hmabak pawh ka nei tawh vak lo a, ka fate an fahrah ai chuan ka tuar zel law law ang a, naupang ho lo puitlinga nikhua an rawn hriat hunah ka nuam ve deuh mahna ka ti tawp mai a ni.
Ka chungah chuan engpawh thleng se pawi tih vak ka nei lo a, amaherawhchu ka fate enkawl thei loa ka awm mawlh ka hlau thung ṭhin.Rilru leh taksa a rethei a, bei hi a dawng ve rum rum mai ṭhin a ni. Mahse ka fate hian chakna min pe zel a, anmahni vang hian ka guar thei zel a ni ber mai.
Vawikhat chu speaker R Lalbiaksanga hi a lo kal a, chumi ṭum chuan kan pa pawh campah a lut ve a, Pathian khawngaihna changin a rawn inhmu chhuak ve hlauh mai a. Lalpa hian bang lova amah au a dil reng ṭhintu, kei a fanu lungmawl tein ka auhna hi min hawisan lo tih ka hrechiang hle a ni.
Hun thim leh harsa zualpui ka tawn chhung kha a kum chuan kum 15 dawn chu a lo ni reng mai le..!! Engtinnge ka lo tuar chhuah theih zawk ka ti let ve fo zawk ṭhin a, khang hun harsa ber ka tawh lai .pawh khan ka fate zirna hi ka thlahthlam ngai miah lo a, a pa phunchiar leh kawhmawh bawl a nasat lai vel zawng zawng khan zirna vangin Aizawlah anmahni unau a inluah ve in, ṭul tawpah lo chuan an lo haw pawh hi ka remti ngai vak lo zawk a ni.
A chhan chu, a pa vanga ka tuarna leh apa mize ṭha lo lai kha hmu tam lo se ka duh vang a ni bawk a, an pa ve em em hi hmusita an ngainat loh phah te ka hlau bawk a ni.
Kum 15 chhung vel rethei leh rilru hah taka ka awmna chu a lo kiang ve ṭan ta a. Ka pasal duhtak chu piang tharin, inkhawm turin min kalsan ta fo mai a, a dama khawchhunga a awm a nih chuan inkhawm a ṭhulh ngai lo mai ni loin, Bible chhiar leh ṭawngṭai a taima em em a, Pavalai rawngbawlna leh Kohhrana a phak tawkah a tlanchhe ngai hek lo, keipawh kan fanaute buaipuiin, an unau enkawl a hautak chho ve zel nen, kan pa hnung hi ka zui zo lo zawk fo ṭhin a ni.
Chutianga hlim leh lawm taka chhungkua kan kal chhoh ve zel lai chuan In thar te kan sa ve a, mi in tluk mah suh se, keini tan chuan a hlu tak zet a, a chhung lam duhthusama kan chei zawh hma chuan kan insuan lut ta nghe nghe a, a chhan chu kan pa chuan insawiselna a ngah ve neuh neuh a, incheckup pui vat ka duh vang a ni.
Kan fapa pawhin pawl 12 a zir zo tawh a, a u chiah hmeichhiain Bcom zo ve in, chu mi u leh chuan BA 1st Divah zovin, a upa ber hmeichhia chuan Delhi lamah Hotel management lam a thawk thung a. Ani pawh hian Hindi BA a zir thleng ve bawk a ni.
Chutianga chhungkua kan hlim chhoh ve viau lai chuan kan pa ber chu Thin cancer a ni tih hmuh chhuah a ni hlauh mai a, aw kan hlim ve dawn chauh a, Pathian remruat hi a va mak ṭhin em ka ti vawng vawng mai a.
January thla a kan incheckup chu kan haw chho leh a, Ṭawngṭai damthei leh kan pan phak apiang chu kan pan ve zel a, Aizawl lamah pawh kan inphur thla ve zut mai, chutianga theihpatawp chhuaha kan in enkawl lai chuan a taksa a lo chak lo ve tial tial a, April thlaa Aizawla kan chhuk leh chu Chawl muang loin Falkawnah min phei tlang tir nghal a, Falkawnah ni 10 zet zawt kan awm hnu chuan ICU-ah min sawn ta a.
Chutah pawh chuan engmah kan an theih tak loh avangin, Aizawl Civil Hospitalah min sawn phei lehin, ICU-ah bawk chuan min dah leh ta a.
Hetianga anat leh enkawl ngaia a awm chhung hian vawikhat te pawh a phunnawi miah lo a, hmel hlim sar mai hian a nui thei reng mai a, ICU a a awm lai a a ṭawng theih chhunah chuan, " Mafel, Anutei chu ka va ngai em.!" tiin ka nau amah enkawl taima em emtu chu ala lam hram hram a ni.
ICU a kan luh hnu zan dar 6:45 velah chuan hmel hlim sarh mai a min rawn en chungin, thlamuan hmel em em hian Lalpa hnenah min haw san ta a ni.
Pasal sûn chu Dar dinglam sahthlak an lo tehkhin ṭhin hi chu an lo uar hauh lo mai le, upat lam panin kum 50 kan hmang ve ṭan chauh a ni a, chutah mah kan pa nun ṭha leh fel a inṭan ve chiah a, kan hlim ve dawn chauh a ni lehnghal si.
Lalpa hnenah pawh ka vui lek lek zawk hial a, mahse ani(Lapa) chuan min thlamuan chungin nka thinlungah thu a sawi a,
" A sual lai zawng zawng khan thi tlak a ni si lova, tunah mifel niin nang pawhin i thlahlel em em a, kei pawhin a fel leh ṭha te hi ka duh ve tho va, tunah zawng thi tlak khawpin a fel ve ta a, lawm zawk ta che, ka thlahthlam dawn lo che, i kiangah ka awmin ka thlamuan zel dawn che alawm. Kum kha leh chen sual dova i mittui tla ṭhin kha ka hruk fai sak tawh che a, i do chu i hneh a, i pasal leh fanaute pawh ka hnen i rawn hruai thleng alawm;
" KA HNEH VE TA,"
tiin lawmthu min hrilh zawk dawn lawm ni? ka fanu,"
tiin.
A tawp ta.🌹
No comments:
Post a Comment